(function() { (function(){function c(a){this.t={};this.tick=function(a,c,b){var d=void 0!=b?b:(new Date).getTime();this.t[a]=[d,c];if(void 0==b)try{window.console.timeStamp("CSI/"+a)}catch(l){}};this.tick("start",null,a)}var a;if(window.performance)var e=(a=window.performance.timing)&&a.responseStart;var h=0=b&&(window.jstiming.srt=e-b)}if(a){var d=window.jstiming.load;0=b&&(d.tick("_wtsrt",void 0,b),d.tick("wtsrt_","_wtsrt", e),d.tick("tbsd_","wtsrt_"))}try{a=null,window.chrome&&window.chrome.csi&&(a=Math.floor(window.chrome.csi().pageT),d&&0=c&&window.jstiming.load.tick("aft")};var f=!1;function g(){f||(f=!0,window.jstiming.load.tick("firstScrollTime"))}window.addEventListener?window.addEventListener("scroll",g,!1):window.attachEvent("onscroll",g); })();

Konan sem kyndir ofninn sinn

Eldhúsreyfarar miðaldra matargúrús á Skólavörðuholtinu

24.12.05

Og hvað er þetta annars með Stúf og vinstri græna?

Annars er það Bjúgnakrækir sem er minn maður (sveinn).

|

Það styttist í jólin.

Ég fæ líklega ekki margt af jólaóskalistanum mínum; veit ekki með frið á jörð en það er allavega ósköp friðsælt hér á Kárastígnum. Jú, svo fékk ég dúnsængina mína en ég gaf mér hana sjálf. Gæsadúnssæng reyndar, tímdi ekki að splæsa í æðardún, en þetta er einhver Síberíuútgáfa sem á að geta haldið á mér hita við hvaða aðstæður sem er.

Það þýðir einu hlutverkinu færra fyrir iðnaðarmanninn. En ég á reyndar ekki von á honum heldur, því er nú verr. Og arininn ætti að verða óþarfur. Ég kveiki bara á kerti ef ég vil horfa á eld. Eða fer fram í eldhús og kveiki á gashellu.

Og svo kom efnafræðistúdentinn með konfektkassa og skúraði stigann. Svona eiga synir að vera.

Heyrðu, þetta er annars í fínu standi. Vantar eiginlega bara Metaxaflösku. En ég á bæði koníak og Calvados í vínskápnum, það ætti að duga mér í staðinn.

Annars er allt í sómanum. Búin að sjóða hangikjötið og gera hvítan súkkulaðiís. Deigið í litlu súkkulaðikökurnar er tilbúið og ég er að fara að gera hindberjasósuna. Andabringurnar og humarinn eru að þiðna á eldhúsbekknum. Fer að sjóða rauðkálið rétt bráðum, er að hugsa um að setja trönuber út í það. Svo er ég að hugsa um að hafa steiktar perur með. Og tvenns konar kartöflur, brúnaðar fyrir Boltastelpuna og ofnsteiktar í andafeiti fyrir efnafræðistúdentinn og Sauðargæruna, sem deila ekki hrifningu hennar á brúnuðum kartöflum.

Ég er ekki enn búin að ákveða hvernig ég elda humarinn sem er í forrétt (og ég sem hef verið að hvetja fólk til að ákveða jólamatseðilinn með góðum fyrirvara) en það verður eitthvað með tómötum, esdragoni og hvítlauk. Á líka eftir að sjá til með tímasetningar - humar og andabringur er kannski ekkert sérlega heppileg samsetning að því leyti að hvorttveggja þolir ofeldun mjög illa - ég gæti beðið með að elda bringurnar þar til við erum búin með forréttinn en ekki víst að börnin verði hrifin af því ef tognar mikið úr máltíðinni.

Reyndar er hvorugt þeirra líklegt til að borða humar; Boltastelpan er búin að lýsa því yfir að hún vilji ekki sjá hann, bróðir hennar mundi hugsanlega smakka ef honum væri talin trú um að Gísli ljósmyndari hefði veitt hann. Kannski fá þau bara ristað brauð á meðan.

Efnafræðistúdentinn: -Mér finnst að krakkarnir geti bara étið humr.

Ég: -En þá verður bara minna handa okkur hinum.

Efnafræðistúdentinn: -Mér finnst að krakkarnir eigi ekkert að vera að éta humr.

Gleðileg jól, enn og aftur.

|

Jæja, þá er þessu Þorláksmessuboði lokið - hér er búið að vera fullt hús af gestum sem gerðu veitingunum góð skil. Reyndar er töluvert eftir af skinkunni en hún var með stærsta móti í ár og svo voru vinir efnafræðistúdentsins færri en stundum áður (enda er hann fluttur að heiman); þeir hafa oft komið seint og verið drjúgir við skinkuna. En hún fer þá bara í frystinn.

Hrátt tvíreykt Húsavíkurhangikjöt og úrvalsgott alvöru balsamedik er eðalsamsetning.

