(function() { (function(){function c(a){this.t={};this.tick=function(a,c,b){var d=void 0!=b?b:(new Date).getTime();this.t[a]=[d,c];if(void 0==b)try{window.console.timeStamp("CSI/"+a)}catch(l){}};this.tick("start",null,a)}var a;if(window.performance)var e=(a=window.performance.timing)&&a.responseStart;var h=0=b&&(window.jstiming.srt=e-b)}if(a){var d=window.jstiming.load;0=b&&(d.tick("_wtsrt",void 0,b),d.tick("wtsrt_","_wtsrt", e),d.tick("tbsd_","wtsrt_"))}try{a=null,window.chrome&&window.chrome.csi&&(a=Math.floor(window.chrome.csi().pageT),d&&0=c&&window.jstiming.load.tick("aft")};var f=!1;function g(){f||(f=!0,window.jstiming.load.tick("firstScrollTime"))}window.addEventListener?window.addEventListener("scroll",g,!1):window.attachEvent("onscroll",g); })();

Konan sem kyndir ofninn sinn

Eldhúsreyfarar miðaldra matargúrús á Skólavörðuholtinu

12.2.09

Grillhús Geira

Einhverntíma í sumar skrifaði ég um grillun Kastljóssins á þáverandi borgarstjóra og þótti þeirri meðferð nokkuð ábótavant. Svona út frá húsmóðursjónarmiði.

En þeir kunna þetta hjá BBC.

Reyndar voru kaflar í Haardetalkinu sem minntu mig ögn á steikinguna sem ég lýsti hér. Þegar maður sá steikina engjast ...

|

11.2.09

Íslenskir kokkar, fúddandfun og Sokolov

Ég er nú ekkert hissa á þessu. Íslenskir kokkar eru margir mjög góðir og eiga fyllilega skilið að þeim sé hrósað, ekki síst auðvitað þeim sem eru að gera góða hluti með íslenskt hráefni og íslenskar matarhefðir. Þess vegna hef ég aldrei alveg skilið fyrirbærið Food and Fun þar sem er verið að draga hingað misfæra útlenda kokka (suma mjög góða, vissulega) og gera mikið með þá en svo er það kannski íslenska staffið í eldhúsinu sem vinnur alla vinnuna. Eða þá að það sem þeir eru að gera er bara ekkert merkilegt; ég skrifaði einmitt um þetta í fyrra.

Verður annars nokkuð af Food and fun í ár? Það hefur allavega ekkert heyrst af því enn. Ekki mundi ég sakna þess í núverandi mynd en spurning hvort ætti þá ekki að setja upp alíslenska kokkahátíð í staðinn.

Fyrir nokkrum árum var ég í sambandi við blaðakonu á einu þekktasta bandaríska matarblaðinu. Þeim hafði verið boðið á Food and fun og hún var mjög spennt fyrir því að koma, fannst það sem ég var að segja henni um íslenska matargerð mjög áhugavert (og hér erum við ekki að tala um hákarl og hrútspunga) en þegar hún var búin að lesa dagskrána missti hún áhugann og sagði ,,þetta er ekki íslensk matarhátíð, hvers vegna ættum við að koma til Íslands til að borða mat eldaðan af kokkum sem við getum farið til hér heima?"

Raymond Sokolov er annars maður sem veit um hvað hann er að tala, ekki einn af þessum háfleygu veitingahúsarýnum og ,,matgæðingum" sem slá um sig með frösum, heldur fræðimaður sem hefur skrifað mjög góðar matreiðslubækur, m.a. fyrir byrjendur. Ég á reyndar ekki nema eina af bókunum hans, hún eru um matreiðslu á kornréttum.

Hér er grein eftir Sokolov. Hún er reyndar um mannát ...

|

10.2.09

Viðskipti við Voldemort

Ég er búin að fá svoleiðis upp í kok af Dabba og Óla og öllu þeirra slekti. Svo að mér dettur ekki í hug að skrifa um þá. Í staðinn ætla ég að segja frá Voldemort vini mínum. Hann er síst auðveldari viðfangs.

Voldemort þessi heitir reyndar Volodymyr og er kallaður Vlad, býr í Kanada en er sennilega Rússi og talar ekki sérstaklega góða ensku og selur dót á Ebay. Ég keypti af honum forláta loðhúfu fyrir ekki löngu síðan og þau viðskipti gengu eins og í sögu, ég fékk húfuna mína bæði fljótt og vel og er hæstánægð með hana.

Svo var ég einhverntíma fyrir mánaðamót að sörfa á Ebay og datt inn á síðuna hjá Voldemort og rakst þar á aðra húfu, nokkuð snotra, sem ég hafði ekkert á móti að eignast en vildi ekki borga mikið fyrir, síst af öllu núna í kreppunni. Lágmarksboðið var 9.99 dollarar, ég tékkaði á sendingarkostnaði og sá að International delivery var 13 dollarar eins og á fyrri húfunni, svo að ég bauð einhversstaðar rétt yfir lágmarksboðinu.

