Breskir læknar vilja banna eldhúshnífa. Oddhvassa allavega.

Hvað svo? Kökukefli? Grillspjót? Hakkavélar? Allt gætu þetta verið banvæn vopn. Ég var að lesa spjallþráð þar sem þetta var til umræðu og einhver sagði að það yrði þá að banna frosin lambalæri (munið þið eftir sögunni úr Óvæntum endalokum eftir Roald Dahl?). Það er vandlifað.

Er einhver aflögufær með slatta af rabarbara?

Ég er að fara að gera rabarbaraþátt fyrir Gestgjafann og vantar meiri rabarbara - sprettan í garðinum hjá ritstjóranum er ekki nógu góð.

Samkvæmt því sem nýja blaðið Hér og nú segir hvílir skuggi yfir Skólavörðuholtinu af því að eitthvert ungleikarapar er að skilja.

Ég sem hélt að ég byggi á Skólavörðuholtinu.

Annars sé ég að félagar mínir hjá Séðu og heyrðu hafa misst af aðalskúbbi nýja keppinautarins: Ingvi Hrafn er hættur að þurfa að vakna á nóttunni til að pissa.

Svo eru þeir að klikka á upphrópunarmerkjunum. Muna ekki eftir þeim nema í svona annarrihverri fyrirsögn.

Við efnafræðistúdentinn erum að horfa á Grand Prix der Volksmusik á ZDF. Eða reyndar bara ég núna, efnafræðistúdentinn flúði kveinandi í bað þegar hann var búinn að hlusta á tvífara Péturs í Álftagerði og heilan flokk af aulalegum söngvurum í köflóttum skyrtum og lederhosen. Þannig að hann missti t.d. af söngflokk í ljósbláum skyrtum og lederhosen og öðrum í hvítum skyrtum og lederhosen. Og söngvara í bleikrósóttum jakkafötum. Og nokkrum öðrum góðum harmoniku- og gítarspilandi númerum.

Þar á undan vorum við að horfa á kristilega líkamsræktarþáttinn Body and Spirit á 3ABN, sem er sennilega fáránlegasta sjónvarpsefni sem um getur. Ekki hægt að lýsa honum, maður verður að sjá hann. Og það er hægt að fá hann á vídeói ...

Við erum með of margar sjónvarpsstöðvar.

Hmm, kannski grundvöllur fyrir því að spyrja um stúdentaafslátt í vissum hverfum í Þýskalandi núna þótt það gengi ekki hér um árið hjá sumum ...

Mér skildist allavega á gagnlega barninu eftir Póllandsferðina um árið að leigubílstjórar í Kraká hefðu gefið stúdentaafslátt á okrinu - bara tvöfalt gjald fyrir útlenda stúdenta, þrefalt fyrir aðra útlendinga. Það borgar sig allavega að spyrja.

Ég er í minnihluta á mínu heimili. Sonurinn og tengdasonurinn eru að horfa á fótbolta frammi í stofu. Þeir eru skyndilega orðnir mun kátari en þeir voru áðan.

Ég hélt að leikurinn væri að verða búinn svo að ég fengi stofuna mína aftur og gæti farið að horfa á BBC Food eða eitthvað. En það er víst framlenging svo að það verður ekki á næstunni.

Ég var að lesa nýlega um hækkun á húsaleigu í Reykjavík en held nú samt að hún sé ekki alveg komin upp á þetta stig ennþá. Ekki einu sinni í miðbænum.

Sem minnir mig annars á: Mér er farið að bráðliggja á að losna við efnafræðistúdentinn og honum er ekki síður farið að liggja á að losna við mig. Þar sem ég á ótvírætt íbúðina (hann er að vísu farinn að lýsa því fjálglega fyrir mér hvernig hann gæti eitrað fyrir mér án þess að nokkuð væri hægt að sanna), þá er það ljóst að það er hann sem vantar húsnæði. Þannig að ef einhver veit af góðum skáp til útleigu, gjarna í 101, sem gæti rúmað myndarlegan ungan háskólanema ...

Eftir réttar tvær vikur verð ég væntanlega á lúxushótelinu með vínþerapíuna.

Að vísu held ég að vínþerapían sé ekki innifalin. Bömmer. Þarna getur maður nefnilega fengið ,,anti-age treatment in two hours" og ,,the shape of the face is redrawn, as in a lifting". Ekki veitti mér nú af. Og ég vildi gjarna prófa Bain à la vigne rouge. En ég veit ekki. Special vintage-meðferð (skyldi vera átt við aldur minn eða vínsins?) kostar rúmar 500 evrur fyrir þessa þrjá daga sem ég verð þarna. Ég held að mig langi meira til að spandera þeim peningum í mat og vín (innvortis) en vínböð. Svei mér þá.

