(function() { (function(){function c(a){this.t={};this.tick=function(a,c,b){var d=void 0!=b?b:(new Date).getTime();this.t[a]=[d,c];if(void 0==b)try{window.console.timeStamp("CSI/"+a)}catch(l){}};this.tick("start",null,a)}var a;if(window.performance)var e=(a=window.performance.timing)&&a.responseStart;var h=0=b&&(window.jstiming.srt=e-b)}if(a){var d=window.jstiming.load;0=b&&(d.tick("_wtsrt",void 0,b),d.tick("wtsrt_","_wtsrt", e),d.tick("tbsd_","wtsrt_"))}try{a=null,window.chrome&&window.chrome.csi&&(a=Math.floor(window.chrome.csi().pageT),d&&0=c&&window.jstiming.load.tick("aft")};var f=!1;function g(){f||(f=!0,window.jstiming.load.tick("firstScrollTime"))}window.addEventListener?window.addEventListener("scroll",g,!1):window.attachEvent("onscroll",g); })();

Konan sem kyndir ofninn sinn

Eldhúsreyfarar miðaldra matargúrús á Skólavörðuholtinu

6.7.07

Almennilegur læknir

,,... svona unga konu eins og þig," sagði læknirinn sem ég var hjá áðan. Og nei, hann var ekki ævaforn sjálfur, ég hefði þvert á móti getað verið mamma hans.

Svona eiga læknar að vera. Bjargaði alveg deginum.

Alveg burtséð frá slitgigt, stirðleika, háþrýstingi, mæði, bjúg og öðrum aldurs- (og vaxtarlags-)kvillum sem hrjá mig.

|

5.7.07

Fiskur og fínirí

Það má búast við að fiskur verði mun oftar á borðum í matarboðum hjá mér hér eftir; ég keypti mér sérlega retró silfurhúðuð fiskihnífapör með gervifílabeinsskafti á ebay og einhverntíma þarf maður jú að nota djásnin ...

Fjölskyldan kom einmitt í mat eins og yfirleitt á fimmtudögum og ég gaf þeim steinbít maríneraðan í sítrónu- og límónusafa, ólífuolíu, engifer og kóríander og síðan steiktan á pönnu með smávegis af rækjum. Kartöflur, dvergmaís og sykurbaunir með. Súkkulaðibúðing (ekki Royal, heldur úr mascarponeosti, sýrðum rjóma, súkkulaði, flórsykri og vanillu) með bláberjum á eftir. Sauðargæran gerði honum lítil skil; vill heldur Royal.

Ég hef verið að segja við ýmsa á síðustu mánuðum ,,ég ætla að bjóða þér/ykkur í mat bráðum" og allir halda náttúrlega að ég hafi gleymt þeim af því að formlegt boð berst ekki - en nei, ég er bara að bíða eftir að eldhúsframkvæmdum ljúki, sem ætti nú að verða fljótlega. Þá fara matarboðin að skella á. Ég verð jú einhverntíma að nota ættarsilfrið.

|

Kanadískar klámpítsur

Óttalegir perrar eru þetta þarna í Manitoba (skemmst að minnast Hjorleifsson-bræðranna sem ætluðu að koma á klámþingið fræga) - skyldu það líka vera einhverjir Skagfirðingar í ættir fram sem standa á bak við þetta?

Nú er spurning hvort einhver íslenskur pítsustaður leikur þetta eftir. Ég veit nú ekki hvort ég yrði spennt fyrir því að borða pepperónípítsuna mína af mynd af einhverjum fáklæddum kvenmanni - en það mætti skoða málið ef þetta væri flottur gaur.

Gæti samt orðið svolítið subbulegt.

|

4.7.07

Suðurríkjagrill

Já, og ég fékk 10 rétt af 12 í Suðurríkjagrill-spurningaleiknum þarna á sömu síðu og súkkulaðigrillsósan er. Enda þokkalega vel lesin í amerískum barbikjúbókum. Vantar bara almennilega grillgryfju. Eða allavega olíutunnu.

|

Súkkulaðigrillsósa

Þetta er nú eitthvað fyrir súkkulaðifíklana: Súkkulaðigrillsósa.

