(function() { (function(){function c(a){this.t={};this.tick=function(a,c,b){var d=void 0!=b?b:(new Date).getTime();this.t[a]=[d,c];if(void 0==b)try{window.console.timeStamp("CSI/"+a)}catch(l){}};this.tick("start",null,a)}var a;if(window.performance)var e=(a=window.performance.timing)&&a.responseStart;var h=0=b&&(window.jstiming.srt=e-b)}if(a){var d=window.jstiming.load;0=b&&(d.tick("_wtsrt",void 0,b),d.tick("wtsrt_","_wtsrt", e),d.tick("tbsd_","wtsrt_"))}try{a=null,window.chrome&&window.chrome.csi&&(a=Math.floor(window.chrome.csi().pageT),d&&0=c&&window.jstiming.load.tick("aft")};var f=!1;function g(){f||(f=!0,window.jstiming.load.tick("firstScrollTime"))}window.addEventListener?window.addEventListener("scroll",g,!1):window.attachEvent("onscroll",g); })();

Konan sem kyndir ofninn sinn

Eldhúsreyfarar miðaldra matargúrús á Skólavörðuholtinu

16.3.07

Súkkulaðihvað??

Fyrr í vikunni fékk ég tilkynningu um tvær tollskyldar sendingar sem Pósturinn vildi fá leyfi til að opna í leit að reikningi. Allt í lagi með það, ég á enn eftir að fá eitthvað af því sem ég keypti á Ebay á dögunum svo að ég undirritaði þetta og faxaði uppeftir.

Þegar ég kom heim í dag beið aftur umslag frá Póstinum og í því tvö bréf þess efnis að viðkomandi sendingar hefðu verið opnaðar og ekki innihaldið reikning. Allt í lagi með það, ég faxa þá bara Payal-reikning eða Ebay-síðu eða eitthvað uppeftir. Nema bara ...

Í öðru bréfinu stóð: Sendingin hefur verið opnuð og innihélt hún ekki vörureikning. Í pakkanum er: SÚKKULAÐI.

Súkkulaði???

Ég hef sko ekki verið að panta mér neitt súkkulaði frá útlöndum. Né átti ég von á súkkulaðisendingu. Svo að ég veit ekki hvernig ég á að framvísa reikningi fyrir þetta súkkulaði.

Tveir möguleikar: 1) Einhver óþekktur erlendur aðdáandi veit að ég á merkisafmæli í næstu viku og er að senda mér súkkulaði í afmælisgjöf. En þar sem jafnframt kemur fram að pakkinn er bara 160 g er þetta líklega bara eitt súkkulaðistykki. Það finnst mér hálfnaumt ef menn eru að senda súkkulaði milli landa á annað borð.

2) Þetta er alls ekki súkkulaði, heldur einhver smámunur af Ebay sem seljandinn hefur sett súkkulaðiumbúðir utan um til hlífðar og þau hjá Tollmiðlun hafa ekki haft fyrir að skoða almennilega.

Ætli ég verði ekki að hringja uppeftir á mánudaginn og biðja um að það verði tékkað betur á þessu.

(Hin sendingin segir Pósturinn að sé kökudiskur. Ég geri ráð fyrir að það sé hnetudiskurinn sem ég pantaði; á ekki von á að nokkur maður þarna uppfrá þekki sundur kökudisk og hnetudisk. Sem er þó allt annar hlutur.)

|

15.3.07

Buxur og strekkingar

Móðirin: -Ég ætti kannski að fá mér svona buxur.

Sonurinn (virðir fyrir sér myndina á skjánum): -Já. Það er þín ákvörðun. Ég ætla ekki að koma nálægt henni.

Annars var ég að átta mig á því að konan í þessari auglýsingu, sem Denni birtir líka, minnir ótrúlega mikið á frú Rynke-Strithår-Vortesen þegar Andrés Önd tók hana í meðferð á snyrtistofunni sinni. Kannski ætti ég annars að panta mér svona meðferð í tilefni af fimmtugsafmælinu.

