Efnafræðistúdentinn ákvað að leggja sig áðan eftir að hafa vakað hálfa nóttina við próflestur.

Móðirin: -Hvenær á ég að ýta við þér ef þú verður ekki vaknaður?

Efnafræðistúdentinn: -Æi, svona klukkan tólf. (Fer inn til sín og lokar. Opnar dyrnar strax aftur): -Þegar ég segi tólf meina ég hálf eitt. (Lokar aftur og opnar um hæl): -Give or take. (Hugsar sig um): -Aðallega take.

Ég var að enda við að höggva vængendana af tíu kílóum af kjúklingavængjum. Það eru helvíti margir vængendar.

Svo ákvað ég að vera húsmóðurleg og frysta vængendana til að nota þá í soð seinna, ég má ekki vera að því að sjóða soðið núna.

En þá mundi ég að síðast þegar ég eldaði tíu kíló af kjúklingavængjum gerði ég þetta einmitt. Ég á ennþá alla þá vængenda í frystiskápnum. Svo að ég steinhætti við að vera húsmóðurleg og henti vængendunum.

Fínt að eiga tilbúið kjúklingasoð í frysti. Ekki eins þægilegt að eiga bara efni í kjúklingasoð.

Það er hins vegar afskaplega lítið mál að matreiða tíu kíló (mínus vængendar) af kjúklingavængjum.

Ég var að lesa einhvers staðar áðan um hugsanlegt hjónaband Paris Hilton og einhvers grísks milljarðamærings sem líka heitir Paris. Gæti orðið svolítið ruglandi heimilislíf ... En svosem ekkert einsdæmi. Evelyn Waugh var t.d. einu sinni giftur konu sem hét Evelyn.

En það er nú óneitanlega hentugra að hafa nöfn frátekin fyrir annað kynið. Til allrar hamingju eru nú ekki mörg nöfn hér sem hafa verið notuð á bæði kynin, í fljótu bragði man ég bara eftir fjórum, Blær, Júlí, Elís og Marís (hmm, París mundi nú passi inn í þann pakka). Þau eru þó örugglega eitthvað fleiri.

Hérna kemur þó föðurnafnið yfirleitt til hjálpar en þetta er verra með útlendinga. Einu sinni var ég búin að vera í nokkrum tölvupóstssamskiptum við erlendan blaðamann sem hét Adrien og endaði á að bjóða honum í mat þegar hann kom hingað. Mér brá dálítið þegar ung kona birtist í dyrunum í staðinn fyrir karlmanninn sem ég hélt að ég hefði verið að spjalla við.

Myndatökur fyrir grillblaðið byrjuðu í dag. Aldrei þessu vant snjóaði ekki.

Nei, þetta eru reyndar ýkjur en ég man að þegar við byrjuðum að mynda fyrir grillblaðið í fyrra kom él á mig þegar ég var á leiðinni heim úr búðinni með hráefnið og gott ef ekki gerðist eitthvað svipað í hitteðfyrra.

Ég var reyndar ekki að grilla steikur eða neitt slíkt núna, heldur að baka brauð og kökur á grillinu. Það er ekkert mál (meira að segja hægt að baka Betty á grillinu) en ég gekk samt ekki svo langt að baka kransaköku á grillinu eins og sýnt er í bók sem ég á.

- Á meðan ég man, hvað finnst ykkur um nýjasta Gestgjafann, þið sem hafið séð blaðið? Gagnrýni er alltaf vel þegin eins og þið vitið.

Ég varð náttúrlega að prófa þetta eins og aðrar piparmeyjar (þar sem ég hef aldrei verið gift, sbr. Íslendingabók, þá telst ég ótvírætt til þeirra).

Your dating personality profile: Funny - You laugh often. People never accuse you of lacking a sense of humor. You don't take yourself too seriously. Liberal - Politics matters to you, and you aren't afraid to share your left-leaning views. You would never be caught voting for a conservative candidate. Intellectual - You consider your mind amongst your assets. Learning is not a chore but a constant search after wisdom and knowledge. You value education and rationality.

Your date match profile: Funny - You consider a good sense of humor a major necessity in a date. If his jokes make you laugh, he has won your heart. Practical - You are drawn to people who are sensible and smart. Flashy, materialistic people turn you off. You appreciate the simpler side of living. Shy - You are put off by people who are open books. You are drawn to someone who is a bit more mysterious. You want to draw him out of his shell and get to know what he is all about.

