Skítkokkar og bændakjöt

Mér finnst þetta nú ekki sérlega spennandi eða lystaukandi þema á veitingahúsi. En þetta er víst að slá í gegn í Asíu.

En kokkarnir á svona stöðum eru þá væntanlega skítkokkar.

- Annars sá ég, þegar ég var á gangi niðri í bæ áðan, að á Silfri er boðið upp á Farmers Meat. Ég vissi ekki alveg hvað ég átti að halda um það.

Tapírar, kakkalakkar og baráttumaður gegn sjálfsfróun

Undarlegt lesefni sem maður hefur sér til viðurværis þessa dagana. Kannski sem mótvægi við allt kreppuklámið og svartsýnisrausið (jú, ég veit að það er hörmungarástand víða, jú, ég er reið, nei, ég neita að sökkva mér ofan í það).

Ég er heldur ekki að tala um prófkjörsauglýsingar og greinar og svoleiðis.

Nei, en í morgun var ég til dæmis að lesa bókina How to Cook a Tapir, þar sem er, eins og nafnið bendir til, meðal annars lýst matreiðslu á tapírum og ýmsum stærri nagdýrum sem lifa í frumskógum Belize - ekki að ég eigi von á að eiga eftir að notfæra mér þessa þekkingu svosem. En samt.

Svo er í bókinni þessi uppskrift, sem verður nú eiginlega að teljast til grunnuppskrifta:

"Convict Soup

1 package of Knorr's dried soup mix, any variety
water

Before buying the soup, hold the package up to the light and check for pinholes. After opening it, inspect the mix itself for black specks. If you see holes or black specks, the cockroaches beat you to the soup. Discard and try another package.

Add more water than the directions tell you and boil the hell out of the soup for twenty minutes because nobody drinks the water in places like this without boiling it first.

Eat it anyway."

En nú er ég farin að lesa um mikinn mannvin og næringarfrömuð sem jafnframt barðist eins og berserkur gegn sjálfsfróun þótt hann sé nú frægur fyrir allt aðra hluti. Hann mælti með því að karlmenn skyldu umskornir án deyfingar svo að þeir tengdu ævinlega tippið á sér við sársauka og refsingu en sagðist hafa komist að því að það gæfist vel að bera hreina karbólsýru á snípinn á konum, það væri ,,an excellent means of allaying the abnormal excitement."

Eins og ég sagði, undarlegt lesefni á þessum laugardagsmorgni.

Pylsuskarfar

Ég held ég hafi vísað á þessa síðu áður, einhverntíma fyrir löngu. Gleymi mér alltaf þegar ég dett inn á hana.

Það er engin hugmynd svo undarleg að einhver hafi ekki einhvern tíma fengið hana.

Fávís kona spyr

Snúran á fartölvuhleðslutækinu brann í sundur áðan. Með bláum reyk og alles. Fast upp við hvaðþaðnúheitir dippidúttinn sem maður stingur í tölvuna. Allt í lagi með tölvuna og hleðslutækið sjálft.

Þetta er hleðslutækið sem einkasonurinn lánaði mér eftir að snúran á mínu hleðslutæki fór í sundur, nema það var hinn endinn, hleðslutækismegin. Það hleðslutæki er í fínu lagi líka nema semsagt snúran (eða annar þátturinn í henni) fór í sundur. Án þess þó að brenna.

Nú spyr ég eins og fávís kona (sem er hárrétt fullyrðing hvað þetta varðar allavega), hvað gerir maður í svona tilviki? Þarf að kaupa nýtt hleðslutæki (þetta er makki) á mörgþúsund og sjötíu krónur? Fer maður með hleðslutækið/tækin í viðgerð og borgar mörgþúsund og þrjátíu krónur fyrir að gera við eina vesæla snúru? Eða er þetta eitthvað sem handlaginn maður getur lagað á þremur mínútum? Og ef svo er, hvar finnur maður svoleiðis mann?

Ugla sat á kvisti (nei, ekki um prófkjör)

Það voru kannski allir búnir að sjá þetta á undan mér en það var að renna upp fyrir mér hvað opnuauglýsingin frá Ellingsen í Fréttablaðinu í morgun er grátlega fyndin.

Það er að segja, þegar maður skoðar litlu myndirnar neðarlega á síðunni og áttar sig á því hvaða orð vantar aftan á þuluna.

Færeyingar til fyrirmyndar

Mér finnst að í íslensku áfengislöggjöfina vanti ákvæði sem er í færeysku rúsdrekkalögunum:

Er nakar vorðin fullur, skal loyvishavarin ella hjálparfólk hansara taka sær av, at tann fulli undir tryggum umstøðum verður fingin til hús ella á løgreglustøðina ella boðsenda løgregluni.

