(function() { (function(){function c(a){this.t={};this.tick=function(a,c,b){var d=void 0!=b?b:(new Date).getTime();this.t[a]=[d,c];if(void 0==b)try{window.console.timeStamp("CSI/"+a)}catch(l){}};this.tick("start",null,a)}var a;if(window.performance)var e=(a=window.performance.timing)&&a.responseStart;var h=0=b&&(window.jstiming.srt=e-b)}if(a){var d=window.jstiming.load;0=b&&(d.tick("_wtsrt",void 0,b),d.tick("wtsrt_","_wtsrt", e),d.tick("tbsd_","wtsrt_"))}try{a=null,window.chrome&&window.chrome.csi&&(a=Math.floor(window.chrome.csi().pageT),d&&0=c&&window.jstiming.load.tick("aft")};var f=!1;function g(){f||(f=!0,window.jstiming.load.tick("firstScrollTime"))}window.addEventListener?window.addEventListener("scroll",g,!1):window.attachEvent("onscroll",g); })();

Konan sem kyndir ofninn sinn

Eldhúsreyfarar miðaldra matargúrús á Skólavörðuholtinu

13.9.08

Ferðalag og hundakjötsveisla

Jæja, ég er farin á fund og síðan í starfsmannaferð sem lýkur ekki fyrr en í kvöld. Til allrar hamingju er þetta vissuferð en ekki óvissuferð. Mér leiðast óvissuferðir.

Það verður komið við á Hvanneyri. Og af því að ég komst einmitt að því (sjá komment við færsluna hér að neðan) hvað tangogi er, þá einmitt rifjaðist upp fyrir mér frásögn afa míns af veislu einni á Hvanneyri fyrir 90 árum.

En ég hugsa að það hafi ekki verið boðið upp á hundakjöt þar síðan. Við erum samt með nesti með okkur til að borð þar.

|

Our Great and Beloved Leader, norðurkóresk rómantík og súpa

Ég var að lesa einhverjar speglasjónir um hvort hann Kim il Jong væri dauður eða lifandi og þá rifjaðist allt í einu upp fyrir mér að þegar ég eignaðist norðurkóresku matreiðslubókina mína fyrir ekki svo löngu, þá fylgdi með henni DVD-diskur með norðurkóreskum áróðri, sem ég var þó aldrei búin að skoða. Þannig að ég fann hann og stakk honum í diskadrifið á tölvunni.

Þetta reyndust vera stuttar klippur af hinu og þessu mjöööög áhugaverðu, svo sem myndir af syrgjendum við jarðarför Our Great and Beloved Leader Kim il Sung, norðurkóreski herinn við tónlistariðkanir, eitthvað sem hét Urban Girl og mér sýndist helst vera norðurkóresk sápuópera eða kannski bíómynd þar sem ung og hugguleg stúlka horfði miklum aðdáunaraugum á ungan og huggulegan mann þegar hann sagði að nú gætu þau byggt upp kommúnismann eða eitthvað og síðan voru sýndir bleikir akrar og slegin tún ... en þá fór DVD-diskurinn að gefa frá sér undarleg hljóð og hegða sér á einhvern mjög norðurkóreskan hátt og ég hélt ég ætlaði ekki að ná honum úr tölvunni aftur. Þannig að ég fæ líklega aldrei að vita hvernig þetta fór hjá þeim í sveitasælunni (eða af hverju þetta hét Urban Girl fyrst allir fluttu út í sveit).

Ætli ég haldi mig ekki við matreiðslubókina. Eða heftið, þetta er nú frekar rýrt í roðinu. Þarna er samt Aspic Jelly of Ox Trotter og eitthvað sem heitir Tangogi Soup. Í hana eru notuð 5 kíló af tangogi, sem ekkert er útskýrt nánar og ég er ekkert viss um að ég vilji neitt vita hvað er. Lýsingin byrjar allavega svona: ,,Remove offals and fat, and cover with cold water to remove blood stained. Clean and simmer for 3 hrs., skimming lifting fat and scum. Rub the offals with salt and scald with boiling water. Rinse again and bring to boil offals with meat."

