Steikt og brasað

Samkvæmt því sem stendur á skjánum á þráðlausa steikarmælinum sem ég er með hér hjá mér er kjarnahitinn í svínslærinu nú 70,4°C og fer enn hækkandi þótt ég hafi slökkt þegar hann náði 66°C. Ég reikna með að hann eigi eftir að hækka dálítið enn, sem er nákvæmlega það sem hann á að gera; lærið ætti að verða bara fínt með þessu móti. Ég er líka búin að slökkva undir pottinum með nautatungunum, balsamedikkryddaða lambalærið er að fara í ofninn og á eftir steiki ég kjúklingalifrarnar í patéið. Svo set ég hörpuskelina og rækjurnar sennilega í maríneringu um miðnætti en annað bíður trúlega bara til morguns.

Það er semsagt nóg til og ég vil helst ekki þurfa að sitja uppi með mikla afganga - frystiskápurinn nærri fullur og svona - þannig að ég er að vona að það verði ekki stórhríð eða eitthvað og enginn komi.

Já, og þeir sem koma og hafa ekki komið áður: Gestirnir koma í bylgjum, stundum fyllist allt og stundum er eiginlega bara ég - ekki vera feimin ef þið komið þegar er fámennt. Það hittist bara svona á.

Hausinn af E.T.

Þorláksmessulærið er eins og sjá má komið í pottinn. Þar fær það að malla næstu 6-8 tímana og svo endar það í ofninum smástund þegar ég er búin að flá af því pöruna og spikið. Það lítur allavega nokkuð efnilega út. Ekki eins og hausinn af E.T. um árið ...

Búin að kaupa jólagjafirnar, nema kannski eina smáviðbót. Búin að kaupa svo til allar jóla- og Þorláksmessuveitingarnar. Mundi eftir jólavíninu. Keypti jólafötin í nóvember. Á eftir að baka eitthvað og elda helling en það er allt undir kontról. Búin að kaupa sogskálafestingar í staðinn fyrir þessar sem ég fann aldrei (en finn örugglega í tiltekt í kvöld) svo að ég get klárað að festa upp seríurnar. Búin að taka til - nei. En byrjuð. Alveg satt.

Hverju er ég að gleyma?

Bakað í beinni

Jæja, mér tókst að baka piparkökur í beinni útsendingu án þess að kveikja í eða brenna þær við. Eða skera í sundur einhvern kapal, eins og vinnufélagar mínir voru búnir að spá eftir að ég sargaði sundur brauðristarsnúruna á dögunum og sló út rafmagninu. Þeir sögðust mundu vita hvað hefði gerst ef skjárinn hjá þeim yrði skyndilega svartur ...

Ég meiraðsegja klúðraði held ég bara engu. Var þó með varadeig sem ég hafði gert heima oní poka en þurfti ekki að grípa til þess og Boltastelpan, sem var í áhorfendahópnum (og fannst óstjórnlega fyndið að sjá ömmu sína málaða) fékk það með sér heim að baka piparkökur úr. Ekki baka ég meiri piparkökur fyrir þessi jólin. (Reyndar má geta þess að ég þurfti að gera varadeigið tvisvar því að ég klúðraði því fyrra - áttaði mig á þegar ég var búin að hnoða það að ég hafði steingleymt matarsódanum.)

Ég var nú ekki alveg viss hvort þetta gengi upp hjá annarri eins flumbru og mér. En það er gaman að taka sénsa. Held að ég hafi ekkert eyðilagt matargúrúsorðstírinn.

Ekki í þetta skipti.

Þollákur

Bara svona til áminningar fyrir þá sem skoða ekki tölupóstinn sinn aftur fyrr en eftir jól - það er opið hús hjá mér á Þorláksmessu eins og venjulega, frá því svona um kaffileytið eða fyrr og framundir miðnætti eða lengur. Allir velkomnir náttúrlega. Það er spáð hríðarveðri á Þorláksmessu að ég held - tilvalið að koma og hlýja sér og fá kaffisopa og aðrar veitingar, léttar og þungar, sætar og ósætar.

Ég er að vísu ekkert byrjuð að undirbúa neitt (nema skinkuna) en það er bara eins og vanalega og það reddast. Frídagur á morgun og allt - hér í gamla daga var ég nú stundum að vinna fram yfir hádegi á Þorlák og þetta gekk samt (en líklega komu aðeins færri þá).

Ég á ekki sérstaklega von á neinum sjónvarpsmönnum í ár, þeir útvarpsmenn sem kunna að koma verða væntanlega hljóðnemalausir, Skari skrípó sýnir ekki börnum töfrabrögð og einkasonurinn er að vinna og verður ekki með uppistand, þannig að gestir verða að skemmta sér sjálfir.