Sem sagt, að veitingamenn séu skyldugir til að sjá um heimsendingarþjónustu á fulla liðinu eða komi því í hendur lögreglu (er reyndar ekki viss um að boðsenda þýði það sama og á íslensku).

Þá yrði örugglega betra að búa í miðbænum.

En ég veit reyndar ekki af hve miklum krafti þessu er fylgt eftir í Færeyjum.

Alvöru skyndibiti

Fiskur er hinn eini sanni skyndibiti.

Þessi réttur tók mig nákvæmlega tólf mínútur frá upphafi til enda (fyrir utan reyndar tímann sem fór í að hita ofninn).

Þorskur með reyktu paprikudufti (ansi hreint góðu), rioja-skinku (átti þessar sneiðar og þurfti að nota þær í eitthvað) og smjörbaunum úr dós, krydduðum með timjani og pipar.

Ekki slæmt.

Búin að kjósa í bili

Það er ástæða til að óska Kristni Erni Jóhannessyni til hamingju með formannskjörið. Ég veit náttúrlega ekkert hvernig hann á eftir að standa sig en það varð að skipta um forystu.

Félagið heitir ekki Verkamannafélag Reykjavíkur eins og mér heyrðist sjónvarpsfréttamaður segja áðan, heldur því undarlega nafni Virðing Réttlæti (man ekki hvort er og á milli) - en það kannski fer þá að standa undir nafni, sem manni finnst nú ekki að það hafi gert undanfarna mánuði. Ekki formaðurinn allavega.

Jú, ég mundi eftir að kjósa. Jú, ég kaus nýja formanninn. Enda er hann nágranni minn (hann býr held ég hérna rétt handan við hornið). En það var svosem ekkert út af því.

Ég er lika búin að kjósa í Samfylkingarprófkjörinu. Þar kaus ég held ég bara einhverja nágranna mína líka. Samt ekki af þeirri ástæðu og ég kaus meira að segja menn úr öðrum sveitarfélögum. Enda ætti náttúrlega landið að vera eitt kjördæmi og fáránlegast af öllu er þó að skipta Reykjavík í tvö.

Þannig að nú þarf ég líklegast bara ekkert að kjósa meira í bili, ekki fyrr en í þingkosningunum náttúrlega. Mér leiðist ekkert að kjósa per se en það er stundum vandi að velja.

(Ég held samt áfram að fara í bað eins og ekkert hafi í skorist.)

Bankalistaverk, sinfónían og Karvel

Þegar ég las fréttina um að Kjartan garðyrkjubóndi og þingmaður vildi selja listaverk bankanna fyrir fjóra til átta milljarða (fylgdi ekki sögunni hver ætti að kaupa), þá minnti það mig á eitthvað.

Og svo áttaði ég mig allt í einu á því hvað það var. Það var þegar Karvel Pálmason tjáði sig í umræðum um Sinfóníuhljómsveit Íslands á þinginu um árið. Sagan hefur reyndar alltaf verið sú að Karvel hafi lagt til að spara með því að fækka hljóðfæraleikurum, sumir gætu vel spilað á fleira en eitt hljóðfæri (pákugaurinn til dæmis), en þarna var nú verið að ljúga aðeins upp á Karvel, hann var bara að velta fyrir sér hvað þeir væru margir og af hverju þeim hefði fjölgað svona.

,,Mér er sagt að ekki alls fyrir löngu hafi hljóðfæraleikarar í Sinfóníuhljómsveitinni verið 48. Tiltölulega skömmu síðar voru þeir 59, og mér skilst að nú séu þeir 65. Mér er sagt það. (Gripið fram í: Verðbólgan.) Verðbólgan, segir einhver. Og ég vil spyrja hæstv. ráðh., ég veit að hann veit það, hver sé tala hljóðfæraleikara núna í Sinfóníuhljómsveitinni, og þá er ég auðvitað að tala um fastráðna því að ég geri ráð fyrir að menn séu að tala um það hér."

,,Ég ætla sem sagt ekki að mæla gegn frv., en ég vil lýsa þeirri skoðun minni, að ég sé ekkert sérstakt sem mælir með því og ég veit ekki hvaða vísindalegur útreikningur liggur að baki því, að nákvæmlega 65 hljóðfæraleikara þurfi, og hvaða tónlistarverk sé t.d. lagt að baki þeirri tölu. Hér er kannske spurt af fáfræði, ég veit það ekki, en ég sé ekki að það sé alfarið rétta talan sem menn eru hér að tala um."