Hmmm.

|

12.9.08

Fótboltaamma?

Eldra barnabarnið er að spila til úrslita um Íslandsmeistaratitilinn í 3. flokki í fótbolta á sunnudaginn. KR-Breiðablik á KR-velli kl. 12.

Nú er spurningin: Á ég að vera rosalega mikil amma og mæta til að horfa á?

Ætli ég láti ekki veðrið ráða því. En ef ég fer verður það líklega í fyrsta skipti í 36 ár eða svo sem ég geri mér sérstaka ferð á fótboltaleik.

Af ljósmyndaranum er það annars að frétta að hann kom aldrei og ég er búin að éta matinn sem hann átti að mynda.

|

Beðið eftir Godot ...

Hmmpf, hvar er þessi fjárans Fréttablaðsljósmyndari sem átti að koma milli hálfsjö og sjö?

Matur á ekki að bíða eftir ljósmyndurum, hann hefur ekki gott af því. Útlitslega séð, bragðið skiptir kannski ekki máli. Ljósmyndarar þola afturámóti vel að bíða eftir mat ef því er að skipta.

Útlitslega séð allavega.

|

Vínsmökkunarstyrkur

Ég var að fá fréttabréf Hagþenkis áðan og þá rann upp fyrir mér að ég gleymi alltaf að sækja um alla þessa starfsstyrki og ferðastyrki og menntunarstyrki og allt það sem ég get kannski fengið.

Ætli ég geti fengið ferða- og menntunarstyrk út á vínsmökkunarferðina til Toskana? Það er óneitanlega eitthvað sem getur nýst mér við bókarskrif.

Best að tékka á því fyrir næstu úthlutun. Ef ég man.

|

11.9.08

Ömmur á Facebook

Barnabarnið kommentaði á Fésbókarmyndina mína og sagði ,,hahaha þú ert asnalegt".

Það er ekki borin mikil virðing fyrir ellinni á þeim bænum, ónei.

Var ég ekki að lesa einhvers staðar alveg nýlega áhyggjur einhvers yfir að bráðum yrðu ömmurnar komnar á Facebook og birtu myndir sem fengju barnabörnin til að skammast sín alveg oní hrúgu?

Jæja, ég var allavega á undan barnabarninu.

|

Kynvissa

Ég fékk póst áðan frá Gallup. Svona viðhorfskönnun þar sem maður á að merkja við möguleika. Allt í lagi með það.

Fyrsta spurningin snerist um það af hvaða kyni ég væri. Möguleikarnir voru:

Kona
Karl
Vil ekki svara
Veit ekki

Ég held fjandakornið að ef maður veit ekki af hvaða kyni maður er geti maður varla verið marktækur um annað.

Sveimérþá.

|

Ég á afmæli í dag ...

Nei, reyndar ekki, en ég er að halda upp á að það eru 22 ár síðan ég hóf störf í útgáfubransanum; byrjaði að vinna hjá Iðunni 11. september 1986. Svo að ég mætti með köku í morgun. Gráfíkjueplaköku.

Þegar ég hafði unnið í 15 ár samfleytt hjá Iðunni mætti ég með nokkrar tertur í vinnuna. Ákvað að bjóða upp á þær með morgunkaffinu. Rétt eftir hádegið kom í ljós að það hafði verið hárrétt ákvörðun; það var ekki alveg stemmning fyrir tertum í síðdegiskaffinu 11. sept. 2001.

|

Rabarbarabjór frá Falklandseyjum og skyndibrugg Steingríms

Þessi uppskrift er fyrir Finnboga. Ég er svo lítið inni í germálum að ég set gerupplýsingarnar hér óþýddar.