Kannski.

|

14.3.07

Fyrir súkkulaði- og hindberjavini

Æi, er ekki bara kominn tími á eina uppskrift? Engin andskotans spelt-hollusta í þetta skipti. En það er ekkert verra að hafa vanilluskyrsósu út á til að vega upp á móti sykrinum og súkkulaðinu. Hún er náttúrlega bráðholl ... er það ekki?


Hindberja-súkkulaðikökubitar


200 g smjör
200 g suðusúkkulaði
275 g púðursykur
4 egg, meðalstór
1 tsk. vanilluessens
200 g hveiti
25 g kakóduft
½ tsk. lyftiduft
225 g hindber, frosin


Hitaðu ofninn í 200°C. Smyrðu ferkantað form, um 18x25 cm, og klæddu botninn með bökunarpappír (eða notaðu sílikonform).
Settu smjörið í pott, brjóttu súkkulaðið í bita og settu það út í. Hitaðu gætilega og hræðu þar til súkkulaðið er bráðið. Taktu pottinn þá af hitanum og láttu blönduna kólna svolítið. Hrærðu saman púðursykur, egg og vanilluessens og þeyttu svo súkkulaðiblöndunni saman við. Sigtaðu hveiti, kakó og lyftiduft yfir og hrærðu þar til deigið er slétt. Helltu deiginu í formið, sléttaðu úr því og stráðu frosnum hindberjunum jafnt yfir. Bakaðu kökuna á næstneðstu rim í 30-35 mínútur, eða þar til hún er nærri stífnuð en þó ekki alveg. Taktu hana þá út og láttu hana hálfkólna í forminu. Skerðu hana svo í bita. Berðu kökurnar fram volgar eða kaldar, t.d. með þeyttum eða sýrðum rjóma, ís eða vanilluskyrsósu.

Vanilluskyrsósa:
1 dós (200 g) KEA vanilluskyr
125 g mascarponeostur, mjúkur
2 msk. flórsykur, eða eftir smekk


Hrærðu vanilluskyr, mascarponeost og flórsykur saman þar til blandan er alveg slétt. Ef óskað er eftir þynnri sósu má bæta við svolitlum rjóma.

|

Ekki allt búið enn

Ég þarf eiginlega að fara að klára flutningana. Eða öllu heldur, ég þarf að fara að taka upp úr kössum sem ég henti inn í skáp í vinnuherberginu þegar ég flutti og hafa verið þar síðan. Byrjaði reyndar á því áðan og fann þá náttúrlega fyrst af öllu drullusokkinn minn, sem mig var búið að sárvanta. Fáeinum dögum eftir að ég keypti mér nýjan.

Jæja, maður á aldrei of mikið af drullusokkum. Nema líklega er best að ég arfleiði einkasoninn að þeim gamla. Hann á engan drullusokk.

Svo fann ég nokkur herðatré, en það kom mér ekkert á óvart.

Ástæðan til þess að ég er að þessu núna er að mig vantaði pláss fyrir öll matreiðslutímaritin sem ég fór með yfir á Bístró í flutningunum í haust og ætlaði að geyma þar. En það gengur náttúrlega ekki lengur og þess vegna kom Gísli Egill með allt heila klabbið í gær. Ég sagði honum að ég hefði lært af reynslunni og ætlaði ekki að koma mér upp mínu prívat bóka- og blaðasafni á nýjum vinnustað. Hann glotti.

Ég er allavega ekki búin að fara með neina bók héðan í vinnuna enn. Held ég.

|

13.3.07

Brúðarkjólabál

Já, ég veit nú ekki með þetta ... Þótt ég sé fráskilin gæti ég ekki kveikt í brúðarkjólnum mínum þótt ég fegin vildi; ég gifti mig kasólétt í rauðum kjól af Gunnu systur (sem nota bene átti mörg ár eftir í að verða ólétt sjálf og var mun grennri en ég svo að ég man ekki alveg hvernig á því stóð að hún átti giftingartækan óléttukjól). Reyndar held ég að ég hafi ekki skilað kjólnum en hann er allavega löngu horfinn.

