Farin

Ég vissi að Mogginn mundi ekki klikka. Ég er semsagt að fara úr bænum af því að mér var boðið í mat; kem aftur á morgun.

Svo minni ég á að í dag eru fjörutíu ár síðan hann Gísli Egill fæddist norður á Kópaskeri. (Ég er nýbúin að uppgötva þetta með Kópasker, þess vegna get ég ekki sleppt því að nefna það.)

Enn og aftur til hamingju, Gísli minn. Í tilefni dagsins lofa ég að bögga þig ekki meira í dag (en það er nú bara af því að ég er að fara úr bænum).

Ég lofa líka að reyna að verða ekki veðurteppt.

Pepperónípítsusúpa

Hmm. Sennilega hef ég ekki valið réttu helgina til að leggjast í ferðalög út á land. Jæja, sjáum til á morgun. Mogginn segir að það eigi að létta til; ekki lýgur hann.

Ég rakst áðan á uppskrift að ,,chicken fried steak ice cream". Þar er komin matargerðartilraun sem mig langar bara ekkert að spreyta mig á. Beikon-og-eggjaís, allt í lagi. En það eru takmörk.

Mér líst skár á uppskriftina að pepperónípítsusúpu, sem ég fann við sama tækifæri. Gæti jafnvel virkað. Virtist meira að segja alveg þokkalega girnileg. Akkúrat það sem mann vantar í svona veðri.

Kannski helli ég mér út í matargerðartilraunir á þessum nótum þegar jólablað Bístrós er farið í prent. Æi, nei, þá er það Lundúnaferðin sem ég þurfti að fresta. En í desember ...

Eða kannski ekki.

Steikur, barferðir og þvottar

Þetta reddaðist nú allt með steikina og útvarpsviðtalið. Steikin var í fínu formi þegar ég kom aftur og hafði passað sig bara ljómandi vel sjálf. Eins og þægar og góðar steikur eiga að gera.

Eftir steikarmyndatökuna og fleira var ég í skapi til að fara á Vínbarinn. Dró einkasoninn með mér og bauð honum svo upp á sushi á Ósushi á eftir. Ljómandi gott bara.

Nú erum við að fara á Grettisgötuna að þvo þvott og baða einkasoninn. Það er að segja, ég þvæ þvottinn, drengurinn baðar sig sjálfur. Það er nefnilega ekki enn komið baðker í íbúðina á Kárastígnum.

Skipulagshæfileikar Nönnu, 114. kafli

Ég var að átta mig á því að ég er búin að bóka myndatöku á stórsteik á eftir en skömmu áður þarf ég að vera í útvarpsviðtali í beinni ... æi, jæja, steikin passar sig nú líklega sjálf að mestu og Sóla getur sjálfsagt haft auga með henni. Vonandi.

Þarf líklega að fara að koma mér upp dagbók til að draga úr líkum á árekstrum. Nema ég mundi örugglega alltaf gleyma að skrifa í hana.

Kampavínsstuðullinn

Snilldarvinna sem ég er í.

Hár kampavínsfaktor allavega. Sem er stór kostur.

Akkúrat það sem ég þurfti á að halda eftir að hafa útbúið tíu eða ellefu rétti fyrir myndatöku í dag.

Svo fékk ég svo skemmtilegt matarboð í dag - eða ég fékk það í gær en þáði það eftir að vera búin að skoða veðurspána. Meira um það seinna.

Nú ætla ég nefnilega að snúa mér að því sem afgangs er af kampavíninu.

Rummy, Saddam og Skagfirðingar

Það er ekki ólíklegt að ég hafi nefnt það áður en alltaf þegar ég sé Donald Rumsfeld í sjónvarpi - það verður víst sjaldnar héðanaf - þá detta mér í hug Vesturíslendingarnir sem voru að koma í Djúpadal til að heimsækja Stebba frænda þegar ég var krakki. Ekki að hann sé endilega líkur neinum þeirra - Sigga frá Sæpress eða hvað þeir nú hétu, blessaðir - en það er eitthvað svo óendanlega miðvesturamerískt við hann, rétt eins og þá. Veit þó ekki til þess að hann sé ættaður úr Blönduhlíðinni, held að hann sé af norðurþýskum ættum.