Þetta er nú eitthvert skyndibrugg; af einhverri ástæðu rifjaðist upp fyrir mér þegar ríkinu var óvænt lokað í einhverju verkfalli, 1975 eða 6 (afgreiðslumenn í ríkin voru ekkert í verkfalli, heldur var lokað svo verkfallsmenn færu ekki á allsherjarfyllirí í aðgerðarleysinu) - allavega, tíðindin bárust í setustofu MA með útvarpsfréttum í hádeginu á föstudegi og 6. bekkur var með partí á laugardagskvöldi. Það varð almennt upphlaup, Jói longneck henti niður pottþéttri slemmu og hvaðeina, en svo var gripið til allra ráða að bjarga partíinu. Gulli brekka keyrði fram allan fjörð að snapa saman brennivín hjá fornbýlum eyfirskum bændum og Steingrímur Sigfússon skrúfaði upp hitann í Steinsbreweryi til að flýta gerjuninni. Það fór engum sögum af gæðum bjórsins en allir urðu fullir á endanum.

Það var enginn rabarbari í bjórnum í Steinsbreweryi samt.

Rabarbarabjór

1 gallon sjóðandi vatn
12 meðalstórir rabarbaraleggir
1 msk engifer
3 bollar sykur
,,1 dessertspoon DCL Yeast"

Rabrbarinn skorinn í 5 cm bita og settur í skál (ekki málmskál). Engifer og sykri stráð yfir og sjóðandi vatni hellt yfir allt saman. Látið standa þar til vatnið er ylvolgt en það er gerinu stráð yfir, klútur breiddur yfir allt saman og látið standa á hlýjum stað til næsta dags, ,,the rack above a Rayburn will do". Morguninn eftir er lögurinn síaður og settur á flöskur, helst bjórflöskur, má nota vínflöskur með þéttum korki en þá má bara fylla þær að 3/4 og það verður að binda niður korkinn (þetta stendur í uppskriftinni).
Tilbúið eftir sólarhring sem svaladrykkur sambærilegur við engiferöl. Verður ,,bjórlegri" eftir svona viku en þá geta flöskurnar líka sprungið!

Hmmm.

|

10.9.08

Völvan Nanna

Í dag sýndi ég af mér þvílíka forspárhæfileika að mati vinnufélaga minna varðandi ákveðið útgáfumál að ég var nefnd Völva Vikunnar - sem að vísu er vafasöm einkunn um forspárgáfu. (Þetta snerist að vísu bara um að draga rétta ályktun af fyrirliggjandi staðreyndum - en sama er.)

Ég spáði því reyndar líka áður en fótboltaleikurinn (sem ég er ekki að horfa á) færi 3-0 fyrir Skota. Sjáum til hvort völvunafnbótin heldur. En þetta var púra ágiskun, ekki einstök ályktunarhæfni mín - og hver veit nema skosku leggirnir sem ég þrástarði á í strætó áðan hafi villt mér sýn.

|

Berlæraðir karlmenn

Ég tók strætó heim úr vinnunni. Leið 14.

Hann var troðfullur af berlæruðum eldhressum syngjandi Skotum á leið á leikinn.

Barnabörnin mín eru líka að fara á leikinn. Dótturdóttirin, sem er jú hálfur Skoti, ætlar að ákveða með hvorum hún heldur þegar hún sér hvorum gengur betur.

Dóttursonurinn ætlar að mæta í skotapilsinu systur sinnar. Ég held samt að hann ætli að halda með Íslendingum.

Skotarnir voru að vísu misjafnlega fagurlimaðir. Samt finnst mér að karlmenn ættu að gera mun meira af því að ganga berlæraðir í hnésíðum pilsum. Svona heilt yfir.

|

Error 166

Forlagið á ágætis kaffivél, sem fjárfest var í þegar fólki snöggfjölgaði hér á Bræðraborgarstígnum í fyrra. Það kemur alveg þokkalegasta kaffi úr henni og hún er oftast nokkuð prúð, nema ef einhver gleymir að þrífa hana, sem vissulega getur gerst.

En með svona flókið tæki getur eitt og annað komið upp á; vélin er hins vegar svo menntuð að hún gefur til kynna hvað er að, svona meira og minna, með einhverju fínu númerakerfi. Á ensku, ég þakka nú bara fyrir á meðan hún fer ekki óforvarendis að tala spænsku eins og ljósritunarvélin hjá Fróða gerði einu sinni, því að spænskusérfræðingurinn okkar er að flytja til Barselóna.

Ein af þeim tilkynningum sem birtist reglulega á skjá kaffivélarinnar er: ,,Error 166: Please consult the user manual."