Hljómar kannski skelfilega en hver veit?

Úbbs, nú sé ég. Fjórir bollar af Hershey's súkkulaðisósu - það er nærri heill líter. Vissulega er þetta stór skammtur af sósu en samt ...

Væri kannski til í að prófa þetta t.d. á svínabóg eða eitthvað slíkt. En ekki á grillið.

|

Englar og djöflar

Ég var beðin um uppskrift að englatertu með hvítu kremi en eftir að vera búin að hugsa málið komst ég að þeirri niðurstöðu að líklega væri átt við djöflatertu. Reyndar eru tæpast til ólíkari kökur, önnur þurr og loftmikil, hin blaut og þung ...

Ég á líka englatertuuppskriftir, bæði hvítar og brúnar, og get birt þær líka ef óskað er - en það er meira vesen að baka englatertu, til dæmis þarf sérstakt form. Í upprunalegu djöflatertuuppskriftinni sem ég var með var reyndar ekki súrmjólk, heldur mjólk blönduð ediki - það kemur í sama stað niður. En það þarf að vera eitthvað súrt svo að matarsódinn virki. - Uppskriftin er fyrir tvo botna í meðalstórur tertuformi (22-24 cm í þvermál) en það er líka hægt að nota eitt stórt form eða helminga uppskriftina.

Ég set uppskrift að tvenns konar hvítu kremi, annars vegar frostingi og hins vegar ostakremi. Frostingurinn dugir bara ofan og utan á tertuna (það má gera meiri frosting og setja á milli botnanna, eða nota súkkulaðismjörkrem), ostakremið ætti að duga bæði á milli botnanna, ofan og utan á kökuna.

Hefðbundin djöflaterta (devil’s food cake)

110 g smjör
100 g dökkt súkkulaði (70%)
350 g sykur
2 egg
100 ml vatn, vel volgt
300 g hveiti
1½ tsk matarsódi
¼ tsk salt
150 ml súrmjólk


Ofninn hitaður í 175°C og 2 smelluform smurð og hveitistráð. Smjör og súkkulaði brætt saman í potti og látið kólna aðeins. Sykur og egg hrært létt og ljóst og síðan er volgri súkkulaðiblöndunni hellt saman við smátt og smátt og hrært mjög vel á meðan. Volgu vatninu þeytt saman við. Hveiti, matarsóda og salti blandað saman og þurrefnunum síðan hrært saman við súkkulaðiblönduna ásamt súrmjólkinni. Hellt í formin og bakað neðarlega í ofni í um hálftíma, eða þar til súkkulaðiilmur fyllir eldhúsið og prjónn sem stungið er í miðjuna kemur hreinn út.

Hvítt krem (fluffy white frosting)

225 g sykur
2 tsk vanillusykur
75 ml vatn
½ tsk vínsteinn (cream of tartar)
2 eggjahvítur


Sykur, vanillusykur, vatn og vínsteinn hrært saman í potti, hitað og látið sjóða við ríflega meðalhita þar til sykurinn er alveg uppleystur. Eggjahvíturnar þeyttar þar til þær eru hálfstífar og síðan er sykurleginum hellt saman við smátt og smátt og þeytt stöðugt þar til eggjahvíturnar eru alveg stífar.

