(function() { (function(){function c(a){this.t={};this.tick=function(a,c,b){var d=void 0!=b?b:(new Date).getTime();this.t[a]=[d,c];if(void 0==b)try{window.console.timeStamp("CSI/"+a)}catch(l){}};this.tick("start",null,a)}var a;if(window.performance)var e=(a=window.performance.timing)&&a.responseStart;var h=0=b&&(window.jstiming.srt=e-b)}if(a){var d=window.jstiming.load;0=b&&(d.tick("_wtsrt",void 0,b),d.tick("wtsrt_","_wtsrt", e),d.tick("tbsd_","wtsrt_"))}try{a=null,window.chrome&&window.chrome.csi&&(a=Math.floor(window.chrome.csi().pageT),d&&0=c&&window.jstiming.load.tick("aft")};var f=!1;function g(){f||(f=!0,window.jstiming.load.tick("firstScrollTime"))}window.addEventListener?window.addEventListener("scroll",g,!1):window.attachEvent("onscroll",g); })();

Konan sem kyndir ofninn sinn

Eldhúsreyfarar miðaldra matargúrús á Skólavörðuholtinu

25.2.06

Frábært að sjá 22 ára stelpu vinna kokkakeppnina á Food & Fun og skjóta frægum kokkum ref fyrir rass. Þessi stelpa á örugglega eftir að láta til sín taka í framtíðinni og miðað við það sem ég sá til hennar í keppninni er hún vel að titlinum komin. (Nei, ég fékk því miður ekki að smakka á neinu af því sem hún gerði.)

Ég var á keppninni í allan dag og skemmti mér bara vel. Gaman að fylgjast með fagmönnum að störfum og sjá ýmislegt nýtt.

Ég hef áður sagt að ef ég geri eitthvað tvö ár í röð sé það þar með orðið að tradisjón. Þess vegna lýsi ég því yfir að það er orðið tradisjón hjá mér að fara á Bæjarins bestu og pulsa mig upp áður en ég fer á kokkakeppnina á F&F. Klikkar ekki.

|

Fór á Salt í gærkvöldi í smakk. Við fengum rækju- og lúðu-ceviche, saltfisk með spínati og kryddjurtum, lambafillet með chimichurri-sósu og ís með dulce de leche á eftir. Þetta var allt gott, lambið alveg sérstaklega gott og fyrsti rétturinn líka. Það eina sem mér fannst ekki alveg í lagi var að kryddjurtirnar yfirgnæfðu saltfiskinn dálítið - of mikið dill - en það var allt í lagi því þetta var bara vöndur ofan á saltfiskbitanum og ekkert mál að sópa honum af. Við vorum mjög sáttar.

Við gátum ekki setið lengi yfir réttunum þar sem það var verið að skjóta okkur þarna inn á milli og ekki gátum við látið fólk bíða eftir borðinu - en það gerði ekkert til því að barinn á Salti er býsna notalegur. Þar hittum við Gauja og Völu í GV, sem voru að koma af Apótekinu, og sátum með þeim það sem eftir var kvölds. Enduðum svo á Vínbarnum (þar sem við byrjuðum reyndar líka) en ég entist reyndar ekki lengi, var komin heim fyrir eitt.

Ég hef ekki borðað á Salti áður en er ákveðin í að fara þangað aftur fljótlega, leist vel á mig þar.

|

24.2.06

Gallinn við lífið þessa dagana er að það er allt of margt að gerast ... allt of margir staðir sem ég þarf að vera á/langar að vera á í einu. Þurfti í dag að rjúka úr miðjum mjög áhugaverðum Food & Fun-hádegisverði í Hótel- og matvælaskólanum vestur á Hótel Sögu til að halda erindi, missti fyrir vikið af öðru erindi sem ég hefði viljað heyra ...

Svo er það eitthvert matarrölt í kvöld, aldrei að vita hvar það endar, matreiðslukeppnin á morgun, matarboð annað kvöld, bollukaffi á sunnudaginn. Food & fun útum allt semsagt. Kannski bara eins gott að Gestgjafanum er ekki boðið á galadinnerinn á Nordica á laugardagskvöldið.

|

Við fórum í smakkferð í gær. Byrjuðum á Vox og fengum reyndar allan Food & Fun-seðilinn. Allt gott en léttreykti saltfiskurinn stóð upp úr. Hittum finnska kokkinn. Vorum leystar út með konfektkössum.

