Við mæðgurnar ætlum að bregða okkur til London í desemberbyrjun að gamni okkar. Fengum ódýrt far svo að ég ákvað að panta gott hótel sem mætti alveg kosta dálítið; datt í hug að athuga Cumberland, sem ég hef áður gist á og var mjög ánægð með og fór á www.octopustravel.com , sem ég hef stundum notað til að panta hótel. Fletti þessu upp og athugaði hvað fjórar nætur í byrjun desember kostuðu. 1028 pund fyrir herbergi með tveimur rúmum. Hmm. Dálítið fyrir ofan það sem ég hafði hugsað mér. Ákvað að láta hótelpöntun bíða betri tíma.

Nokkru seinna var ég að athuga eitthvað á annarri síðu sem ég hef notað, www.activehotels.com , og datt í hug að skoða betur hótel í London. Eitt af þeim fyrstu sem ég rakst á var einmitt Cumberland. Herbergi með tveimur rúmum kostaði þar 477 pund fyrir fjórar nætur í byrjun desember. Sprengingarnar í neðanjarðarlestunum? Nei, verðið hjá octopustravel var það sama (og er enn). Eini munurinn var að morgunverður var innifalinn í hærra verðinu, ekki í því lægra.

Svo að ég fór að athuga fleiri hótelsíður. Verðin sem ég fann fyrir nákvæmlega sama gistimöguleika voru mjög ólík: 876 pund hjá www.totalstay.com , 657 pund hjá www.hotelocity.com , 599 pund fann ég einhvers staðar ... Það borgar sig greinilega að gera samanburð þegar pantað er á netinu.

Ég gæti auðvitað fundið mun ódýrari gistingu. Stundum er mér alveg sama þótt ég gisti einhvers staðar þar sem fataskápurinn hrynur þegar maður reynir að hengja upp föt, sjónvarpið virkar ekki, það er fúkkalykt í herberginu (nei, mér er reyndar ekki alveg sama um það), herbergið er vissulega með sérbaði en það er bara frammi á gangi, lyftan er einn fermetri og lúsast áfram eins og farlama öldungur og það er hvorki hægt að draga gardínurnar frá né alveg fyrir (ég hef lent í þessu öllu á ódýrum hótelum í London). En stundum langar mig bara til að láta fara vel um mig. Og það fór alveg ljómandi vel um mig þegar ég gisti á Cumberland í fyrra.

Svo eru ódýru hótelin í London ekkert endilega mjög ódýr. Í júní gisti ég eina nótt á Rose Court, sem er um hundrað metra frá Cumberland en er bara tveggja stjörnu. Allt í lagi en ekkert meira (lyftan og gardínurnar sem ég nefndi hér á undan voru þar). Fjórar nætur þar í byrjun desember kosta 360 pund.

Annars var ég að lesa pistil áðan eftir mann sem var að kvarta yfir að það væri of mikið af upplýsingum um hótel og allt þess háttar á netinu; hann var einmitt búinn að finna hótel í London sem honum leist mjög vel á en þá rak konan hans augun í að í morgunverðarsalnum hanga verk eftir listamann sem henni líkaði ekki og neitaði að gista þar ...

Ég, gagnlega barnið, Boltastelpan og Sauðargæran fórum í klósettkaupaleiðangur áðan. Það er að segja, meiningin var að kaupa nýtt klósett í staðinn fyrir þetta gamla sem ég er með núna og er orðið verulega low-tech (þ.e. eftir langvinna tregðu er vatn núna alveg hætt að renna í vatnskassann) og orðið verulega aðkallandi að skipta. Sauðargæran hafði nokkurn áhuga á málinu, prófaði ýmsar tegundir (,,í þykjustunni", tók hann skýrt fram sjálfur) og rak harðan áróður fyrir að amma fengi sér skrítið klósett. Þá held ég að hann hafi verið að meina svona Philippe Starck-græju sem er eins og postulínsruslafata. Ég var nú ekki alveg sammála en leist hins vegar vel á annað Starck-módel sem kostaði ekki nema innan við þriðjung af postulínsfötunni og ákvað að kaupa það. Þá var það auðvitað ekki til (nema á Selfossi og mér leist ekki á að láta rúnta með mig á Selfoss í klósettkaupaleiðangur). Og búið að loka flestum hreinlætistækjaverslunum.

