(function() { (function(){function c(a){this.t={};this.tick=function(a,c,b){var d=void 0!=b?b:(new Date).getTime();this.t[a]=[d,c];if(void 0==b)try{window.console.timeStamp("CSI/"+a)}catch(l){}};this.tick("start",null,a)}var a;if(window.performance)var e=(a=window.performance.timing)&&a.responseStart;var h=0=b&&(window.jstiming.srt=e-b)}if(a){var d=window.jstiming.load;0=b&&(d.tick("_wtsrt",void 0,b),d.tick("wtsrt_","_wtsrt", e),d.tick("tbsd_","wtsrt_"))}try{a=null,window.chrome&&window.chrome.csi&&(a=Math.floor(window.chrome.csi().pageT),d&&0=c&&window.jstiming.load.tick("aft")};var f=!1;function g(){f||(f=!0,window.jstiming.load.tick("firstScrollTime"))}window.addEventListener?window.addEventListener("scroll",g,!1):window.attachEvent("onscroll",g); })();

Konan sem kyndir ofninn sinn

Eldhúsreyfarar miðaldra matargúrús á Skólavörðuholtinu

3.2.07

Hreisturspurning

Ef þið væruð að skafa hreistrið af fiskroði, væruð þið þá að hreistra fiskinn eða afhreistra hann?

|

Kettir og afar

Einkasonurinn og skylmingastúlkan eru búin að fá sér kött. Drengurinn er mjög hróðugur yfir þessu, var búinn að nöldra í mér í fimmtán ár um leyfi til að fá kött á heimilið en hafði ekki erindi sem erfiði. En nú er kominn köttur á Kárastíginn. Vonandi verður hann skárra heimilisdýr en brjálaða kanínan sem át svalirnar og óþolandi páfagaukurinn Davíð Oddsson.

Annars var ég að kvarta yfir því við Sauðargæruna þegar hann gisti hjá mér að mig vantaði einhvern til að kúra hjá þegar hann væri ekki og spurði hann hvort ég ætti frekar að fá mér kött eða afa.

-Afa, svaraði drengurinn strax. Hann hefur góða reynslu af öfum og er alveg til í að fjölga slíkum.

Bætti svo við eftir smáþögn. -En amma, þú manst að ég ætla að giftast þér þegar ég verð stór og þá verð ég afi minn.

|

1.2.07

Berar stelpur eða ...

Ég kemst ekki hjá því að vita stöðuna í leiknum við Rússa þótt ég sé í öðru herbergi. Dóttursonurinn er nefnilega að horfa og lýsir leiknum fyrir mér í leiðinni. Hefur engan skilning á áhugaleysi mínu. Reyndar kom það glöggt í ljós þegar Danaleikurinn stóð yfir á þriðjudaginn; ég var í saumaklúbb og engin okkar hafði meiri áhuga en svo að þótt (uppkomin) börn væru að hringja öðru hverju datt engum í hug að spyrja um stöðuna eða hvernig hefði farið.

Drengurinn er líka að háma í sig kleinur og gefur mér skýrslu um hverja og eina þeirra. Hann les nefnilega brjóstamynd(ir) út úr hverri kleinu og þarf endilega að láta mig vita af því. Fjölda og lögun brjósta. Einhver mundi nú kannski hafa áhyggjur af þessum brjóstaáhuga drengsins. Ekki ég samt.

Þessa stundina er reyndar hálfleikur og hann er að syngja fyrir mig:

Hundurinn datt í sjóinn
á föstudaginn var.
Hitti hana Grýlu
og pissaði í brækurnar.

-Sumir hundar eru nefnilega í buxum, sá hann ástæðu til að útskýra.

Þessi börn.

Fyrst ég er annars að tala um börn - og brjóst - þá rifjast upp fyrir mér gömul saga. Einhverntíma rétt um 1990, þegar Iðunn var öflug í teiknimyndasöguútgáfunni, var ákveðið að gera tilraun með öðruvísi teiknumyndasögur, ætlaðar eldri lesendum, og gefnar út ein eða tvær slíkar. Einhvern daginn hringir svo bálreiður faðir; hafði farið að fletta teiknimyndasögubók hjá syni sínum og rekist á myndir af byssum og berum stelpum.

Ég hafði nú ekki lesið þessa bók, bara flett henni eitthvað og mundi eftir byssumyndum en ekki hinu. En ég hafði gefið einkasyninum, sem þá var líklega átta eða níu ára, bókina og þar sem hann var staddur hjá mér spurði ég hann hvort það væru berar stelpur í bókinni.

-Nei, sagði hann. Bætti svo við: -Bara naktar konur.

Mér hefur oft dottið þetta í hug síðan af ýmsum tilefnum. Sumir sjá berar stelpur þar sem aðrir sjá naktar konur.

|

31.1.07

Tvöunda gistingin

Sauðargæran á að fá að gista hjá mér aðra nótt af því að hann fer ekki með á Blönduós í jarðarför langömmu sinnar. Hann hlakkar töluvert til.

-Það er bara í tvöunda skipti sem ég gisti hjá þér í nýja húsinu, sagði hann áðan.

Ég er nú ekki vön að leiðrétta börn mikið (,,því læra börn málið að fyrir þeim er haft", er mitt viðhorf, ekki ,,því læra börnin málið að þau eru leiðrétt í tíma og ótíma") en ég gat nú ekki stillt mig um að benda honum á að þótt sjöunda skipti sé góð og gild íslenska er tvöunda skipti það ekki.

Sjálfum fannst drengnum vitleysan svo fyndin að hann endurtók hana. Oft.

|

30.1.07

Kaffi og korselett

Jú, einhvernveginn þarf að keppa við Starbucks ...

Einkasonurinn var nú kaffibarþjónn um tíma. Ég sé hann samt ekki fyrir mér á korseletti.

|

Mánudagur til mæðu

Þetta gengur nú ekki. Hérna ætlaði ég á Vínbarinn í gær og þá var hann bara lokaður ... Til allrar hamingju bara fram yfir miðja viku vegna breytinga; verið að mála og svona. En þetta var áfall. Eitthvað verður nú að vera á föstum stað í tilverunni, svona á tímum breytinga og umróts.

Þá var ákveðið að fara bara á Apótekið og fá sér rauðvín þar. Nei, viti menn, lokað á Apótekinu vegna árshátíðar starfsfólks eða einhvers slíks. Er þetta ábending til mín um að ég eigi bara ekkert að fá mér rauðvínsglas á mánudegi?

En það var opið á Café Paris.

|

28.1.07

Megrunaraðferðir

Ég notaði tækifærið þegar við komum við hjá pabba og mömmu á Króknum í gær og steig á vigtina á baðinu. Ég á nefnilega ekki vigt (eða jú, ég á hana en hún er týnd) og hef ekki vigtað mig síðan snemma í haust.

Ég reyndist tíu kílóum léttari en síðast. Það er vissulega af nógu að taka - en samt ...

Það virkar semsagt næstum eins vel fyrir mig að hætta að vinna hjá Birtíngi eins og hjá Eyþóri Arnalds að hætta að keyra bíl.

|