Fórum svo á Holtið, hittum ekki franska kokkinn en fengum að smakka saltfisksfernuna hennar, sem var ansi góð.

Enduðum hjá Sigga Hall, spjölluðum við norska kokkinn og fengum frábæran þorsk.

Þorskurinn stóð semsagt alls staðar upp úr. Skil ekki fólk með þorskfordóma. Frábærlega góður fiskur ef rétt er farið með hann.

Spurning hvað við gerum í kvöld ...

|

23.2.06

Fólk hefur eitthvað verið að gera lista yfir mat sem það borðar ekki, með ýmsum tilbrigðum. Hér eru mínir listar, þeir eru frekar stuttir:

Matur sem mér finnst svo vondur að ég borða hann alls ekki:
Man ekki eftir neinu.

Matur sem mér finnst ekkert vondur en ég borða samt ekki:
Reykt ýsa.

Matur sem ég er ekkert að sækjast neitt eftir en mundi borða ef einhverjum dytti í hug að bjóða mér:
Kæst skata.

Matur sem ég get vel borðað en sé enga sérstaka ástæðu til að láta ofan í mig:
Tofu.
(Ókei, þessi listi gæti verið mun lengri, það eru ýmsar unnar vörur og skyndibitar sem gætu svosem fallið hér undir - en ég borða þetta allt ef ég er svöng og ekki annað í boði.)

Þá er það nú eiginlega upptalið, held ég. Man allavega ekki eftir fleiru í fljótu bragði.

|

Réttur dagsins frá Grænum kosti í dag var moussaka með grísku salti.

Það stóð allavega á matseðlinum. Ég hélt að þarna ætti að standa grísku salati en þegar ég opnaði matarbakkann sá ég ekkert sem minnti mig á grískt salat nema tvær svartar ólífur. Hitt var pasta og jöklasalat. Einhverjir tveir eða þrír teningar sem ég held að hafi verið tofu fremur en vondur fetaostur. Engir tómatar. Engin gúrka. Engin ólífuolía. Engar kryddjurtir ...

Svo að ég held að þetta með saltið hafi bara ekki verið prentvilla. En ég er reyndar ekki með nógu næma bragðlauka til að greina salt eftir löndum.

Það stóð líka moussaka á seðlinum. Hm. Eggaldin- og tofusneiðar á kúskúsbeði með ólseigum sambræddum gerviosti ofan á. Hrísgrjón með.

Svona matur minnir mig á af hverju ég er ekki grænmetisæta.

|

22.2.06

Jæja, þá er blaðið á leiðinni í prentsmiðju - við kláruðum það um tíuleytið í kvöld. Reyndar gekk það ágætlega, við lentum þó í smákrísu í dag af því að við áttuðum okkur á því að mynxdin sem við höfðum valið á forsíðuna passaði einhvernveginn ekki þar þótt hún sé annars mjög flott og njóti sín vel inni í blaðinu. En við höfðum nú úr fleiri flottum myndum að velja svo að þetta bjargaðist og ég er sátt við niðurstöðuna.

Ég fór á blaðamannafund vegna Food & Fun á Nordica í hádeginu. Allt vaðandi í kokkum en minna af blaðamönnum. Kannski vegna þess að drykkirnir voru allir óáfengir ... nei, bíddu við, kokkar eru alveg jafndrykkfelldir og blaðamenn (eða verri) svo að það er líklega ekki skýringin.

Ætli við förum svo ekki á eitthvert rölt annað kvöld og kíkjum inn á nokkur veitingahús, heilsum upp á nokkra kokka og svona. Það er ýmislegt freistandi í boði.

|

Stóllinn minn brotnaði undan mér áðan þegar ég settist í hann.

Er verið að segja mér eitthvað?

