Rangar myndbirtingar

Ég sé ekki betur en að á einhverjum síðum sé verið að vísa á myndir af barnaníðingnum sem eru svo alls ekki af honum, heldur alnafna hans. Ég vona innilega að ég hafi rangt fyrir mér en auðvitað er þetta það versta sem getur gerst og er reyndar viðbúið að gerist þegar menn fara að keppa í mynd- og nafnbirtingum.

Kannski eins gott þetta fari strax í blöðin. Æ, ég veit það ekki. Það hefur svosem komið fyrir þau að birta rangar myndir líka.

Ef ég man rétt var fyrsta innlenda fréttamyndin sem birtist í Mogganum dúkrista af manni sem hafði verið drepinn á eitri - minnir að blaðamaðurinn (Árni Óla) hafi látið rissa hana upp eftir minni. En fyrsti maður sem hann sá þegar blaðið kom út var sá sem hún var af - Árni hafði þá lýst vitlausum manni. Bót í máli að myndin var svo vond að það þekkti hann enginn.

En kannski man ég þetta rangt, það eru fjörutíu ár síðan ég las bókina.

Allavega skyldu menn ekki fara offari í myndbirtingum; og lágmark að birta mynd af réttum manni. Hvort sem hann er dauður eða illvirki. Slíkt bitnar alltaf á einhverjum saklausum.

Draumfarir Nönnu

Ég hef sagt frá því áður að mig dreymir nánast aldrei - eða kannski hef ég bara ekki munað draumana; þó hallast ég eftir svefnrannsóknirnar sem ég hef verið í frekar að því að ég hafi einfaldlega lengi sofið svo órólega að mig hafi ekkert dreymt. Nema einstöku sinnum eins og ég hef sagt frá.

En nú ber svo við að eftir að ég fór að sofa með grímuna dreymir mig nótt eftir nótt.

Núna í nótt dreymdi mig til dæmis að ég áttaði mig skyndilega á því í morgunsárið að ég var búin að missa af flugi til London (sem er í fyrramálið). Klukkan orðin sjö, vélin að fara í loftið og ég að gera einhverja allt aðra hluti. Og það sem meira var, í draumnum var ég að velta því fyrir mér hvort þetta væri draumur en komst að þeirri niðurstöðu að það gæti ekki verið af því að mig dreymir aldrei neitt ...

London og Jótland

Ég er í verulegri ónáð hjá barnabarni númer eitt.

Hún er nefnilega búin að komast að því að ég er að fara til London og ætla ekki að taka hana með.

Ég er ekki góð amma. Alveg sama hvað ég reyni að segja henni að London er stórhættulegur staður fyrir unglinga, sem eru drepnir þar í stórum stíl. Alveg sama hvað hún er minnt á nokkurra daga eigin yfirlýsingar um að hana langi sko ekki til London, einmitt vegna þess hvað það er hættulegur staður fyrir unglinga.

Ef mig langar að fara eitthvað ein get ég farið til Jótlands, segir hún.

Hún er sjálf að fara til Jótlands seinna í mánuðinum að keppa í fótbolta. Jótland er ekki spennandi staður. Bara alls ekki. Akkúrat staður fyrir rosknar konur sem ferðast einar. Ef þær fara til London þurfa þær hins vegar ungan ferðafélaga ...

Þyrnivegir Google og Björn Jörundur

Ég komst að því áðan að ef maður gúglar Björn Jörundur fullur kemur bloggið mitt fyrst upp. Í tvígang. Og ég sem hef aldrei skrifað neitt um Björn Jörund fullan. Hann var í mesta lagi örlítið mjúkur en það var ekkert issjú, ég var að skrifa um allt aðra hluti.

En svona villir Google stundum um fyrir fólki.

Ég veit aftur á móti ekkert hver var að leita að Birni fullum eða hvers vegna.

Atriðisorðaskrásetjarinn

Ég er að gera atriðisorðaskrá.

Kannski ekki beint uppáhaldsdjobbið mitt en samt sem áður eitthvað sem ég lendi ótrúlega oft í.

Gæti gert það að framtíðarstarfi ef annað bregst. Það er til fjöldi fólks sem hefur þetta að atvinnu.