En mig langar samt svolítið til að prófa Wine Barrel Bath. Eða ,,Honey & Wine Wrap, Merlot Wrap, Energy Wrap" sem allt til samans kostar bara 51 evru. Að ekki sé talað um ,,Four-hand Exhilarating Massage on wet skin", nema ég mundi vilja vita fyrst hvort eru einhverjir sætir strákar að nudda.

Efnafræðistúdentinn við móður sína, með uppgjöf í svipnum: -Er ekki mute-takki á þér?

Er ekki símaskráin - ég meina prentuð skrá - algjör tímaskekkja?

Ég er með símaskrá hér á skrifstofunni. Hátt í fimmtánhundruð blaðsíður og hefur líklega einu sinni verið opnuð allt síðasta ár. Ég er með aðra heima sem ég held að hafi aldrei verið opnuð. Sum undanfarin ár hefur enginn (les: efnafræðistúdentinn) nennt að sækja símaskrá og hennar hefur ekkert verið saknað. Ég hringi sárasjaldan (símafóbían mín spilar kannski eitthvað þar inn í) og ef mig vantar símanúmer fletti ég því oftast upp á símaskra.is.

Þannig að allavega þessar tvær símaskrár og örugglega miklu miklu fleiri eru bara óþarfa eyðsla á síberískum skógum.

Þessutan er fræsingavélin í Odda föst næstu þrjár vikur í að fræsa símaskrána, nema hvað það er hægt að skjóta öðrum verkefnum inn um helgar, sem gæti orðið til þess að grillblað Gestgjafans tefjist fram í næstu viku ef ekki tekst að finna lausn ...

En að sjálfsögðu er ég fyrst og fremst að hugsa um síberísku skógana. Nema hvað.

Svona auglýsa nýsjálensk matreiðslublöð sig.

Ég ætla að leggja til við ritstjórann að við förum þessa leið í auglýsingum.

Ég er allavega búin að setja þessa mynd inn sem bakgrunn á vinnutölvunni.

Ég sá viðtal áðan á Sky News við breska konu sem átti þrjár dætur óléttar á sama tíma - 16, 14 og 12 ára. Hún segir að þetta sé allt ríkisstjórninni að kenna.

Það hefði kannski verið nær að vísa á þessa síðu hér í gær, eftir öll Evróvisjónpartíin. Jæja, sama er, það verður örugglega þörf á henni seinna.

Dálítið fyndið, í ljósi allra samsæriskenninganna sem maður heyrði fyrir helgi, að skoða hvernig Íslendingar greiddu atkvæði í Evróvisjón.

Í forkeppninni fóru íslensku stigin til 10 af 12 efstu þjóðum. Sjö af þeim sem fengu stig frá Íslandi eru frá Austur-Evrópu.

Í aðalkeppninni fóru íslensku stigin til 10 af 12 efstu þjóðum. Fimm af þeim sem fengu stig frá Íslandi eru frá Austur-Evrópu.

Sveimér þá, Íslendingar eru þátttakendur í samsærinu.

(Já, ég veit, það eru allir orðnir leiðir á Evróvisjón.)

Hér getið þið spreytt ykkur á tíu matarspurningum. Þessar eru í erfiðari kantinum. Ég náði ekki nema sjö.

Samanburður á helgarmorgnunum hjá okkur mæðginunum:

Laugardagsmorgun kl. 8.30:

Móðirin: -Hvenær ætli við höfum síðast bæði verið saman í eldhúsinu arfahress fyrir klukkan níu á laugardagsmorgni?

Efnafræðistúdentinn: -Aldrei.

Sunnudagsmorgunn kl. 12 á hádegi:

Móðirin: -Ég ætla að skreppa út.

Hræið af efnafræðistúdentinum, marflatt í stofusófanum: -Mrrpþvh ...

Í partíinu sem hann var í var víst leikinn samkvæmisleikur sem fólst í því að fólki var úthlutað landi og í hvert skipti sem það land fékk stig í Evróvisjón átti hlutaðeigandi að taka sopa (jafnvel jafnmarga og stigin voru, ég náði því ekki alveg). Efnafræðistúdentinn segist ekki hafa tekið þátt í þessu. Mig grunar samt að hann hafi verið Grikkland.