(function() { (function(){function c(a){this.t={};this.tick=function(a,c,b){var d=void 0!=b?b:(new Date).getTime();this.t[a]=[d,c];if(void 0==b)try{window.console.timeStamp("CSI/"+a)}catch(l){}};this.tick("start",null,a)}var a;if(window.performance)var e=(a=window.performance.timing)&&a.responseStart;var h=0=b&&(window.jstiming.srt=e-b)}if(a){var d=window.jstiming.load;0=b&&(d.tick("_wtsrt",void 0,b),d.tick("wtsrt_","_wtsrt", e),d.tick("tbsd_","wtsrt_"))}try{a=null,window.chrome&&window.chrome.csi&&(a=Math.floor(window.chrome.csi().pageT),d&&0=c&&window.jstiming.load.tick("aft")};var f=!1;function g(){f||(f=!0,window.jstiming.load.tick("firstScrollTime"))}window.addEventListener?window.addEventListener("scroll",g,!1):window.attachEvent("onscroll",g); })();

Konan sem kyndir ofninn sinn

Eldhúsreyfarar miðaldra matargúrús á Skólavörðuholtinu

15.9.06

Fátæku börnin

Ég hef verið að senda gagnlega barnið í Góða hirðinn/Sorpu með bókakassa og fatapoka að undanförnu. Barnabörnin hafa einhverja hugmynd um að með þessu sé verið að styrkja fátæk börn en sjá ekki alveg samhengið.

Sauðargæran (hugsi yfir nokkrum kössum af reyfurum og fleiru): -Hvað gera fátæku börnin við bækurnar?

Boltastelpan: -Heyrðu. Þurfa fátæku börnin að nota þessi föt sjálf? (Sér víst ekki alveg fyrir sér fátæk börn í Afríku klædd í föt af ömmu.)

|

14.9.06

Prófleysismegrun

Ég sé í nýjasta Séð og heyrt sem ég var að fá á skrifborðið hjá mér að Eyþór Arnalds hefur lést um 11 kíló við að vera próflaus í nokkra mánuði.

Ég er búin að vera próflaus alla ævi. Hvernig ætli ég liti út ef ég væri með bílpróf?

|

13.9.06

Vínartertuuppskrift

Hér er svo vínartertuuppskriftin sem ég lofaði. Vestur-Íslendingarnir hafa rétt fyrir sér, þetta ætti að vera hin eina sanna íslenska jólaterta. Já, og ég mæli mjög eindregið með því að þið notið heilar kardimommur og steytið þær í mortéli. En duftið dugir svosem.

Vínarterta

225 g smjör
225 g sykur
2 egg
500 g hveiti (meira eftir þörfum)
1 tsk lyftiduft
1 tsk kardimommur, helst nýmalaðar (alls ekki dropar, það ætti að banna þá með lögum)
4 msk mjólk

Smjör og sykur hrært vel saman, eggjunum hrært saman við og síðan er hveiti, lyftidufti og kardimommum blandað saman og hrært saman við ásamt mjólkinni. Hveiti bætt við ef þarf svo að deigið verði vel hnoðunarhæft (en það á samt að vera fremur lint). Kælt í a.m.k. hálftíma. Ofninn hitaður í 190°C. Deiginu skipt í 5-7 hluta og hver þeirra flattur út í hring og kringlótt kaka skorin út undan diski (ég nota disk sem er dálítið minni en matardiskur). Kökurnar settar á pappírsklæddar bökunarplötur og bakaðar í um 9-10 mínútur ofarlega í ofni, þar til þær eru farnar að taka lit. Látnar kólna í örfáar mínútur en það er best að leggja kökuna saman á meðan bæði hún og sultan eru volgar.

Sveskjusulta

500 g sveskjur, steinlausar
175 g sykur
1 msk kanell
1 tsk kardimommur
200 ml vatn

Allt sett í pott og látið malla þar til sveskjurnar eru byrjaðar að fara í mauk og nær allur vökvi gufaður upp. Best að hræra oft á meðan. Látið kólna ögn og síðan sett í matvinnsluvél og maukað. Ef sultan er svo þykk að ekki er hægt að smyrja henni á botnana má bæta svolitlu vatni við.

|

12.9.06

Bókakassar

Búin að setja bækur í tíu kassa. Líklega ekki eftir nema fimm-sex ...