Naaah, ætli ég mundi ekki frekar gera eitthvað annað ef ég skyldi verða fyrir barðinu á kreppunni. Verst að maður sér ekki lengur auglýsingar um ,,ráðskona óskast í sveit, má hafa með sér barn" - ég á reyndar ekkert barn til að hafa með en gæti hugsanlega fengið Sauðargæruna lánaða ef það er skilyrði.

Eða ég notfæri mér loksins sjókokkaprófið mitt og ræð mig á bát.

Nei, ætli kreppan verði nokkuð svo slæm að ég missi ritstjóradjobbið. Það verður þá að hafa það þótt einhver atriðisorðaskráning fylgi.

Ekki alveg eins lost ...

Ég sofnaði ekkert fyrir framan sjónvarpið í kvöld. Svo að kannski er bara svefngræjan að virka.

Reyndar botnaði ég lítið meira í Lost en venjulega þótt ég væri glaðvakandi. En það var þá allavega ekki vegna þess að ég væri að missa af hálfu plottinu.

Það er nú framför.

Áttræð merkisuppfinning

Þið kannist kannski við ameríska orðtakið ,,the greatest thing since sliced bread" eða eitthvað slíkt og ég var að komast að því að það þýðir einmitt nákvæmlega síðustu 80 árin ... Í dag eru nefnilega slétt 80 ár síðan Chillicote Baking Company í Chillicote í Missouri seldi fyrsta niðurskorna brauðið úr brauðskurðarvélinni sem Otto Rohwedder hafði fundið upp og selt þeim.

Ég hefði átt að uppgötva þetta fyrr, þá hefði bakarísstarfskrafturinn dótturdóttir mín getað efnt til veislu í bakaríinu sínu í tilefni dagsins, sem ætti jú að vera hátíðisdagur í öllum bakaríum um víða veröld.

Viðbrögð G8 við matarskorti

Það er enginn matarskortur hér. Þótt matarskortur sé til umræðu á fundinum.

Corn-stuffed caviar
Smoked salmon and sea urching "pain surprise" style
Winter lily bulb and summer savoury
Kelp-flavoured cold kyoto beef shabu-shabu, asparagus dressed with sesame cream
Diced fatty fles of tuna fish, avocado and jellied soy sauce and Japanese herb "shiso"
Boiled clam, tomato, Japanese herb "shiso" in jellied clear soup of clam
Water shield and pickled conger dressed with vinegar soy sauce
Boiled prawn with jellied tosazu-vinegar
Grilled eel rolled around burdock strip
Sweet potato
Fried and seasoned Goby with soy sauce and sugar
Hairy Crab "Kegani" bisque soup
Salt-grilled bighand thornyhead with vinegary water pepper sauce
Milk fed lamb from "shiranuka" flavoured with aromatic herbs and mustard
Roasted lamb and cepes and black truffle with emulsion sauce of lamb's stock and pine seed oil
Special cheese selection, lavender honey and caramelised nuts
G8 fantasy dessert

Allt saman voðavoða gott örugglega. En mig langar ekkert sérstaklega í það, hvernig sem á stendur.

Ekki einu sinni steiktu gúbbífiskana.

Fílakonan

Jæja, ég er búin að sofa í þrjár nætur með svefngrímuna mína. Ranann, eins og barnabörnin segja - reyndar er Sauðargæran ekki búinn að sjá græjuna en ég setti grímuna á mig í gær fyrir systur hans til að skemmta henni, hún leit á mig og sagði: -Ég ætla aldrei að gista hjá þér aftur.

Ég veit ekki hvort viðbrögð bróður hennar verða þau sömu en hann er búinn að frétta af rananum og er spenntur fyrir að fá að sjá hann. Kannski ég bjóði honum gistingu fljótlega, það kemur þá í ljós hvort honum finnst amman vera eins og vanskapaður fíll eða geimvera eða Hannibal Lecter eða eitthvað - nei, hann veit annars ekkert hver Hannibal Lecter er.

Mér gengur annars ágætlega að venjast grímunni - sem er bara nefgríma, ég þarf líklega ekki græjuna sem sett er yfir allt andlitið og lætur mann líta út eins og - tja, eins og geimveru - nema ég er víst með extra small nasir, það hafði mér ekki dottið í hug. (Svo komst ég að því að fólk með litlar nasir á víst að vera sparsamara en aðrir. Það hefði mér heldur aldrei dottið í hug. Né neinum sem þekkir mig.)