Við lögðum því klósettkaupaáform á hilluna fram yfir helgi, low-tech-aðferðirnar verða að duga á meðan.

Sá eini sem græddi á leiðangrinum var Sauðargæran; í Húsasmiðjunni rak hann augun í leikfangagolfsett úr plasti sem hann varð svo hrifinn af að amma hans bráðnaði alveg og keypti það handa honum. Systir hans tilkynnti að þar með ætti hún inni eitthvað hjá mér sem kostaðið 590 krónur, það mætti ekki gera upp á milli; þýddi ekkert að benda henni á að hún hefði notið þess í sjö ár að eiga ömmuna ein.

Búin að vera heima að elda í dag, nú er það nefnilega hitt aukaverkefnið mitt sem þarf að sinna - ég er að ganga frá nýrri matreiðslubók, 100 síðna bók með lambakjötsuppskriftum sem á að koma út í haust. Við vorum einmitt núna áðan að ljúka við myndatöku í bókina. Þannig að ég var að grilla í morgun - ég veit ekki hvernig veðrið er annars staðar á höfuðborgarsvæðinu en á svölunum hjá mér er rjómablíða og fínasta grillveður.

Ég þarf samt ekki að elda allt sem á að fara í bókina því að hluti af uppskriftunum hefur birst í Gestgjafanum og þá eru til myndir sem hægt er að nota, en hluti er semsagt nýr. Ég sá að einhver hélt því fram í blaði á dögunum að kjötveislunni væri lokið en svo er ekki hjá mér, hér hefur verið heilmikil kjötveisla að undanförnu og ég hef reyndar alveg lagt mitt af mörkum á undanförnum árum til að eyða blessuðu kjötfjallinu. Mér finnst lambakjöt frábært hráefni og ég held að þetta verði fín bók - en ég er náttúrlega ekki hlutlaus.

Já, og það er meiningin að áskrifendur Gestgjafans fái bókina ókeypis þannig að ef þið hafið verið að velta fyrir ykkur að gerast áskrifendur er rétti tíminn núna ...

Einhverntíma man ég að ég talaði hér um www.london-eating.co.uk. Í gær var áhugaverð grein í Guardian um þá síðu og þau áhrif sem hún hefur.

Spurning hvort eitthvað svona ætti heima á Gestgjafasíðunni?

Netsambandið var aftur komið í lag þegar efnafræðistúdentinn kom sér að því að athuga málið. Þetta er reyndar mjög dularfullt samband sem á það til að taka tímabil þar sem það er síslitnandi og svo er allt í lagi langtímum saman. En í gær og morgun var það hreinlega alveg dautt.

Venjulega er þetta bara pirrandi en nú er eiginlega komið að því að það er mun mikivægara fyrir mig en áður að hafa stabíla tengingu þar sem ég er að fara að vinna meira heima - ég kem til með að sjá að mestu um nýjan vef Gestgjafans sem verður opnaður eftir mánuð og sú vinna verður að töluverðu leyti unnin heimanað. Þarna er m.a. meiningin að verði virkur spjallþráður um mat og ég vona að þið lítið þar sem flest við þegar þar að kemur og takið þátt í umræðum eða komið með fyrirspurnir til mín.

Ég er núna á fullu að setja inn efni á vefinn, aðallega úr Gestgjafanum en svo á ég líka töluverðan forða af óbirtu efni sem ég hef skrifað fyrir vefinn sem mig hefur mjög lengi dreymt um að stýra - það var meira að segja sagt frá plönum mínum um hana í pistli í New Statesman fyrir þónokkrum árum en núverandi plön eru kannski ekki alveg eins háfleyg. Í þessum pistli vorum við bornar saman, ég og hún Nigella (sem þá var líka á leiðinni að setja upp matarvef), og sá samanburður var allur mér í hag. En ég skal nú taka fram að pistlahöfundurinn hafði ekki aðra heimild um mig og mín verk en mig sjálfa og blessaðan karlinn han Alan vin minn Davidson. Og svo misskildi hún nú sumt af því sem ég var að reyna að segja henni og ég held að hún sé meira að segja frá draumavefnum sínum.