Sko, fyrir utan matreiðslubækurnar. Sirka fjörutíu hillumetrar. Plús allir kassarnir sem bíða uppi í Fróða ... afsakið, Birtíngi.

Ég hugsa að ég þurfi að kaupa mér nokkra nýja Billy.

|

Spam, spam, spam, spam ...


Eruð þið með gmail? Og ef svo er, hafið þið þá opnað spam-möppuna nýlega? Og hafið þið þá tekið eftir nýjum fídus þar - í hvert skipti sem maður opnar möppuna kemur (efst, fyrir ofan delete-hnappinn) tengill á nýja Spam-uppskrift?

Meiriháttar.


Ég er reyndar viss um að það mætti búa réttinn á myndinni hér fyrir ofan til úr kjötfarsi ef Spam er ekki til reiðu. (Hildigunnur, var nokkuð Spam í djönkfúdd-pöntuninni þinni?)

|

11.9.06

Meira um tvítugsafmæli

Af því að ég var að tala um tuttugu ára afmæli, þá dettur mér í hug að í tiltekt á tölvunni á dögunum rakst ég á matseðil frá því að við einkasonurinn héldum upp á tvítugsafmælið hans í London. Við fórum á Roussillon í Pimlico (ein Michelinstjarna) og þetta var það sem við fengum:

Dverggrænmeti með sinnepsvinaigrette
Fljótakrabbi með fíflablöðum og sósu
Kartöflumauk með villtum hvítlauk
Steikt sólflúra á grænmetisbeði
Grillaður lambahryggvöðvi með steiktu grænmeti
Þrír franskir vel þroskaðir ostar
Sítrónusoufflé
Súkkulaðibúðingsfingur
Kaffi með petits fours
12 ára calvados

Það skal sagt drengnum til hróss (hann var mun matvandari fyrir fimm árum en hann er núna) að hann smakkaði á öllu. En gafst reyndar upp á frönsku ostunum og tautaði eitthvað um sokka sem einhver hefði gengið í í hálfan mánuð.

Ef ég fer aftur með annað hvort barnabarnið eða bæði til London er ekki útilokað að ég færi með þau í hádegismat á Roussillon; ég sé að nú er farið að bjóða upp á sjö rétta gourmet-máltíð í hádeginu, ókeypis fyrir börn annan hvern miðvikudag.

|

Tuttugu ár

Ellefti september ... jújú, auðvitað á að minnast þess sem gerðist fyrir fimm árum. Þó það nú væri.

Fyrir mér er ellefti september samt alltaf dagurinn sem ég byrjaði að vinna hjá Iðunni. Og í dag eru einmitt tuttugu ár síðan.

Ég hef ekki skipt um vinnu síðan þá - eða jú, auðvitað, en það hefur gerst smátt og smátt, Fróði keypti Iðunni og ég fór að vinna verkefni fyrir Gestgjafann sem urðu að fastri vinnu þegar búið var að segja upp öllum gömlu Iðunnarstarfsmönnunum nema mér og selja útgáfuna. Svo að mér finnst ég eiga tuttugu ára starfsafmæli í dag.

Fyrir fimm árum mætti ég með tertur í vinnuna til að halda upp á fimmtán ára afmælið. Til allrar hamingju ákvað ég að hafa þær með morgunkaffinu, hefði víst þýtt lítið að bjóða upp á þær eftir hádegið.

Ég kom ekki með neinar tertur í dag. Bara örfáar smákökur gerðar úr afgöngum af vínartertudeigi.

|

10.9.06

Vínarterta

Ég er að baka vínartertu. Alvöruekta (vestur)íslenska vínartertu, kardimommukryddaða með kanel- og negulkrydduðu sveskjumauki. Hrikalega góð.

En hún er að fara til Kanada í heilu lagi á morgun svo að það þýðir ekkert að koma í kaffi og vonast eftir sneið.

Bara svo það sé á hreinu ...

|