Hvað er þetta eiginlega?

Ég átti smáerindi í Kringluna í dag. Kíkti í leiðinni á útsöluna í Hagkaupum og fann nokkra smáhluti sem mig bráðvantaði (ja ...). Svo rak ég augun í snotran borðdúk sem var á 70% afslætti sem jóladót þótt þetta væri ekkert endilega jóladúkur (allavega engin hreindýr eða stjörnur eða jólatré á honum) og mundi þá að allir stærri dúkarnir mínir eru í ,,dót sem þarf að strauja"-hrúgunni og ég er ekkert á leiðinni að nenna að strauja svo að ég reddaði málinu með því að kaupa bara nýjan dúk. Svona ef ég skyldi sjá ástæðu til að dúka borð á næstunni.

Spurning samt með að nota tækifærið og horfa á áramóta-Silfrið hjá Agli og strauja á meðan. Silfrið hentar vel fyrir straujun, það er reynsla fyrir því. Ég hef bara ekki horft á Silfrið nýlega og þarafleiðandi ekki straujað.

En allavega, þar sem ég stóð við kassann að borga varð ég vör við einhverja panik hjá stelpunni sem var að afgreiða á kassanum við hliðina. Svo kom hún til þeirrar sem var að afgreiða mig með eitthvað í höndunum, sýndi henni það og spurði: -Hvað er þetta eiginlega? Er hægt að borga með svona? Má ég taka við þessu?

-Jaaaá, þetta gildir nú alveg, sagði hin.

-En hvernig geri ég? spurði sú fyrri.

-Æi, það hef ég ekki hugmynd um, sagði hin. -Aldrei fengið svona. Bíddu, ég ætla að ná í (x). Hann kann allt.

Svo lauk hún við að afgreiða mig og fór svo að leita uppi manninn sem kunni allt. Meira að segja að taka við greiðslu með ávísun.

Gúrúið í stuði

Ég er að ofnsteikja nokkra skammta af kjötbollum sem hver um sig þarf um 15 mínútur í ofni. Áðan setti ég - eftir að hafa gert hlé á steikingunni - nýja kjötbolluplötu í ofninn, stillti ofnklukkuna og fór að sjóða linsubaunir og kjúklingalæri og gera ídýfur og fleira á meðan bollurnar steiktust. Svo hringdi klukkan, ég opnaði ofninn - en það kom engin hitabylgja á móti mér og bollurnar voru undarlega bleikar.

Ég hafði gleymt að kveikja á ofninum.

Svo er ég að þykjast geta ráðlagt fólki um eldamennsku.

Fuglar á hraðferð og brúðkaupsveislur

Fór áðan í Kokku til að skipta þessari einu gjöf sem ég þurfti að skipta - ég var reyndar mjög ánægð með gjöfina en það vildi svo til að ég átti þráðlausan kjöthitamæli fyrir. Var reyndar lengi að finna eitthvað sem mig vantaði (konan sem á allt) en mundi loksins eftir því að þegar ég var að setja á Þorláksmessuborðið var ég að hugsa um að eiginlega vantaði mig fallegt, stórt bretti undir læri og stórar steikur svo að ég valdi mér eitt slíkt í staðinn. Úr hlyn, með laut öðrum megin sem passar fyrir kalkúna og aðra fugla svo að þeir taka ekki á rás með slettum og látum út á dúkinn þegar maður byrjar að skera.

Sem hefur komið fyrir á mínu heimili. Svo að þetta er nauðsynleg eign.

Hins vegar sé ég fram á að verða nú að fara að gera alvöru úr því sem hefur staðið til lengi og kaupa lausan bekk (eða skenk) með hillum og/eða skúffum í eldhúsið í staðinn fyrir borðið sem er þar núna og gerir ekkert nema safna drasli. Spurning kannski með að kíkja á útsölurnar eftir áramótin.

En nú liggur fyrir að fara að steikja og baka og sjóða fyrir brúðkaupsveisluna sem ég lofaði víst í einhverri léttúð að taka að mér. (Muna: Aldrei lofa í júlí að gera eitthvað í lok desember. Það komast ekki allir á kirkjugarðsballið í haust sem hlökkuðu til þess í vor. Eða þannig.)

Þannig að ég er að fara í innkaupaleiðangur fyrir það sem ég ætla að gera í dag. Er meira að segja aldrei þessu vant svo forsjál að ég fann mér blýant og umslag utan af einhverjum reikningi og skrifaði innkaupalista til minnis, sem ég geri annars afar sjaldan. Svo er bara að bretta upp ermarnar, því ekki get ég farið að klúðra brúðkaupsveislu fyrir fólki.