Þetta hljómar ekki vel og þeir sem ekki eru vanir að umgangast vélina reyta náttúrlega hár sitt og fara að leita að leiðbeiningaheftinu til að fletta upp á error númer 166.

Hinir fylla vatnsgeymi vélarinnar. Ég skil samt ekki af hverju svona menntuð kaffivél getur ekki bara sagt ,,Please add water."

|

Mánaðarlaun skrifstofustúlku 1974

Hvar finnur maður upplýsingar um meðalmánaðarlaun skrifstofustúlku árið 1974 (ekki reiknað til núvirðis)?

Launaseðlasafnið mitt nær ekki svo langt aftur. En mig minnir að á skrifstofu Kaupfélags Skagfirðinga hafi skrifstofustúlka í sumarvinnu fengið 25 þúsund krónur.

Ég man aftur á móti að skrifstofustrákar í sumarvinnu hjá KS fengu 10.000 krónum meira. Þótt viðkomandi skrifstofustúlka þyrfti að laga vitleysurnar eftir þá.

|

9.9.08

Í þá góðu gömlu daga

Ég var að skoða Moggabaksíður frá sumrinu 1974 áðan og allt í einu fór ég að hugsa um hvaða heimsósómakjaftæði þetta væri í fólki, alltaf verið að tala um hvað allt hefði nú verið gott hér áður fyrr og svona.

En þarna var á nánast hverri baksíðu frétt um einhvern sem hafði verið drepinn eða barinn í klessu eða rændur eða hafði dáið voveiflega eða slasast illa eða eitthvað slíkt. Og utanlandsferðir hækkuðu um 20% og brennivínið um 25% flugfargjöld um 50% og það voru slegin verðbólgumet og bensínið var komið í 52 krónur (nújæja) og kaffið hækkaði (og svo var kaffiskortur líka) og það var sett verðbólgumet. Og vextirnir hækkuðu og bankarnir voru illa staddir og skulduðu einhver ósköp.

|

Fjarstýringaleit

Ég sá á einhverrri stöð áðan að maður (Bandaríkjamenn allavega) eyddi að meðaltali 19 dögum af ævinni í að leita að sjónvarpsfjarstýringunni.

Mín er búin að vera týnd í marga mánuði og mér dettur ekki í hug að leita.

Ókei, ég nota fjarstýringuna af afruglaranum í staðinn (en ég þarf aldrei að leita að henni nema þegar barnabörnin hafa verið í heimsókn).

En nítján dagar ... jæja, ef fólk vantar Samsung kannski.

|

Albatrosegg og sæljónatungur

Ég var að fá Falklandseyjamatreiðslubókina sem ég átti í pöntun. Þar er uppskrift að mörgæsareggjapavlovu (2 mörgæsareggjahvítur, 1 bolli sykur, 1 tsk edik, 1 tsk vanilluessens, 1 ábætisskeið maísmjöl) en því miður engin að grillaðri mörgæs eða einhverju slíku góðgæti.

Reyndar gæti margt þarna eins verið íslenskt (kannski ekki skrítið, staðháttanna vegna) - mikið um kindakjöt, silung, harðgert grænmeti, rabarbara og bakkelsi. Meira að segja rabarbarabjór.

Svo eru reyndar uppskriftir með albatros- og mörgæsaeggjum. Jú, og tekið fram að sæljónatunga sé sérlega bragðgóð. En engin uppskrift, því miður.

|

8.9.08

Íslenskar uppskriftir???

Hvað skyldi vera svona íslenskt við nautasteik með apríkósum, kalkúna- og beikonsalat, tebolla, ricottalasagne, amerískar pönnukökur, bruschetta með mozzarellaosti, marglitt Jellohlaup, paellu, franskar kartöflur eða eplaböku?

Þegar ég leita að uppskriftum frá ákveðnum löndum á netinu tek ég það sem ég finn oft mátulega trúanlegt. Og ekki að ástæðulausu eins og þessi síða ber vitni um. En það hafa sjálfsagt einhverjir rekist á hana sem eru að leita að ,,icelandic recipes" og kannski á maður eftir að sjá uppskriftirnar þarna í erlendum uppflettiritum merktar sem íslenskar.