Ég á ekki von á öðru en það takist ágætlega.

Kaffikrókaleiðir

Mér datt áðan í hug eitthvað arfabrilljant sem ég ætlaði endilega að blogga um en ákvað að fá mér kaffi fyrst. Til að fá sér kaffi þarf maður (þessa stundina a.m.k.) fyrst að fara út um svaladyrnar á ritstjórnarskrifstofunni og yfir sólpallinn, inn um svaladyrnar á hinu húsinu, gegnum skrifstofuna og þar niður hringstiga sem liggur niður í Arnarhreiðrið, þar sem kaffistofan er. Persónulega finnst mér þetta nú bara heimilislegt og minnir mig á gamla daga hjá Iðunni - að vísu þurfti maður þar ekki milli húsa til að ná í kaffi, bara milli hæða, en það var svosem ekki hefðbundið skrifstofuhúsnæði heldur - fyrir utan það að maður er ekkert að drekka alltof mikið kaffi þegar það er aðeins meira fyrirtæki en að rölta nokkra metra að kaffivélinni.

Eníveis, þá komst ég nú ekki svo langt því að á skrifstofunni var ég sjanghæuð í að pakka nokkrum Arnöldum og Einörum og fleiru í jólapappír fyrir eitthvert fyrirtæki sem hafði orðið seint fyrir með jólagjafirnar. Og þegar því lauk var ég auðvitað búin að steingleyma þessu sniðuga sem ég ætlaði að skrifa um, það verður að bíða. Gleymdi meira að segja næstum því að fá mér kaffi.

En þó ekki alveg.

Órólegur Trönuber Sósa

Hvað er þetta ???

... eða af hverju ekki á að nota þýðingarforrit á netinu til að þýða uppskriftir:

,,Blanda fylling rækilega og fylla the nautakjöt, hver öxl vera fimm eða sex tomma þykkur, með kross cuts helmingur vegur í gegnum Fylla þessir, hver öxl vera á báðir hlið, áríðandi the fylling in. Binda umferð a sterkur stykki af mússulín til bíddu við fyrirtæki, og hella yfir það a bolli af edik, helmingur á hvor hlið Láta það standa fjörutíu- átta óratími Það öxl vera rennismiður og the áfengi skaftausa yfir það, svo eins og til rækilega liggja í bleyti in. Steikja tveir óratími, fyrstur hálftími afhjúpa í mjög heitur ofn, hvíla af tími þakinn, fíkniefnasjúklingur a lítill erfiðleikar hvenær nauðsynlegur Það er óákveðin greinir í ensku framúrskarandi sumar fat og minjagripur a langur tími ( gera brúnn kjötsafi)"

Þetta er úr uppskriftinni Nautakjöt a söngheiti tóns háttur, sem mundi trúlega útleggjast á ensku sem Beef a la mode. Fatta ekki alveg þetta með fíkniefnasjúklinginn ...

Misjafn smekkur

Dótturdóttirin sat hér um helgina. Rakst á matseðil úr einu af matarboðunum mínum og fór að lesa hann. Var ekkert mjög impressed á svipinn.

Amman: -Á ég að bjóða þér í svona tíu rétta matarboð einhverntíma?

Boltastelpan: -Nei takk. En amma, viltu nokkuð bjóða mér í kálböggla bráðum?

Brussan

Mér tókst áðan að skera niður vínirbrauðslengju með svo miklum tilþrifum að ég skar í sundur snúruna á brauðristinni og sló út rafmagninu á kaffistofunni.

Þetta veit ekki á gott.

Ef ég kæmist upp með það myndi ég reyna að forðast eldhússtörf næstu daga. En það gengur víst ekki upp.

Þannig að ég er við öllu búin.

Jólalegt í ísskápnum

Ég rölti upp í Nóatún áðan og kom aftur klyfjuð nautatungum (fyrir Þorláksmessuboðið), andalifrarkæfu (nehei, tími henni ekki í Þorláksmessuboðið), þurrkuðum sveppum, andakrafti (hljómar það ekki svolítið dulrænt?) og einhverju fleira gourmet-dóti. Það er að verða pínu jólalegt í ísskápnum (ekki síst út af hangikjötslyktinni). Svo þarf ég bara að pússa Stilton-spaðann og svona.

Verst með jólatiltektina. Ég var að hugsa um að leysa það mál bara með því að færa dót á milli herbergja - en til að það gengi upp þyrfti ég að hafa einhvers staðar ónotað aukaherbergi, svo að líklega verð ég að grípa til annarra ráða. Til dæmis að taka til ...

