Prófkjör og baðferð

Á Facebook er verið að bjóða mér bæði á opið hús í kosningamiðstöð VG og karlakvöld Samfylkingarinnar. Annað strandar eiginlega á því að ég er ekki karl - þótt baugfingurnir segi annað - og hitt á því að ég er ekki vinstrigræn. Svo ég held ég sitji heima. Hef svosem nóg að gera (en er ekki akkúrat að gera það núna, er samt að bræða með mér að standa upp bara til að setjast við hina tölvuna, sem ég nota þegar ég þarf að gera eitthvað af viti).

Reyndar þarf ég líka að fara að standa upp til að rista í pöruna á svínasteikinni sem á að vera í kvöldmatinn.

Ég fór í bað í gærkvöldi og tók með mér fullt umslag af prófkjörsbæklingum og ætlaði að nota tímann í baðinu til að ákveða hverja ég ætlaði að kjósa. Eða fyrirfram var ég eiginlega búin að ákveða að kjósa þá sem sendu íburðarminnsta kosningaáróðurinn. Og í svarthvítu. Nema þegar ég byrjaði að fletta sá ég að það gekk ekki upp því að það voru eiginlega allir með eitthvað voða fínt litprentað. Nema Jón Baldvin, sem ég ætla bara alls ekki að kjósa. Það var ekki einu sinni mynd af honum en það vita nú allir hvernig hann lítur út. Reyndar veit ég hvernig flestir hinna líta út svo að þeir hefðu ekkert þurft að hafa litmyndir heldur. Össur var með mynd bæði af framhliðinni og hnakkanum á sér, sem ég skildi nú ekki alveg. En ég hef ekki alltaf skilið Össur.

Þannig að ég get ekki notað þetta prinsipp og er litlu nær um hverja ég á að kjósa. Nema Pétur Tyrfings og Björgvin Val náttúrlega, ég kýs þá því þeir sendu ekki neitt. Það fannst mér eftirbreytnivert. Og Jóhönnu, ég mundi nú kjósa hana þótt hún sendi mér kosningaáróður í þrívídd.

Segi ekki að baðferðin hafi verið ónýt. En ég hafði ekki það gagn af henni sem ég ætlaði mér.

Spergilkál, klám og Kant

Athyglisverð grein hérna (sem ég er reyndar ekki búin að lesa alveg til enda) um hvernig viðhorf til matar og kynlífs hafa eiginlega snúist alveg við á undanförnum áratugum. Höfundurinn setur upp dæmi um tvær konur (Betty, þrítug 1958) og Jennifer (þrítug í dag) og ber saman viðhorf þeirra til matar og kynlífs (sjá kaflann Broccoli, pornography and Kant):

,,... what the imaginary examples of Betty and Jennifer have established is this: Their personal moral relationships toward food and toward sex are just about perfectly reversed. Betty does care about nutrition and food, but it doesn’t occur to her to extend her opinions to a moral judgment — i.e., to believe that other people ought to do as she does in the matter of food, and that they are wrong if they don’t. In fact, she thinks such an extension would be wrong in a different way; it would be impolite, needlessly judgmental, simply not done. Jennifer, similarly, does care to some limited degree about what other people do about sex; but it seldom occurs to her to extend her opinions to a moral judgment. In fact, she thinks such an extension would be wrong in a different way — because it would be impolite, needlessly judgmental, simply not done.

On the other hand, Jennifer is genuinely certain that her opinions about food are not only nutritionally correct, but also, in some deep, meaningful sense, morally correct — i.e., she feels that others ought to do something like what she does. And Betty, on the other hand, feels exactly the same way about what she calls sexual morality."

Athyglisvert. Ekki síst fyrir mig sem starfsmann lífsleiknideildar forlagsins, þar sem matreiðslu- og kynlífsbækur eru einmitt aðalmáli ...