Ég fæ samt aldrei á tilfinninguna að hann sé skyldur mér, eins og þegar ég sé mynd af Saddam Hussein bregða fyrir. Það er að segja eins og hann er núna, ég tók aldrei eftir þessu áður fyrr, en mér finnst hann alltaf vera einn af frændum mínum úr föðurætt. Af Skatastaðaættinni nánar tiltekið. En ég veit ekki til að Sveinn langafi eða neinn ættingi minn hafi verið að þvælast í Mesópótamíu á fjórða áratugnum svo að það stemmir víst ekki.

Það er samt ekkert út af ímyndaðri frændsemi sem mér finnst hreint grábölvað að það eigi að fara að hengja karlinn. Ég er bara almennt frekar á móti því að drepa fólk. Líka þótt það hafi þannig séð til þess unnið, allavega ef lög Hammúrabís gilda enn í Írak.

Þegar ég sé George W. Bush dettur mér aftur á móti enginn í hug. Ekki nokkur einasti maður ...

Skrepp

Einn af mörgum kostum við að vinna bæði og búa í miðbænum er að það er ekki lengur - fyrir bíllausa manneskju - meiriháttar verkefni að fara í klippingu, fara til læknis ... Þegar ég var að vinna uppi á Höfða varð ég að reyna að fá tíma í klippingu klukkan hálfsex og samt fara úr vinnunni fyrir tímann til að ná strætó. Ef ég þurfti til læknis (sem blessunarlega var ekki oft) þurfti ég að reyna að fá fyrsta tíma á morgnana og koma samt ekki í vinnuna fyrr en eftir dúk og disk. Ef ég þurfti nauðsynlega að sinna einhverjum erindum á miðjum degi tók það lágmark hálfan annan til tvo klukkutíma. Ég veit ekki með aðra en ég á bágt með að hlaupa úr vinnunni í eigin erindum langtímum saman, svo að þetta þýddi þá bara að ég vann frameftir í staðinn einhverja daga. Sem maður þurfti svosem að gera hvort eð var þegar mikið var að gera og fékk aldrei borgað ...

Núna er ég einmitt að fara í klippingu á eftir en það er bara hér á Skólavörðustígnum og tefur mig ekki nema í mesta lagi hálftíma. Sem ég er í litlum vandræðum með að vinna af mér. Búin að því reyndar.

Eins gott, það er nóg að gera í stórsteikunum og jólamatnum þessa dagana og ég má ekki vera að því að tefja mig frá þeim með löngum skreppum. En ég held að mér sé alveg óhætt að lofa flottu jólablaði.

Jamie og trúleysið

Bækurnar sem koma upp á meðmælalistanum mínum hjá Amazon.co.uk eru stundum - ja, ég sé ekki alveg af hverju.

Ég sé að núna er mælt með The God Delusion eftir Richard Dawkins. Allt í lagi með það, ábyggilega afbragðsbók og ég er örugglega sammála flestu sem í henni stendur - en ástæðan sem er gefin er þessi: ,,Recommended because you added Cook with Jamie: My Guide to Making You a Better Cook to your Shopping Basket."

Hmm ... ?

Brúðkaupsafmæli

Ég á víst brúðkaupsafmæli í dag. Held ég sé nú ekkert að halda upp á það, ég hélt jú upp á silfurbrúðkaupið í Búrgundarferðinni í fyrra ... Samt ákvað ég að fá mér sérríglas í tilefni dagsins. Eða þannig. Eða reyndar þarf ég að klára þessa lögg sem eftir er í sérríflöskunni til að rýma til á barnum.

Ég þarf víst að fara í Ikea einhvern allra næstu daga og kaupa af þeim tíu Billya. Ég er reyndar ekki viss um að matreiðslubókasafnið rúmist í tíu Billyum en ég hef ekki pláss fyrir meira í bili - eða jú, ég hef það kannski en ég vil ekki kaupa fleiri fyrr en ég er búin að koma mér almennilega fyrir. Þá get ég hent bókunum upp í skápa um helgina og losnað við alla þessa kassa af gólfunum (og þá fyrst get ég snúið mér að því að kaupa stofuhúsgögnin). Röðun og flokkun verður að bíða betri tíma. Að ég tali nú ekki um aðkallandi endurskrásetningu á safninu.

Svo á ég nú alveg slatta af bókum sem ekki eru matreiðslubækur þótt mér hafi tekist að fækka þeim töluvert. Ekki nóg samt, kannski ætti ég að auglýsa annan ókeypis bókamarkað.