Það bauð enginn annar í húfuna svo að ég fékk hana á 9.99 plús 13 dollara. Ég er vön að borga samstundis en þegar ég fór inn á Paypal-síðuna mína sá ég að Voldemort (sem ég var þá ekki farin að kalla því nafni) ætlaði að rukka mig um 18 dollara í sendingarkostnað. Í stað þess að borga sendi ég honum tölvupóst og bað hann að leiðrétta þetta og senda nýja rukkun.

Þetta var 31. janúar og síðan eru ærið margir tölvupóstar búnir að ganga á milli okkar Voldemorts. Fyrst vantaði hann ebay-númerið á húfunni (sérkennilegt, því það kemur rækilega fram í hausnum á hverjum einasta tölvupósti sem við höfum sent okkar á milli), svo vildi hann meina að húfurnar hefðu verið tvær, svo var hann búinn að sjá að það var ekki og hafði komist að þeirri niðurstöðu að ég ætti bara að borga 10 dollara, og svo fékk ég póst sem var svona: ,,I can't find the HAt,I mean I do have your HAt, but I can't find on the computer, I will check again."

Svo heyrðist ekkert frá Voldemort í nokkra daga og hann hefur líklega verið að leita að húfunni í tölvunni sinni. Allt í einu kom póstur þar sem hann spurði hvenær ég ætlaði að borga. Ég svaraði náttúrlega um hæl og sagðist mundu borga um leið og ég fengi réttan reikning.

Voldemort bað um ebay-númerið. Aftur. Þótt það stæði skýrum stöfum á um það bil fimmtán stöðum í tölvupóstinum.

Ég sendi honum það. Aftur. Svo kom loksins nýr reikningur frá honum. Með sendingarkostnaði upp á 17 dollara. Lækkun um heilan dollar. Og enn talað um tvo hatta.

Nú var ég orðin frekar foj og sendi honum skeyti þar sem ég hafði kóperað það sem hann hafði sjálfur sagt um sendingarkostnað og sagði jafnframt að ef þetta væri svona mikið vandamál gætum við bara ákveðið að hætta við viðskiptin.

Svarið frá Voldemort: ,,There was mistake, it is okay, I this will be discount for you. I will redothe shipping cost for you. Can you send again, the item number, but 13.00 +the handling fees fro paypal everybody pay, that is the law. I guess you know, this."

Ég sendi honum númerið. Einu sinni enn. Og benti honum á í leiðinni að reglur Ebay banna að leggja Paypal-kostnað ofan á. Þetta var í fyrradag og ég hef ekki heyrt í Voldemort síðan.

Sko, ég gæti alveg borgað þessa 4-5 dollara aukalega - en menn eiga ekki að komast upp með að smyrja svona á. Ég þykist reyndar vita hvað hangir á spýtunni; gaurinn setti lágmarksverðið of lágt og átti von á að fá meira fyrir húfuna og er að reyna að bæta sér það upp.

Ekki veit ég hvort húfan kemur nokkurntíma og sé ekkert sérstaklega eftir henni þótt það verði ekki. En ég er hálfsmeyk um að Voldemort leggi á hana einhverja bölvun ef ég gefst ekki upp og borga aukapeninginn.

|

8.2.09

Fituð steik, spikpylsa og pressugerskökur

Ég var að skoða rétt fjörutíu ára gamla grein sem heitir Notið íslenzku heitin á matnum. Þar er dálítill listi yfir ýmsar matartegundir ,,eins og þær eru oft nefndar í daglegu tali" og svo hvað þær ,,heita raunverulega". Mér finnst gaman að skoða þennan lista. Í fljótu bragði sé ég ekki mörg atriði á honum þar sem íslenska heitið sem mælt er með hefur haft fullan sigur ef svo má segja, nú tala örugglega flestir um lundir en ekki mörbrad og falskan héra en ekki forloren hare. Jú, enginn talar reyndar um bayerskar pylsur en ég er ekkert viss um að allir þekki vínarpylsur - flestir tala bara um pylsur. Og basilíka er örugglega algengara núna en basilikum þótt enska heitið basil sé líka nokkuð útbreitt. Aspargus sést reyndar ekki svo oft en flestir tala um aspa(r)s en ekki spergil.

Svo eru þarna ýmis íslensk heiti sem maður sér stundum í uppskriftum en fáir nota, svo sem garðablóðberg, sólselja, spænskur pipar og kornflögur. Hveitilengjur, olíusósa, flesk, rifjur og brauðkollur falla í sama flokk en ekki víst að allir átti sig á hvað þar er á ferðinni. Saxbauti er náttúrlega svolítð séráparti ...

En hvað um heiti eins og fituð steik (ekki mjög freistandi nafn reyndar), hvítspað, hvítpylsa, kálfabauti, vafsteik, kurlkjöt, kryddbauti, spikpylsa, höm, appelsínuhlaup, pressugerskökur?

Ekki þar fyrir, erlendu heitin eru ekki endilega vel þekkt heldur - fricandeau, frikassé, roulade, haschis (annað mál kannski með hassí), bankeköd.

Tólf tommu pressugerskaka með þremur áleggjum og extra osti hljómar svosem ekkert voðalega freistandi.

|