Kannski leggja meiri áherslu á fun en food næstu dagana?

|

Þegar saumaklúbburinn minn fór að hittast fyrir meira en aldarfjórðungi töluðum við um stráka og djamm og námið. Það þróaðist fljótt yfir í óléttur og fæðingarsögur, vinnu, íbúðakaup, barnauppeldi, eldhúsinnréttingar, svo starfsframa, skilnaði, unglinga ... Núna tölum við um barnabörnin, gráu hárin, breytingarskeiðið, þvagleka, fjarsýni, lífeyrissparnað, elliheimili ...

Við, miðaldra? Tjaaa ...

Það er samt ekki hlegið neitt minna í saumaklúbbnum en áður. Meira ef eitthvað er.

|

21.2.06

Af því að ég var að lesa um gleði pönkarans yfir því að hafa fengið veitingahúsareikning þótt hún væri með karlmann í för, þá datt mér í hug þegar ég var að fara með börnin til Þýskalands fyrir mörgum árum að heimsækja Gunnu systur og Bjarna mág, sem voru þá í námi í Karlsruhe. Ég keypti flugmiðana í gegnum ferðaskrifstofu.

Þegar ég kom á staðinn til að sækja miðana var farið að leita að þeim en þeir fundust ekki þar sem þeirra var von. Ég var með kvittun í höndunum upp á að ég væri búin að borga og það var haldið áfram að leita. Og leitað og leitað og leitað. En hvergi fundust neinir miðar á mínu nafni.

Eftir 10-15 mínútur, þegar allt starfsliðið í afgreiðslunni var kominn í málið, fundust miðarnir loksins. Þeir höfðu auðvitað verið settir á nafn karlmannsins í hópnum.

Sem var þriggja ára.

|

Ég veit að ég tala oft um hvað ég er utan við mig og sveimérþá ef þetta er ekki að ágerast. Ég áttaði mig á því áðan að ég var búin að skrifa drjúgan hluta af pistli í Gestgjafann hér inn á bloggið og átti eiginlega bara eftir að ýta á publish.

Eða nei, þetta er líklega ekkert verra en vanalega. Ég man til dæmis eftir því að einu sinni þegar ég var unglingur var Gamli-Sveinn föðurbróðir minn einu sinni í hádegismat heima á Smáragrundinni og sat við hliðina á mér. Ég varð skyndilega vör við að allir voru farnir að stara á mig og áttaði mig þá á því að ég var farin að borða fiskinn af diskinum hans en ekki af mínum eigin diski, sem var beint fyrir framan mig.

|

20.2.06

Nokkrar myndir úr afmælinu í gær má sjá hér. Ég hafði ekki tíma til að mynda sjálf en skylmingastúlkan tók það að sér.

Mikið var ég nú ánægð með það í gær að vera með tvöfalda uppþvottavél.

|

19.2.06

Við héldum upp á 25 ára afmæli efnafræðistúdentsins í kvöld og hér er matseðillinn:

Trufflu/Stiltonbragðbættar gougères (vatnsdeigsbollur) - Tio Pepe

Kumminkrydduð gulrótasúpa með klettasalatspestói og smjördeigslengum - Meursault du Chateau Meursault 2003

Andalifur á ristuðu brauði með gráfíkjumauki og andalifrarkæfa á litlum lummum með rósmarínsultu - Pujol Muscat de Rivesaltes A.O.C. 2005

Rækjukokkteill með vanillu-chilitómatsósu og söltuðum kornhænueggjum - Chassagne-Montrachet Roux pére et fils Premier cru 2004

Nautalund með púrtvíns-soðsósu, villisveppum, dvergspergli, sykurbaunum, sætuhrökkbaunum og kartöflum steiktum í andafeiti - D'Arenberg The Footbolt Shiraz 2001

Kaffikryddað crème brûlée, panna cotta með appelsínu-chilisósu og tvenns konar apríkósum, vanilluís með ferskum fíkjum og tóbakssírópi (leyniuppskrift afmælisbarnsins). - Pujol Rivesaltes Ambré 2002

Hawaii Kona-kaffi og heimagerðar súkkulaðitrufflur. - Koníak og líkjörar.

Heimabökuð smábrauð og bollur.

Þetta var bara nokkuð gott. Þótt ég segi sjálf frá.

|