Stiltonosturinn í ár var enn betri en sá í fyrra.

Heimabökuðu bollurnar (sem Boltastelpan sá að mestu um í þetta skipti) kláruðust snemma eins og alltaf. Hvers vegna man ég aldrei eftir að baka nógu mikið af þeim?

Ég gleymdi hægeldaða kryddjurtalaxinum í ofninum í að minnsta kosti 15 mínútur fram yfir áætlaðan tíma. Ég held að hann hafi bara batnað við það.

Þurrkuðu ávextirnir sem ég kom með frá London eru algjört nammi. Eins gott að ég keypti aukaskammt, bara handa mér ...

Góður dagur.

Gleðileg jól.

|

23.12.05

Hér gengur allt samkvæmt áætlun. Svínslærið, lambalærið, nautatungan og kjúklingalifrarkæfan bíða tilbúin úti á svölum, maríneruðu sjávarréttirnir bíða þess að efnafræðistúdentinn komi með hvítvín sem honum hefur verið falið að redda, Boltastelpan er búin að vera einstaklega rösk og baka 101 piparköku (plús nokkrar sem brunnu) og 70 súkkulaðibitakökur alveg alein og án aðstoðar og ætlar svo að vinda sér í jólaklumpinn á eftir og jafnvel eitthvað meira. Við erum að fara að hnoða í brauðdeig og svo þarf að setja allt á hlaðborðið og skreyta dálítið og saga neðan af jólatrénu og setja það upp ... æi, já, og svo þarf víst að taka til og skúra. Hmm. Spurning hvort er hægt að virkja efnafræðistúdentinn, sem á líka að sjá um að henda slatta af drasli úr skúrnum.

Ég veit ekkert hvort það verður allt tilbúið þegar fólk fer að láta sjá sig, sem er alveg óhætt að gera þegar klukkan fer að nálgast fjögur. En það verður eitthvað til. Allavega kaffi á könnunni. Og það má alveg halda áfram að koma fram undir miðnætti að minnsta kosti.

Látið sjá ykkur. En ef ekki, þá segi ég bara gleðileg jól.

|

22.12.05

-Þetta er stórt kjöt, sagði Sauðargæran áðan þegar ég var að setja tólf kílóa svínslærið í pottinn sem var keyptur sérstaklega til að sjóða það í á Hagkaupsútsölunni í sumar (þetta er steikarpottur sem er svo stór að hann kemst ekki í ofninn minn, enda stóð aldrei til að hann færi þangað - það komast heilir sex lítrar af vatni í hann með skinkunni en síðast þegar ég var með svona stóra skinku gat ég ómögulega komið nema tveimur lítrum af vatni í pottinn sem ég notaði þá, hún fyllti svo gjörsamlega út í hann.

Kryddpæklaða lambalærið verður svo steikt í fyrramálið og þá þarf ég líka að steikja lax, baka brauð og fleira. Í kvöld þarf ég aftur á móti að gera kjúklingalifrarkæfu, sjóða nautatungu, búa til maríneraðan hörpudisk og gera sitthvað fleira. Já, og baka einhverjar kökur. Allavega klumbinn, eins og Boltastelpan kallaði jóladrumbinn sem ég set alltaf á Þorláksmessuborðið og hún skreytir með Mjallhvíti og dvergunum átta. (Nei, ég veit ekki af hverju þeir eru átta.)

Sumt er svo tilbúið - eða svo gott sem - til dæmis hráa tvíreykta hangikjötið, Stiltonosturinn, panettonebrauðið og fleira sem ég hef verið að sanka að mér að undanförnu.

Já, og það eru allir velkomnir.

|

21.12.05

Laufabrauðsgerðinni lokið. Við gerðum heldur minna en í fyrra, bara úr þremur kílóum af hveiti - rétt rúmlega hundrað kökur. Tókst alveg ljómandi vel. Öll fjölskyldan mætti nema uppáhaldstengdasonurinn, sem var að brenna kaffi langt fram á kvöld. Börnin voru reyndar misdugleg við laufabrauðsskurðinn, sum sátu mestallan tímann inni í stofu og horfðu á Prúðuleikarana.

Á morgun þarf ég að sjóða Þorláksmessuskinkuna. Það verður minna vandamál í ár en stundum áður því að ég keypti sérstakt ílát í því augnamiði á útsölu í Hagkaup í sumar.

Ég fæ greinilega fleiri jólagjafir í ár en ég gerði ráð fyrir. Er þegar búin að fá þrjár - körfu frá Gestgjafanum (það er andalifur en ekki gæsalifur í henni, gott mál), bók frá Eddu og svo fékk ég jólapakka frá Sacla-verksmiðjunum, krukku með einhverju gúmmulaði, brauðstangir, skál og skeið. Já, og svo var ég að fá tilkynningu um að ég ætti pakka á pósthúsinu; hef ekki hugmynd um hvað það er. Vonandi stór og feitur jólapakki ...

|

Story of my life ... er það ekki?

QuizGalaxy.com!