Þótt ég ætti kjólinn tæki því heldur ekki að brenna hann. Það er svo langt síðan ég skildi að ég er eiginlega búin að gleyma hvernig maðurinn sem ég var einu sinni gift leit út (og væri örugglega búin að því ef einkasonurinn væri ekki eins og snýttur útúr nösinni á honum). Það er hátt í það eins langt síðan George Clooney skildi við sína konu svo að mér finnst að hún ætti nú að fara að jafna sig á þessu - jæja, það er kannski erfiðara fyrir hana að gleyma hvernig Goggi lítur út. Svo er hún meiraðsegja löngu gift aftur svo að mér finnst að hún ætti nú að fara að jafna sig á þessu.

Nema Mogginn hafi misskilið eitthvað. Það væri þá ekki í fyrsta skipti.

|

Ljúfa lífið

Nóg að gera þessa dagana. Sem er bara alveg ljómandi ágætt, það rifjaðist upp fyrir mér um daginn hvað mér leiðist iðjuleysi skelfilega mikið.

Eitthvað kemur matargerð við sögu í sumu af því sem ég er að fást við þessa dagana. En ýmislegt fleira líka. Það er gott; ykkur að segja var ég orðin dálítið leið á að fást bara við mat. Ekki að ég sé búin að missa áhugann á mat, neinei - en það er gott að fleira fljóti með.

Það er heil vika þangað til ég kemst á sextugsaldurinn. Best að nota hana til að rasa almennilega út. Kannski ég skreppi á Vínbarinn fljótlega ...

Og svo er ég meira að segja búin að vera góð í hnénu í heila tvo daga í röð.

Núna vantar mig bara nýja eldavél (sem ég hef reyndar ekki efni á akkúrat núna af því að mig langar í svo flotta vél) og lipran mann til að skipta um leka eldhúskranann. Þá væri lífið fullkomið.

|

11.3.07

Kannski óþarfar upplýsingar ...

Ég er enn að skoða dót á Ebay og þar rakst ég á þessa lýsingu:

Pair 1940's EPNS grapefruit spoons in original box.

belonged to my great aunt fiona,who never used them due to the fact she had no teeth.


Annars staðar á síðu sinni lætur seljandinn þess getið að Fiona frænka hafi verið ,,an avid collector of pigs".

|

Fallnir félagar ...

Ég var að leita að netfangi hjá gamalli samstarfskonu áðan og rakst þá inn á leitarvélina nn.is, sem ég hef aldrei notað en þarna stendur ,,nn.is finnur fólk og fyrirtæki". Allt í lagi með það nema á þessari síðu voru taldir upp starfsmenn Birtíngs útgáfufélags og ég vissi fyrir víst að þessi tiltekna kona hafði aldrei unnið hjá því, var hætt löngu fyrr en það kom til.

Þegar ég fór að skoða listann sá ég að þótt þetta ætti að heita listi yfir starfsmenn Birtíngs var þetta í raun og veru 4-5 ára gamall listi yfir starfsmenn Fróða heitins - mér sýndist á nöfnunum að listinn væri frá því seint á árinu 2002, sé að ég er talin starfsmaður Gestgjafans og Iðunnarfólkið flest horfið sjónum en söludeildin samt eftir ... Ég held að það séu um 115 nöfn á listanum. Af þeim eru líklega um 15 sem enn vinna hjá Birtíngi.

Ég held að slagorð nn.is ,,finnur fólk og fyrirtæki" standist ekki alveg. Ekki hvað fólkið varðar að minnsta kosti.

En listinn hjálpaði mér svosem að muna eftir mörgu góðu fólki sem ég hef unnið með.

|