Virkar þetta? Tja, ég fór í tékk í morgun og tækið sýndi að ég hafði sofið alveg ljómandi vel þessar þrjár nætur (hmm, nema kannski þá fyrstu en það má skrifa á rauðvínið) - engin öndunarstopp eða neitt. Ég var líka alveg óvenju hress í gær. Reyndar grútsyfjuð í morgun en ég fór líka alltof seint að sofa í gærkvöldi (nótt).

Svo að ég er bara bjartsýn á þetta. Get kannski bráðum farið að fylgjast með sjónvarpsþáttum aftur án þess að sofna stöðugt og missa af plottinu.

Náttúruleg fæðing

Ég var að lesa viðtal í Fréttablaðinu við ljósmóður sem hafði tekið sjálf á móti barninu sínu heima hjá sér. Jújú, örugglega æðislegt og frábær upplifun og ofsalega náttúrulegt og allt það og þótt hún tæki sjálf á móti barninu var hún með tvær aðrar ljósmæður sem sátu og horfðu á og manninn sinn og vinkonu sína og ljósmyndara og amerískan fæðingapott (ég hef reyndar aldrei skilið hvað er svona rosalega náttúrulegt við að fæða börn oní polli en það er ábyggilega verkjastillandi, það er annað mál).

En allavega, allan tímann á meðan ég var að lesa viðtalið var ég að hugsa um Hólmfríði á Skatastöðum, langalangömmu mína, sem mér skilst að hafi átt einhver af börnum sínum frammi á Skatastaðaseli og tekið á móti þeim sjálf þótt ekki væri hún ljósmóðir því ekki var öðrum til að dreifa, hún alein í selinu.

Það er náttúruleg fæðing.

Sum lifðu meira að segja. Ég veit ekki hvort Sveinn langafi fæddist í selinu en hann er allavega fæddur á seltíma svo það getur vel passað.

Tvífarar

Já, hér er hundurinn vinur hans Úlfs. Við vorum sammála um að hann minnti óhugnanlega á Gene Simmons. Nema Úlfur auðvitað, hann veit ekki hver Gene Simmons er.

Pikknikk

Veðrið var kannski ekki alveg eins æðislegt og búið var að spá en það var fínasta pikknikkveður fyrir því. Boltastelpan kom til mín um hádegið og smurði fullt af góðum samlokum og ég bakaði tvær tegundir af múffum og svo fórum við á Þingvelli með foreldrum hennar og bróður, þegar þau voru búin að horfa á Formúluna. Pökkuðum öllu niður í flottu pikknikktöskuna (sem er arftaki minnar frægu pikknikkörfu en ekki eins fræg, en mun virðulegri) og allir kátir, ekki síst Sauðargæran, sem kom sér í kynni við hund sem var að sniglast í kringum okkur og fór afskaplega vel á með þeim.

Alveg bara ljómandi ljúft.

Uppivöðslusemi aðilanna

Meira hvað þessir aðilar eru farnir að vaða uppi úti um allt. Þórdís talaði um framferði þeirra í Vestmannaeyjum í gær og ég benti á að þeir væru líka hér í miðbænum. Og nú sé ég á mbl.is að þeir hafa líka verið á ferðinni í Hörgárdal og á Akureyri, allavega þrír saman. ,,Aðilarnir í bifreiðinni voru handteknir og kom þá í ljós að í íþróttatöskunni var þýfi úr íbúð á Akureyri en aðilinn hafði brotist inn í þá íbúð skömmu áður en þeir voru stöðvaðir." - Nei, líklega voru aðilarnir fyrir norðan fleiri því að seinna í fréttinni er sagt frá árekstri á Grenivíkurvegi og viti menn, það voru aðilar í báðum bílunum. Sennilega ekki þeir sömu og löggan hirti á Akureyri.

Þeir eru víða þessir aðilar. Og ef þeir hafa hægt um sig, þá eru það bölvaðir hælisleitendurnir og samlandarnir sem eru með vesen.

Semsagt, ef maður ætlar út að skemmta sér þessa dagana er um að gera að forðast bæði hælisleitendur og samlanda, en þó umfram allt alla aðila. Þeir eru háskalegastir.