Heilbrigður olíudúkur er mjög mikilvægur ...

Það er fátt fyndnara en síður sem sjálfkrafa eru þýddar yfir á ,,íslensku" með þýðingarvél þegar þær eru sóttar frá Íslandi. Dæmi:

Hrár Egg eggjarauða: - Það might vera ógeðslegur til neyta egg eggjarauða en það er mjög frumskilyrði á meðan ristill hreinsun. Það er í staðreynd the nærandi fæða á the reikistjarna. Næstum allur the nauðsynlegur vítamín og steinefni ert innifalinn í það. The bestur vegur til neyta this er við mixing the eggjarauða með volgur mjólk. Tryggja þessi þú neyta það í lágmark hluti til fá vanur eitthvað sem gert var oft þinn líkami.

Heilbrigður Olíudúkur: - Ýmsir tegund af heilsa olíudúkur eins og kjarrmenta olía, lýsi, kókoshnetuolía, þorskur lifur olía, ólífuolía, hveitikím olía ert mjög frumskilyrði fyrir þinn líkami. Hveitikím olía hefur ofgnótt af E-vítamín. Lýsi hefur þrír tegund af feitur sýra. Þú geta opt for fyrir allir einn af þessir heilbrigður olíudúkur og hafa það á a venjulegur undirstaða svo þessi the ristill hreinsun geta ekki hafa áhrif á þinn líkami mikill. Þessir heilbrigður olíudúkur ert raunverulega mjög mikilvægur til the líkami eins og þeir hjálpa til halda the hormóna- jafnvægi og einnig viðurværi okkar kirtill og húð sléttur.

(Ég tek fram að ég var alls ekki að leita að upplýsingum um the Aðferð af Ristil Hreinsun þegar ég rakst á þessa síðu. En það er nú gott að vita hvað maður gerir til að viðhalda heilbrigðum olíudúk.)

Supersize me ...

Þetta getur maður nú kallað alvöru hamborgara.

Málþæfing

Var ekki venjan hér áður fyrr að þæfa upp úr keytu? Og pissa svo aðeins meira á voðina ef þæfingin gekk illa, það þótti gefast vel.

Það er víst ljóst hverjir leggja til hlandið í þófið núna.

Súpa Kafka og vaskur Sartres

Ég sé að pundið er komið niður í 157 krónur. Nú þurfa bara nokkrir bankar (eða jafnvel bara litlir sparisjóðir) í viðbót að fara á hausinn eins og Straumur og þá verður gengið 150 krónur eins og í mestallt fyrrasumar. Þá þótti manni ekki frágangssök að skreppa til London ...

Ég lét meira að segja eftir mér á dögunum að panta einar þrjár bækur frá Amazon.co.uk, það hef ég annars ekki gert síðan fyrir hrun. Ein þeirra er Kafka's Soup: A Complete History of the World's Literature in 14 Recipes. Uppskriftir skrifaðar í stíl frægra rithöfunda. Athyglisvert, hlakka til að fá hana.

Svo er líka hgæt að fá Sartre's Sink, sem er handbók um heimilisviðhald og viðgerðir, en ég pantaði hana nú ekki.

Ekki að sinni allavega.

Síðasti séns

Já, svo ætlaði ég að minna á að Vefbókavikunni lýkur í kvöld en þangað til er hægt að fara inn á snara.is og skoða Matarást og uppskriftasafnið frítt (og auðvitað allar orðabækurnar og Nöfn Íslendinga og orðstöðulyklana og allt hitt).

Og þeir sem voru búnir að skoða fyrir föstudaginn síðasta - já, þeir ættu endilega að skoða uppskriftasafnið sem bætt var við á föstudaginn.

Eða kaupa sér áskrift.

Alvöru endurvinnsla

Ég var að lesa frétt um endurvinnslu á gúmmíkurli.

Allt gott um það að segja en svo mætti líka taka Marokkóbúa sér til fyrirmyndar. Þessa búð rákumst við Hekla á í Marrakesh í fyrra, hún seldi ekkert nema dekk endurunnin sem búshluti.

Verðmætur tengdasonur

Nú held ég að uppáhaldstengdasonur minn, sem varð jú annar á heimsmeistaramótinu í kaffismökkun í hitteðfyrra, ætti að fara að athuga sinn gang. Ég er viss um að hann er ekki svona vel tryggður.

Þetta kallar á baðferð

Nú þarf ég eiginlega að fara aftur í bað og hugsa prófkjörið upp á nýtt.

(Kom þetta annars út eins og ég færi bara í bað af pólitískum ástæðum? Það er reyndar ekki alveg þannig ...)