Kannast einhver við makkarónusalat sem þessi lýsing gæti átt við?

Allt undir jólakontról

Ég er farin að halda að þetta verði stresslausustu jól ever. Annaðhvort það eða ég er að gleyma einhverju ... stóru.

Jólagjafirnar - nokkurnveginn á hreinu. Keyptar eða ákveðnar.

Jólabaksturinn - kominn vel af stað með hjálp barnabarnanna.

Jólatiltektin - já. Einmitt. Það reddast.

Jólamaturinn - ákveðinn og til í frysti að mestu. (Þarf að muna að kaupa vínið samt.)

Jólatréð - var keypt í dag.

Jólakortin - löngu hætt að nenna því veseni.

Jólaskreytingarnar - eru að koma upp smátt og smátt samkvæmt óskum barnabarnanna. (Nema ég er enn ekki búin að finna sogskálafestingarnar fyrir seríurnar.)

Jólaskapið - kemur á Þorláksmessu.

Þorláksmessuveitingarnar - verða útbúnar á síðustu stundu eins og venjulega. Nema auðvitað skinkan, en hún er í góðum gír á svölunum (allavega er tunnan ekki fokin enn).

Sem sagt, allt undir kontról.

Nema ég sé að gleyma einhverju.

Safnarinn

Þegar við Sauðargæran röltum út í Bónus á laugardaginn til að kaupa hveiti í smákökubaksturinn var ég að þýfga hann um hvað hann vildi fá í jólagjöf. Byrjaði á að spyrja hann hvort hann vildi ekki buxur, vesti, brók eða skó ... Hann neitaði því öllu staðfastlega og sagði:

-Nei, mig vantar það ekki.

Fékk svo leið á spurningunum og sagði:

-Amma, mig vantar eiginlega bara dót.

-Engar bækur? spurði ég.

-Juuuú, kannski vantar mig nokkrar bækur. Ég er sko að safna bókum.

(Hann hefur allt annað viðhorf til bóka en systir hans, sem er þeirrar skoðunar að bækur séu leiðinlegar og óþarfar að mestu en slengdi þó fram nokkrum völdum frösum úr Íslandsklukkunni við jólabaksturinn um helgina.)

-Já, og svo vantar mig bolta, ég er líka að safna boltum.

-En áttu ekki bara einn, fótboltann sem ég gaf þér í fyrra? spurði ég.

-Jú, en ég er samt að safna.

Einhvers staðar verður maður víst að byrja söfnunina, það er alveg rétt.

En ætli ég gefi honum ekki dót fyrst hann bráðvantar það. Og kannski eins og eina bók eða tvær.

Umhverfisverndarsinninn

Ég kom við í vinnunni hjá einkasyninum áðan og fékk hjá honum tvöfaldan cappuccino. Sagði honum meðal annars að ég væri að plana að gerast umhverfisverndarsinnaðri en ég hef verið hingað til, fara að tilmælum norsku umhverfisverndarsamtakanna og ganga í efnisminni fötum en ég þó geri. Einkum og sér í lagi nærhöldum.

Honum svelgdist á límonaðinu sínu.

En mér finnst þetta helvíti fín hugmynd. Nú nota ég frekar stór númer af fötum og er þar af leiðandi ekki nógu umhverfisvæn en get bara bætt það upp með því að hafa þau enn flegnari og nærskornari en ég er vön.

Sem er bara hið besta mál.

Kökubakstur og fyrirspurnir

Ég og barnabörnin erum búin að vera að baka smákökur um helgina. Sauðargæran bakaði sjóræningjapiparkökur, ég bakaði hnetu- og núggatkökurnar sem ég er búin að baka fyrir hver jól síðustu 25 árin eða svo (einu kökurnar sem ég baka undantekningarlaust) og Boltastelpan bakaði allt hitt. Enda bakarísstarfskraftur og forfrömuð í kökugerð.

Allt gekk þetta vel en piparkökubakarinn tilkynnti í miðju kafi ,,ég nenni ekki að baka fleiri piparkökur", settist við tölvuna og fór á leikjanet.is. Örugglega til að leita uppi berstrípað kvenfólk sem nú er búið að auglýsa að hægt sé að finna þar ef vel er leitað. Eftir það fækkaði sjóræningjapiparkökunum (gerðum með sérstöku sjóræningjapiparkökumóti sem Sigga systir færði mér í sumar) umtalsvert og hefðbundnari piparkökuform tóku við.

Jólamatarfyrirspurnaþjónusta Nönnu verður að mestu rekin á Nóatúnsvefnum í ár en það er eftir sem áður alveg óhætt að koma með spurningar hér.