Ég ætla samt ekki að beita þeirri aðferð til að rýma til á barnum. Það verður enginn ókeypis búsmarkaður hér, bara svo þið vitið það.

Fyrirspurnir

Það er eitthvað svo gaman í vinnunni þessa dagana ...

Eins og tryggir lesendur Bístrós (hmm, ókei, tilvonandi tryggir lesendu ...) hafa tekið eftir verð ég með þátt sem heitir Spyrjið Nönnu. Ég hef náttúrlega verið með þannig hér á blogginu árum saman - en ef ykkur vantar upplýsingar um eitthvað, ég tala nú ekki um ef það varðar hátíðamatinn, sendið mér þá endilega tölvupóst á nanna (at) bistro.is. Ég lofa ekkert endilega að svara því strax, það er svolítið mikið að gera þessa dagana - en fyrr eða síðar allavega. Í síðasta lagi í jólablaðinu.

Ég reyni jú að vera ávallt viðbúin.

Tækjavæðing

Komin með tölvu heima. Imac 17 tommu, alveg eins og ég er með í vinnunni.

Fyrst ég var í tækjakaupaleiðangri (með gagnlega barninu og Sauðargærunni, sem sýndi málinu mikinn áhuga) keypti ég sjónvarp í leiðinni. 28 tommu Thompson sem ég fékk á tæp 23 þúsund. Dugir mér alveg ágætlega næstu árin, hugsa ég.

Ég er semsagt komin í netsamband (augljóslega) en þegar ég ætlaði að fara að ná í tölvupóstinn minn sem komið hefur á gamla netfangið að undanförnu kom upp úr dúrnum að ég man ekki með nokkru móti passwordið mitt. Prófaði öll lykilorð sem ég man eftir að hafa nokkru sinni notað (og þau eru þónokkur) en allt kom fyrir ekki. Hringdi í þjónustuver Símans til að fá aðstoð en þar var ég númer 29 á biðlista. Nennti nú ekki að standa í því í bili.

Þá eru tækin komin, nú eru mublukaupin næst. Hmm.

Tölvumál

Ég er tölvusnillingur. Edda segir það og það hlýtur að vera rétt.

Eða ég vildi að það væri rétt því að nú þarf ég að fara að drífa í því að kaupa mér nýja tölvu í staðinn fyrir þá sem Birtíngur hirti af mér. Annars verð ég nefnilega í vinnunni átján tíma á sólarhring á næstunni. Mætti halda að ég hefði aldrei flutt af Kárastígnum.

Ég verð reyndar örugglega að vinna átján tíma á sólarhring hvort eð er en það væri skárra að geta verið einhvern hluta af því heima hjá sér.

Ég reikna fastlega með að fá mér makka núna. Kann ágætlega við þennan.

Mér tókst þó allavega að skila af mér bókarhandritinu seint í gærkvöldi eftir að hafa setið hér allan daginn. Fyrir utan formálann reyndar. Æijá. Verð víst að skrifa hann í kvöld ...

Já, ég verð greinilega að fara að gera eitthvað í tölvumálunum.

Fokald

Ég fauk nú ekkert hingað í vinnuna í morgun en það komu hressilegar kviður þegar ég var á leið upp Frakkastíginn. Af Njálsgötunni heyrðust einhverjir dularfullir skruðningar sem ég ákvað að vera ekki að leita skýringar á. Í bakgarðinum hjá mér var eitthvert dót sem örugglega var ekki þar í gær. En ég mætti engu fokaldi (getur maður ekki sagt fokald rétt eins og rekald?) nema einni bjórflösku sem kom skoppandi á móti mér upp Laugaveginn, þó ekki með neinum sérstökum látum. Skammt á eftir henni kom par sem leit út eins og það hefði lent í miklum og ströngum stormum en ég veit ekki hvort bjórflaskan var á þeirra vegum.

Laugavegurinn er reyndar ekki alveg beinasta leiðin fyrir mig í vinnuna af Grettisgötunni en ég ákvað að fara í Sandholt að kaupa mér eitthvað með morgunkaffinu. Sé fram á langan dag í dag - reyndar ekki Bístró viðkomandi, ég þarf að sinna öðru og er enn tölvulaus heima, því er nú fjandans verr. Þarf að fara að bæta úr því. Og sjónvarpslaus að mestu, en það gerir nú minna til, ég má ekkert vera að því að horfa á sjónvarp þessa dagana.