Plútó og krónan

Var það ekki 2006 sem var ákveðið að Plútó væri ekki lengur reikistjarna? Jæja, þeir í Illinois eru bara ekkert sáttir við það. Gaurinn sem uppgötvaði Plútó var nefnilega frá Illinois svo það er verið að taka af þeim heiðurinn.

Þannig að þingið í Illinois samþykkti tillögu um að Plútó væri bara víst reikistjarna. Og 13. mars, næsti föstudagur, er Plútódagur.

Þetta er svona eins og þegar sumir Íslendingar halda því fram að krónan sé bara víst fullgildur gjaldmiðill.

Uppskriftir á snara.is

Ég ætla bara að nota tækifærið og plögga aftur vefbókasafnið á snara.is, Matarást og uppskriftasafnið, þar sem hægt er að finna uppskriftir að hvort heldur sem er hafragraut, ferskosti, súkkulaðibúðingi eða kalkúna.

Bjartsýna konan, kreppan, bókin og uppskriftasafnið - og barnabörnin

Æjá, ég er víst með blogg ...

Nei, ég var nú ekkert búin að gleyma því. Hef bara ekki verið í nokkru einasta bloggstuði í langan tíma. Búin að fá yfir mig nóg af öllu kreppukláminu og vil bara fá að vera bjartsýn í friði.

Jæja, kannski ekki. En það er ekki allt á leið til andskotans, ég skulda engin bílalán, sólin skein í dag og ég á yndisleg barnabörn sem eru hörkudugleg (allavega Hekla) og munar ekkert um að borga einhverjar Icesave-skuldir í framtíðinni. Svo að ég passa eiginlega ekkert inn í bloggmóralinn þessa dagana.

Og svo eru að koma kosningar - eða fyrst prófkjör reyndar - og þá snýst náttúrlega allt um það. Ég lýsi hérmeð yfir stuðningi við Jóhönnu og Pétur Tyrfingsson í prófkjöri Samfylkingarinnar og aðra ekki (jú, ég kýs örugglega einhverja fleiri en hverjir það verða er ekki komið á hreint).

Þá er það afgreitt og hægt að fara að tala um aðra hluti.

Dóttursonurinn er búinn að læra á msn og finnst það æðislegt fyrirbæri. Það er merkileg upplifun; ég hef aldrei áður staðið í örum skriflegum samskiptum við sjö ára barn sem neitar að viðurkenna stafinn Þ. (Hann er reyndar byltingarsinnaður og ég fékk skeyti frá honum í dag upp úr þurru: NIÐUR MEÐ ALÐÍNGI - æi, ég var búin með pólitíkina ...)

Nýja bókin mín er að verða tilbúin í prentsmiðju. Ég er mjög ánægð með hana í alla staði, enda er þetta góð bók þótt ég segi sjálf frá og verður held ég nokkuð falleg. Uppfull af góðum uppskriftum náttúrlega. Dótturdóttirin benti á eina myndina og sagði ,,þetta er eini góði rétturinn í bókinni" en ég er ekki alveg sammála henni. Þennan rétt hafði hún reyndar eldað sjálf fyrir myndatökuna en ég held að það hafi ekki skipt máli - henni fannst hann mjög góður (en hún smakkaði reyndar fæsta af hinum).

Það hefur kannski ekki farið framhjá neinum að vefbókasafn Forlagsins (www.snara.is) er opið öllum þessa vikuna (annars kostar áskriftin innan við 500 krónur á mánuði fyrir gommu af orðabókum og allskyns gúmmulaði). Þar er Matarást búin að vera síðan í fyrra en í dag bættist þar við safnið Uppskriftir Nönnu - að stofni til er það Matreiðslubók Nönnu en ég hef bætt töluverðu við og á eftir að bæta mun meiru við á næstunni, enda á ég fullt af uppskriftum á lager sem hafa aldrei komið á bók. Einhverjar hafa reyndar birst hér á blogginu, í blöðum og annars staðar. Þetta ætla ég allt að setja þarna inn og stefni á að þarna verði a.m.k. 5000 uppskriftir í vor - hvernig sem gengur að standa við það ...