(function() { (function(){function c(a){this.t={};this.tick=function(a,c,b){var d=void 0!=b?b:(new Date).getTime();this.t[a]=[d,c];if(void 0==b)try{window.console.timeStamp("CSI/"+a)}catch(l){}};this.tick("start",null,a)}var a;if(window.performance)var e=(a=window.performance.timing)&&a.responseStart;var h=0=b&&(window.jstiming.srt=e-b)}if(a){var d=window.jstiming.load;0=b&&(d.tick("_wtsrt",void 0,b),d.tick("wtsrt_","_wtsrt", e),d.tick("tbsd_","wtsrt_"))}try{a=null,window.chrome&&window.chrome.csi&&(a=Math.floor(window.chrome.csi().pageT),d&&0=c&&window.jstiming.load.tick("aft")};var f=!1;function g(){f||(f=!0,window.jstiming.load.tick("firstScrollTime"))}window.addEventListener?window.addEventListener("scroll",g,!1):window.attachEvent("onscroll",g); })();

Konan sem kyndir ofninn sinn

Eldhúsreyfarar miðaldra matargúrús á Skólavörðuholtinu

21.7.06

Ljóðaþýðingar ...

Á vefnum brudkaup.is (nei, það var nú ekki út af spádómum spákonunnar sem ég rambaði þar inn) er einhver lagstur í ljóðaþýðingar. Viðkomandi ætti kannski að taka sér eitthvað annað fyrir hendur:

Rigning, rigning farðu burt
hættu að lemja á rúður.
Láttu brúðkaupsdaginn kjurt
í sólskini með minni brúður.

Ekki að ensku útgáfurnar séu endilega neitt betri ...

|

Fimm ára

Æi, hvernig á maður að nenna að blogga í svona veðri?

Blaðið er líka nýfarið í prentsmiðju og þá tekur alltaf smátíma að hlaða batteríin aftur. Ég er reyndar búin að skila einni grein en hún er mikið til óbreytt erindi sem ég hélt á afar fámennri ráðstefnu í vor og fjallar að stórum hluta um það af hverju á ekki að troða kæstum hákarli upp á (eða upp í) blásaklausa útlendinga.

Við Sauðargæran grilluðum kjúklingapinna og kokkteilpylsur í gær (hann sá um pylsurnar, ég um kjúklinginn), eftir að við vorum búin að fara saman í dótabúð og kaupa nýjan háf handa honum í staðinn fyrir þann sem var hirtur af honum í vopnaleitinni á Kastrup. Nýi háfurinn kostaði heilar 45 krónur og drengurinn er mjög ánægður, segir að hann sé fínni en sá gamli (ég er reyndar ekki á sama máli en fyrst hann er ánægður er allt í lagi). Um leið skoðuðum við dót sem til greina kemur að amman gefi drengnum í afmælisgjöf - okkur leist báðum best á slökkviliðsmannadót, m.a. með gjallarhorni sem vonandi framleiðir mikinn hávaða og slökkvitæki sem vonandi virkar líka sem vatnsbyssa.

Fimm ára afmæli drengsins er einmitt á morgun þótt ekki verði haldið upp á það þá þar sem nánast engir ættingjar eru í bænum.

Alveg væri ég til í að vera fimm ára núna. Mun einfaldara líf.

|

18.7.06

Spádómarnir miklu

Þetta var nú meiri vitleysan.

Og ekki orð um það meir.

|

Af vegtyllum

Ég sá í Fréttablaðinu í morgun að Gunna systir er komin í stjórn Evrópsku rafstaðlasamtakanna, fyrst kvenna. Til hamingju með það.

Það fjölgar alltaf fjöðrunum sem ég get skreytt mig með. Nú get ég sagt ,,systir mín varaforsetinn", ,,dóttir mín skrifstofustjórinn", ,,tengdadóttir mín Norðurlandameistarinn", ,,bróðir minn prófessorinn" og svo framvegis.

Svo gæti ég auðvitað líka sagt ,,langafi minn dannebrogsmaðurinn" en langafi var víst ekki uppnæmari fyrir þeirri vegtyllu en svo að enginn vissi að hann hefði fengið hana fyrr en eftir að hann dó og medalían fannst ofan í skúffu hjá honum. Ég var að hugsa um að gera þetta líka þegar ég fæ fálkaorðuna en það gengur víst ekki lengur.

|

17.7.06

Breytt til í barferðum

Við ritstjórnarfulltrúinn komum að lokuðum dyrum á Vínbarnum áðan. Meira en klukkutíma eftir auglýstan opnunartíma ... þetta er nú bara skandall. Við alveg vegalausar - nú er horfið Norðurland og allt það - en svo mundum við eftir barnum á Salti. Hann hefur meira að segja þann kost fram yfir Vínbarinn að maður getur keypt sér tapasdisk. Sem við gerðum og gæddum okkur á kengúrukjöti, lambafilleti, hlýra, hráskinku og einhverri súpu. Bara fínt og þótt við skiptum með okkur einum svona diski (1400 krónur), þá dugir það til þess að mig langar ekkert í kvöldmat.

Ekki svo slæmt. Kannski við komum oftar við á Salti eftir vinnu. Ekki síst þegar við erum svangar.

|

Af spádómum

Ég er að fara til spákonu. Í fyrsta skipti á ævinni.

Neineinei, ég er ekki búin að glata glórunni (eða ekkert meira en vant er). Það er innifalinn matur og rauðvín ... og skemmtilegur félagsskapur. Á meðan ég þarf ekkert að leggja sérstaklega eyrun við því sem spákonan tuðar, þá er ég alveg til í það.

Reyndar var ég sjálf bara nokkuð efnileg spilaspákona hér í eina tíð. Steinhætti þegar ég áttaði mig á því að einhverjir voru farnir að taka mark á því sem ég var að bulla.

Annars fór ég að lesa stjörnuspána mína í Nýju lífi áðan. Byrjaði á að lesa fiskana (eins og margsinnis hefur komið fram er allt óljóst um raunverulegt stjörnumerki mitt) og þar stóð meðal annars að ástarævintýri við útlending lægi í loftinu. Svo las ég hrútinn og þar stóð að ég ætti að vera dugleg að hreyfa mig og standa við heit varðandi heilsurækt. Ég kannast að vísu ekki við nein slík heit en snarhætti að lesa og ákvað að þennan mánuðinn væri ég fiskur. Nú bíð ég bara spennt eftir útlendingnum.

|

16.7.06

Íbúð óskast

Veit einhver um íbúð til leigu í haust? Einkasonurinn og tengdadóttirin verða á götunni í ágústlok ef svo fer sem horfir. (Jújú, hann getur flutt aftur heim og ég missi vinnuherbergið sem ég er að koma mér fyrir í - en hvorugu okkar þykir það fýsilegur kostur.)

Ef einhvern skyldi nú vanta rólega og reyklausa leigjendur, hafið þá endilega samband.

|