Ég er kannski svolítið raunsærri núna. En ef einhver stingur upp á að það verði farið að selja ilmkerti á Gestgjafavefnum, þá segi ég stopp.

Það er dáááálítið mikið að gera hjá mér þessa dagana, ég er að dæla inn efni á Gestgjafavefinn sem til stendur að opna innan tíðar, er að elda, láta mynda og ganga frá efni í bók sem á að koma út á næstunni og svo er stórt blað framundan ...

Svo var netsambandið á Kárastígnum úti þegar ég kom heim í gær og var það enn seint í gærkvöldi. Veit ekki hvað er í gangi, þarf að setja efnafræðistúdentinn í málið. Þegar hann vaknar.

Ég sé í fjölmiðlarýni Fréttablaðsins að Tóti Badabing er að kvarta yfir því að Aðþrengdar eiginkonur hafi endað í lausu lofti og svoleiðis hafi menn ekki gert áður fyrr, til dæmis hefði Sue Ellen ekki verið skilin eftir í miðjum hríðum. En hvað þá með Jessicu í Löðri, sem var skilin eftir fyrir framan aftökusveit kommúnista í Malaguay og stendur þar væntanlega enn, tuttugu og fimm árum seinna? Það kalla ég svik við áhorfendur.

Ég man hins vegar ekki hvort homminn Jody stóð enn í þeirri meiningu að hann væri níræður gyðingur þegar þáttunum lauk svona skyndilega. En Burt var ekki lengur hjá geimverunum, það man ég þó.

Mér finnst annars að það ætti að endursýna Löður. Þó að sumt af þessu hafi ekki elst vel (ég sá hluta af þáttunum í norska sjónvarpinu í hitteðfyrra). Annað var enn fyndið.

Það þótti víst mjög djarft af Billy Crystal að taka að sér hlutverk homma og sumar bandarískar sjónvarpsstöðvar neituðu að sýna þáttaröðina (sem var ein sú fyrsta þar sem samkynhneigð var yfirleitt nefnd á nafn).

Nokkur eldhústæki sem ég á ekki:

Mangóskeri.

Beyglufallöxi.

Orlydeigsþekjari.

Eggjaskurnflettari.

Hvítlauksflysjari (ég á reyndar svoleiðis en mun einfaldari gerð).

Rafknúinn sykurpúðagrillteinn.

Pylsuhitari.

Pylsuskeri sem sker pylsurnar í kolkrabbamynstur.

Kartöflustöppugerðarmaskína (sýður kartöflurnar líka).

Bananahlíf.

Sko til, það er ýmislegt hægt að gefa mér næst þegar ég á afmæli.

Já, það passar ...

What Classic Movie Are You?
personality tests by similarminds.com

Spurning sem kom upp frammi við kaffivélina áðan: Úr hvaða sjónvarpsauglýsingu (ca. 1970) eru þessi orðaskipti?

-Fyrirgefið. Ég var áreiðanlega á undan yður.

-En þetta er nú útsala.

Ég er að reyna að rifja upp vísu og eins og margoft hefur komið fram er það ekki mín sterka hlið. Reyndar held ég að ég muni upprunalegu útgáfuna af vísunni nokkurn veginn rétt en það er danska þýðingin sem er að bögglast fyrir mér - það er að segja önnur hendingin, ég held að ég muni hinar. Vísan er svona:

Líknarbelgs við ljótan skjá
lyppar kerling rám.
Grallarann hún gólar á
með grautarask í hnjám.

Danska þýðingin (er hún eftir Benedikt Gröndal eða Jón Helgason eða einhvern allt annan?) er eitthvað á þessa leið:

Ved fosterhindegluggen grum
... en kælling
hyler sit psalterium
imens hun søber vælling.

Ég veit að ég á að vita þetta.

Ég fékk spamm í gær með titlinum ,,improved big penis delivered to your door".

Promises, promises ...