Your Top Ten Traits 1. Funny 2. Liberal 3. Intellectual 4. Big-Hearted 5. Wealthy/Ambitious 6. Adventurous 7. Practical 8. Outgoing 9. Sensual 10. Romantic

Your Top Ten Match Traits 1. Funny 2. Practical 3. Shy 4. Adventurous 5. Intellectual 6. Big-Hearted 7. Conservative 8. Traditional 9. Romantic 10. Wealthy/Ambitious

Take the Online Dating Profile Quiz at Dating Diversions

Grrreat, nú þarf ég bara að finna mér óframfærinn og praktískan húmorista.

Athyglisverður úrskurður frá Persónuvernd varðandi Íslendingabók.

Ekki þar fyrir, mér gæti ekki verið meira sama. Hjúskaparupplýsingar um mig eru rangar í Íslendingabók (maður sem ég var einu sinni gift er þar skráður sem barnsfaðir minn) og mér hefur náttúrlega aldrei dottið í hug að leiðrétta það. En þótt ég hefði verið gift jafnoft og Elizabeth Taylor væri mér rétt sama þótt allir mínir fyrrverandi væru þarna skráðir. Maður verður jú að læra að lifa með sínum mistökum ...

-Ég get ekki talað kínversku af því að veðrið er svo vont, sagði dóttursonur minn áðan þegar hann var beðinn um að sýna kínverskukunnáttu sína. Hann á nefnilega kínverskan vin á leikskólanum. Sá talar bara kínversku og það er eitthvað verið að reyna að kenna börnunum fáein orð í kínversku jafnhliða því að þau eiga að kenna drengnum íslensku.

Annars fékkst hann yfirleitt ekki til að viðurkenna að hann væri hann sjálfur í dag. Ef hann var ávarpaður með nafni horfði hann forviða á viðmælandann og sagði: -Ég er ekki Úlfur, ég er pabbi hans Skrúlfs.

Skrúlfur er semsagt tuskuíkorni sem hann er búinn að eiga lengi en um daginn tilkynnti hann að hann væri pabbi Skrúlfs og það samrýmist greinilega ekki Úlfs-hlutverkinu. Ég spurði hann áðan hvar Úlfur væri þá.

-Úlfur er inni í mér, sagði drengurinn.

-Gleyptirðu hann? spurði ég. En þá mundi hann eftir hvernig fór fyrir úlfinum sem gleypti Rauðhettu, skipti um skoðun, benti á föður sinn og sagði: -Úlfur er inni í honum.

Annars svínvirkaði þessi hlutverkaleikur hans sem sölumannafæla um daginn, þegar einhver símasölumaður hringdi. Úlfur svaraði í símann og eftir nokkurt spjall bað sölumaðurinn líklega um að fá að tala við pabba.

-Ég er pabbi, heyrðist drengurinn endurtaka nokkrum sinnum og fór ekkert ofan af því. Að vísu rétti hann föður sínum á endanum símann en þá var sölumaðurinn búinn að gefast upp og leggja á.

Ég var að panta mér nokkrar bækur hjá Powells, þar á meðal eina sem heitir The Junk Food Companion: The complete guide to eating badly. Ég er hrifin af bókum með svona titlum og ekki spillir nafn höfundarins fyrir, hann heitir Eric Spitznagel. (Aftur á móti féll ég ekki fyrir tilboði sem ég fékk áðan um bók sem heitir að mér skilst How to make women really happy. Maður sem kallar sig Sack A. Mulch hljómar ekki eins og einhver sem maður vill láta gera sig hamingjusama.)

Já, og svo var þarna bók frá Seychelleseyjum sem ég varð að eignast. Ég á nefnilega enga matreiðslubók frá Seychelleseyjum og það gengur auðvitað ekki.

Ég kom við í Kringlunni í dag og keypti mér alveg ofboðslega þægilega skó. Ég er ekki viss um að þeir skori hátt á flottheitaskalanum en fyrir gamlar og gigtveikar konur er það aukaatriði. Enga Manolo Blahnik hér, takk.