Hún gæti samt klúðrast ef verður ófært á Skagann í fyrramálið. En það er þá ekki mér að kenna.

Letijól

Ég nenni þessu ekki er búið að vera mottóið mitt þessa þrjá jóladaga. Hef ekki einu sinni nennt að klæða mig almennilega fyrr en þá í dag, var í náttfötunum allan jóladaginn og innifötum (sem ég léti aldrei sjá mig í utandyra og er ég þó engin sérstök pjattrófa) á annan. Er samt búin að klæða mig núna til að fara út með ruslið áður en það fer að lykta verulega. Og svo fer ég líklega til Siggu systur á eftir að hitta gömlu hjónin.

Það var gefið frí í vinnunni þessa tvo daga milli jóla og nýárs en ég hef samt nóg að gera á morgun - glæptist til að lofa að taka að mér veislueldamennsku fyrir laugardaginn, ég hefði nú átt að þekkja sjálfa mig betur. Jæja, ég hef gott af því að rífa mig upp úr letinni og steikja sex hundruð kjötbollur og svo framvegis.

En þetta eru búin að vera mikil rólegheitajól. Ég er bara búin að liggja útaf og lesa (Bíbí og Þórberg, á Minnisbók eftir af jólalesningunni), hreiðra um mig í leisígörlstólnum og horfa á sjónvarpið (það hefur þó meira og minna farið fyrir ofan garð og neðan, ég hef venjulega sofnað út frá því, sama á hvaða tíma sólarhringsins er) eða spilað bjánalega tölvuleiki. Sem er fínt.

Þetta er búið að vera ansi viðburðaríkt ár (meira um það í mínum árlega áramótapistli, sem ég skrifa öðruhvorumegin við áramótin) en það virðist allavega ætla að enda á rólegum nótum.

Jóladót og jólakræsingar

Ég held að ég hafi bara ekki fengið neitt í jólagjöf sem ekki tengist mat, drykk eða eldamennsku á einhvern hátt. Nema reyndar innrammaða mynd af eldra barnabarninu. Jú, svo er ein gjöf sem ég á að kaupa mér sjálf og það verður reyndar ekki eldhúsdót.

Og er ég eitthvað óhress með þetta? Óekkí. Bara alveg himinsæl. Fólk veit hvað mér kemur best. Fyrir utan eldhúsdót og matreiðslubækur á ég núna alls konar sælkeravörur og kaffi sem endist langt fram á næsta ár. Og eitthvað smávegis af víni líka.

Ég sá umfjöllun fyrir jólin um einhverja könnun þar sem kom fram að fólk fengi meira og minna tóman óþarfa í jólagjöf sem það væri ekkert alltof hresst með. Kannski, en það á allavega ekki við mig. Ég fæ alveg slatta af óþarfa, mikil ósköp, en ég er bara ljómandi ánægð með það sem ég fæ svo lengi sem það er eitthvað sem eyðist. Ekki eitthvað sem mig langar ekki í og tekur bara pláss. Það hefur ekki gerst lengi.

Jólamaturinn tókst bara alveg ágætlega, barnabörnin borðuðu náttúrlega ekki hamstrasúpuna fremur en við var að búast en þeim mun meira af andabringunum - ég held að ég hafi sjaldan séð Boltastelpuna taka jafnrösklega til matar síns - en svo var eftirréttinum (heitum súkkulaðikökum með tvenns konar súkkulaðiís) frestað þar til búið var að opna þá pakka sem hér voru - einn ungur maður var orðinn ansi óþolinmóður. En hann fékk líka fjarstýrt tryllitæki sem dreifði huganum eitthvað frá allri pakkahrúgunni sem beið hans svo heima hjá honum seinna um kvöldið.

Ég fór ekki úr náttfötunum í gær. Fjölskyldan kom í hangikjöt og laufabrauð upp úr hádeginu en barnabörnin komu á náttfötum innan undir yfirhöfnunum. Svoleiðis eiga jólin að vera.

Gleðileg jól

Hangikjötsilmur, rauðkálslykt, gufur af andasósu, snúningshljóð í ísvélinni, ég að bíða eftir að humarinn þiðni nægilega til að ég geti brotið skeljarnar fyrir súpuna, búið að skúra gólfin eftir Þorláksmessuboðið, búið að skipta á rúminu, jólafreyðibaðið í undirbúningi - jú, líklega eru bara að koma jól.

Gleðileg jól, öllsömul.

Spurtogsvarað

Já, og á meðan ég man, ég hef enn alveg tíma til að svara fyrirspurnum, hvort heldur sem er hér eða á Nóatúnsvefnum. Lofa ekki að öllu verði svarað fyrir jól - en ég reyni.