Take'>http://www.quizgalaxy.com/quiz.php?id=68">Take this quiz at QuizGalaxy.com

|

20.12.05

Við Sauðargæran erum að ræða hættuna á því að Boltastelpan fari í jólaköttinn, þar sem enn hafa ekki fundist jólaföt á hana.

Sauðargæran: -En amma, ég veit á hvaða fjalli jólakötturinn á heima og ég get bara farið þangað.

Amman: -Og bjargað systur þinni?

Sauðargæran: -Já, ég get sko rotað jólaköttinn.

Amman: -Vá, með hverju?

Sauðargæran: -Bara með hendinni (sýnir hnefann).

Amman: -Ertu svona svakalega sterkur?

Sauðargæran: -Já, en það er allt í lagi. Ég ætla aldrei að rota þig, amma mín.

Gott að vita það.

|

Ég er strax farin að vinna í sumarfríinu, sem átti að byrja klukkan tólf.

Ojæja.

Hluti af verkefnum dagsins var reyndar að plana mína eigin jólagjöf, sem er hið besta mál. Nema það mætti halda að það væri algjört Slaraffenland á Kárastígnum:

Vinnufélagi 1: -Ættum við að hafa gæsalifrarkæfu í körfunni?

Ég: -Jú, örugglega fínt, en ég á gæsalifrarkæfu.

Vinnufélagi 2: -Svo er spurning með panettone, það er svo jólalegt.

Ég: -Já, en ég á reyndar tvær panettone-kökur heima.

Vinnufélagi 1: -Svo einhverja franska osta.

Ég: -Reyndar á ég ...

En ég hef nú aldrei verið í vandræðum með að koma gæsalifrarkæfu í lóg.

|

19.12.05

Ég er í sumarfríi. Eftir hádegi í dag og næstu daga. Og byrjaði sumarfríið með því að fá mér súpu og hvítvínsglas á Sólon með tveimur starfssystrum. Fór svo í sjúkraheimsókn til Sauðargærunnar, sem reyndist vera með minna veikum sjúklingum sem ég hef séð. Hann teiknaði glæsilega hausfætlumynd af mér að borða snúða. Marga snúða.

Ég spurði hann hvað ég ætti að gefa honum í jólagjöf. Hann var mjög hógvær og bað um einn Playmokall. Sjóræningja.

Ég er samt að hugsa um að gefa honum geislaspilara. Eða öllu heldur sambyggt tæki, hann er alltaf að fá tækið systur sinnar lánað til að hlusta á ævintýri og barnasöngva. Var að skoða úrvalið; það er ekkert mál að finna ódýr tæki, fjögur-fimmþúsundkall eða svo, svipað og sæmilegur Playmo- eða Legokassi. Gallinn er hins vegar að þessi tæki eru öll svo fjandi stór. Einhverjir gettóblasterar. Ætli séu ekki til nein tiltölulega lítil svona tæki?

Fyrir ekki svo mörgum árum var þetta eitthvað sem krakkar létu sig dreyma um að fá í fermingargjöf. Núna er ég að leita að svona handa fjögurra ára barni.

Kannski ætti ég bara að halda mig við Playmokallinn.

|

18.12.05

Já, því ekki það ...


salad
You taste like a salad. You are the epitome of
diversity and freedom. With your mixed flavors
and ability to blend with almost anything, you
make people happy.

How do you taste?
brought to you by Quizilla

|

Ég hengdi upp seríuna með feitu asnalegu jólasveinunum í morgun. Það er nokkuð öruggt merki um að ég sé að komast í jólaskap.

Svo komu barnabörnin í heimsókn og jólaskreyttu töluvert, tíndu fram alla litlu jólasveinana sem hafa safnast að mér gegnum árin og ýmislegt fleira. Svo að það er að verða nokkuð jólalegt í kringum mig.

Ég er samt ekki byrjuð á jólabakstrinum. Var hálfpartin búin að lofa börnunum að baka með þeim í dag en sveik það allt saman. Reyndar hafði ég þá afsökun að ég var að setja saman blessaðan skóskápinn. Sauðargæran hjálpaði mér við verkið og tilkynnti að hann væri vinnumaður og ég vinnukona. Með hjálp hans komst skápurinn upp og allt í sómanum. Ég er strax farin að velta fyrir mér að kaupa annan. En ef ég læt verða af því fer ég sennilega að ráðum Farfuglsins og kaupi samsetninguna með.

|

Ég var í Hagkaup í gær og var boðið að smakka á hamborgarhrygg Hagkaupa. Annaðhvort var ég mjög óheppin með bita eða ég hef allt annan smekk en kokkalandsliðið. Bragðið var svosem í lagi - frekar dauft þó - en áferðin var ... tja, eitthvað annað en kjöt.

Annars er ég ekkert sérstaklega mikið fyrir hamborgarhrygg svona yfirleitt. Hef smakkað of marga sem mér finnst lítið varið í, of þurrir, of saltir, of bragðdaufir ...

|