Annars var ég að velta fyrir mér skóvörumerkjum áðan. Sjálf er ég alin upp í gúmmískóm og ekki man ég fyrir mitt litla líf hvað stóð á þeim, ef eitthvað. Það er meira að segja stolið úr mér rétt þessa stundina, þótt skömm sé frá að segja, hvaða gyðjunafni skóverksmiðjan á Akureyri hét. Þaðan átti ég örugglega skó. En fyrsta fína vörumerkið sem ég vissi af var örugglega Bally. Það var af því að ég las Margit Ravn ung að árum og í bókinni Með afborgunum eru fyrstu skórnir sem söguhetjan kaupir þegar hún ákveður að gerast eyðslusöm tískudrós fínir silkiskór frá Bally. Þeir (og það sem á eftir fylgdi) steyptu henni náttúrlega næstum því í glötun, hún eyddi öllu í tískuföt og á endanum var bróðir hennar farinn að ganga í skóm sem voru jafngötóttir og sokkar efnafræðistúdentsins (það stafar þó ekki af miklum tískufatakaupum móður hans). Það var alveg á hreinu að þessir Bally-skór voru meiriháttar flottir.

En ég hef aldrei eignast Bally heldur.

Ég var að athuga flugáætlun hjá Icelandair og þar stendur:

,,Fyrir vikuna 4 jún. 05 gegnum 11 jún. 05"

Gegnum hvað?

Hænsnaspádómar??? Svosem ekkert vitlausara en stjörnuspádómar ef út í það fer.

Jamm, og Bautinn (og Svanhildur) fá bara rosaplögg hjá Opruh. Ætti allavega að tryggja þeim bissniss frá öllum Könum sem eru að leita að hákarli og hrútspungum (ég fékk einmitt fyrirspurn í síðustu viku um hvar maður fengi svoleiðis, kannski ég hefði bara átt að vísa á Bautann).

Við efnafræðistúdentinn sátum áðan við kvöldverðarborðið og gæddum okkur á lasagna.

Efnafræðistúdentinn: -Þetta er fínt lasagna en það er of mikill pipar í því.

Móðirin: -Nei, það er ekki of mikill pipar.

Efnafræðistúdentinn: -Jú, mér finnst það víst.

Móðirin: -Speak for yourself.

Efnafræðistúdentinn: -EN ÉG VAR AÐ GERA ÞAÐ!

Móðirin. -Ó. Já. Ég sé það núna.

Það er greinilega fjör hjá kóngafólkinu, bara fjölgun á leiðinni hjá Friðriki og Maju og Hákoni og Mette-Marit. Ætli komi svo ekki fréttir af fjölgun í spænsku konungsfjölskyldunni innan tíðar og svo framvegis ... Bara Albert Mónakóprins sem ekki gengur út og lætur systur sínar um barneignirnar. Sem þær hafa reyndar staðið sig vel í. Of vel, þykir sumum.

Kóngafólk er náttúrlega með óþarfara fólki. En það hefur visst skemmtigildi.

Ég grillaði í kvöld eins og áreiðanlega margir fleiri. Nautafilletsneiðar, maríneraðar í fullt af rósmaríni, svolitlu timjani, ólífuolíu og pipar. Ekki slæmt. Meðlætið var bara klettasalatsblanda með mjög vel þroskuðum tómötum (ekki kirsiberja, búin að fá leiða á þeim), fetaosti og ólífum. Engar kartöflur eða önnur kolvetni. Ég sagði efnafræðistúdentinum að við værum komin á Atkinskúrinn. Eða var það South Beach-kúrinn? Hann tók allavega ekki mark á mér. Sem ekki var ástæða til.

Kolvetnin voru nefnilega á borðum fyrr í dag, við Sauðargæran bökuðum vöfflur með kaffinu. Hann sat svo og át vöfflu með engu og þurfti að sýna öllum hana eftir hvern bita því að hann sá alltaf eitthvað út úr henni: ,,Sko, nú er þetta fugl," (tekur bita) ,,og nú er þetta bátur," (tekur bita) ,,og nú er þetta leðurblaka". Gott að hafa svona frjótt ímyndunarafl.

Það hafa komið tímabil í lífi mínu þar sem ég er í skapi til að lesa vondar ástarsögur. Ekki oft og það er langt síðan síðast. En nógu oft til að ég hef skoðað ótal kápumyndir. Þess vegna fannst mér þessi síða, þar sem fólk er að taka dæmigerðar ástarvellukápumyndir og skipta um texta á þeim, dálítið skemmtileg.

Ég held meira að segja að ég hafi lesið einhverjar af þessum bókum. En kannski ekki. Flestar svona kápumyndir gætu skreytt næstum hvaða ástarvellu sem er og maður ruglar þeim öllum saman.