Annað eins hefur gerst.

|

Sá á kvölina

RÚV eða Skjár 1? Banvænar veirur eða Spice Girls?

Þegar stórt er spurt ...

|

Á barneignaraldri

Maður er alltaf að heyra fréttir af miðaldra (og eldri) konum sem eru að eignast börn með aðstoð tækninnar. Jafnvel mörg eintök. Þær um það svosem ... en ég skil þær ekki. Ég er fimmtíu og eins árs og helvíti fín amma. Sem er nákvæmlega það sem manni er ætlað að vera á þessum aldri. Ég lít sko ekki svo á að ég sé á neinum barneignaraldri, hvað sem þessu blessaða breytingaskeiði líður. Ef hún dótturdóttir mín fetaði í fótspor mín, sem mér finnst reyndar frekar ólíklegt, yrði ég langamma eftir rúm tvö ár.

Ég get afskaplega vel skilið að konur sem eiga ekki barn langi óstjórnlega til þess og þær séu tilbúnar að leggja nánast hvað sem er á sig til að svo megi verða. En mér finnst satt að segja að þær ættu ekki að hafa leyfi til þess þegar komið er á þennan aldur. Það að eignast barn (viljandi sko, við erum ekkert að tala um slysabörn hér) er nefnilega eintóm eigingirni. Þegar fólk ákveður að eiga börn gerir það það fyrir sjálft sig en sannarlega ekki fyrir börnin. Sem er í fínu lagi út af fyrir sig en kona sem eignast þríbura hátt á sextugsaldri er afskaplega ólíkleg til að geta annast þá og fylgt þeim eftir í lífinu eins og þeir eiga skilið.

Já, ég veit. Auðvelt fyrir mig að segja það ...

|

Krúttlegar lýs

Dóttursonurinn er nýbúinn að komast yfir lúsabækling sem lá frammi í apóteki.

Honum þykja lýsnar svo krúttlegar að hann langar í lús.

Ég skil hann næstum því. En ég held að það þurfi að sýna honum nokkrar ljósmyndir af lúsum.

|

Faldir stólar



Núna er ég með heila borðstofu og þarf ekki að hafa áhyggjur af plássi (ekki fyrir borðið og stólana allavega). En sú var tíðin að svona mubla hefði komið sér vel.

|

7.9.08

Gikkirnir mínir

Ég keypti mér lifur í matinn á fimmtudaginn. Mér þykir lifur nefnilega góð. En þegar ég kom heim var einkasonurinn staddur þar og fór kurteislega fram á að sér yrði boðið að borða. Hann borðar ekki lifur svo ég geymdi hana til næsta dags.

Á föstudaginn ætlaði ég að elda mér lifur en þá var eldra barnabarnið hjá mér og fór fram á að sér yrði boðið í kvöldmat. Hún borðar ekki lifur svo að ég eldaði annað.

í gærkvöldi var ég með matarboð, var að hugsa um að nota lifrina í forréttinn en við nánari umhugsun sá ég að það væri ekki sniðugt, þar sem ég er nokkuð viss um að enginn fjögurra afkomenda minna borðar hana, veit ekki með tengdabörnin en kannski hefði ég setið að henni ein. Svo að ég bauð upp á blandað góðgæti - steiktan smágrísahrygg, grafinn kindavöðva, snöggsteiktar rækjur með harissa og humargratín. Andabringur á eftir og síðan vanilluís með karamellusósu. Þetta þótti allt ljómandi gott og ég er ekki viss um að ég hefði fengið neinn plús fyrir að bæta grilluðum lifrarbitum á teini við eins og ég var að hugsa um.

Ég var ekki alveg viss um að lifrin væri enn í lagi þegar kom að kvöldmatnum áðan; lyktaði vel og vandlega af henni áður en ég skar hana niður, velti henni upp úr hveiti krydduðu með pipar, salti, chilipipar, papriku og timjani og snöggsteikti. En hún var bara alveg hreint ágæt.

Þau vita ekki af hverju þau eru að missa.

|