Ostakrem

225 g rjómaostur, mjúkur
225 g mascarpone-ostur, mjúkur
2 tsk vanillusykur
100 g flórsykur
250 ml rjómi


Rjómaosturinn og mascarpone-osturinn hrærður með vanillusykri og flórsykri. Rjóminn stífþeyttur og blandað gætilega saman við með sleikju. Kælt í 1-2 klst.

|

3.7.07

Fáklædd og föst

Ég skrapp á útsölur í Kringlunni eftir vinnu í dag. Keypti mér tvennar buxur, ekkert vandamál þar. En svo sá ég topp í einni búðinni sem ég féll alveg fyrir. Hann var auðvitað ekki til í mínu númeri en reyndar í næsta númeri fyrir neðan. Svo að í einhverju bjartsýniskasti ákvað ég að máta hann (maður veit aldrei, kannski er þetta stórt númer - nema sniðið á þessum var reyndar þannig að ég hefði átt að gera mér grein fyrir því strax að svo var ekki).

Auðvitað sat ég föst í fjandans flíkinni í mátunarklefanum. Í einhverri afkáralegri stellingu með handleggina upp í loftið. Tók mig þónokkra stund að mjaka mér úr toppnum því auðvitað kunni ég ekki við að kalla á hjálp.

Samt ekki eins slæmt og þegar ég sat föst í kjólnum í Karnabæ um árið. (Það var þó mun minna númer ...) Þá var ég á tómri nærbrókinni og mun spéhræddari en ég er núna svo að ég hefði sennilega fyrr dáið en kallað á aðstoð. Ég var örugglega minnst tíu mínútur að komast úr þeirri prísund og afgreiðslustúlkan horfði mjög undarlega á mig þegar ég kom loksins út.

En ég slapp allavega. Á endanum.

|

"Amma reyndi Guðmund í Byrginu," sagði riðvaxna vinkona mín sem var slegin.

Ég varð bara að prófa þetta ...

|

Kjúklingasalat

Fyrst ég var að tala um salvíu í kommentunum hér áðan, þá er best að setja inn eina uppskrift. Þetta er fínt sumarsalat, t.d. til að bera fram á veröndinni eða fara með í sumarbústaðinn - það er hægt að bera það fram með góðu snittubrauði eða setja það á samlokur.

Kjúklingasalat með hnetum, trönuberjum og salvíu


2-3 kjúklingabringur, steiktar, bakaðar eða grillaðar
1/2 rauðlaukur
50 g pekan- eða valhnetukjarnar
50 g þurrkuð trönuber (eða ljósar rúsínur)
5 salvíublöð
100 ml sýrður rjómi, 18%
2 msk majónes (eða meiri sýrður rjómi en majónes er betra)
pipar
salt


Kjúklingurinn skorinn í litla bita. Rauðlaukurinn saxaður smátt og hneturnar grófmuldar. Salvíublöðin skorin í ræmur. Sýrður rjómi og majónes hrært saman og kryddað með pipar og salti. Öllu blandað vel saman.

Svo má líka blanda t.d. klettasalati saman við.

|

2.7.07

Malbornar minningar

Ég labbaði smávegis með dótturdótturinni og bróðursyninum um Krókinn í gær. Út að barnaskóla, þaðan út að Villa Nova og svo Aðalgötuna og Skagfirðingabrautina til baka. Með viðkomu í bakaríinu til að kaupa snúða með alvörusúkkulaði, sem hvergi fást betri.

Og það rann upp fyrir mér á leiðinni hvað Krókurinn var nú óskaplega ljótt pláss þegar ég var að alast þar upp og hvað hann hefur þó skánað.

Ég (á hundrað og átján stöðum á leiðinni): -Krakkar, vitið þið hvað var hér þegar ég var á ykkar aldri?

Krakkarnir í kór: -Möl og grjót.

Ég: -Og drullupollar.

Sumir sveipa víst bernskuslóðirnar einhverjum dýrðarljóma í minningunni. Ekki ég. Ekki Krókinn allavega. En hann er mun huggulegri núna, það skal ég alveg viðurkenna.

|

Frægir og ekki frægir ...

Skaust norður um helgina með gagnlega barninu, barnabörnunum og bróðursyni mínum. Við gistum bara eina nótt en þetta var fínt. Einna skemmtilegast fannst mér þó að hlusta á aftursætisfarþegana á leiðinni suður. Það er að segja, eftir að þau gáfust upp á ferða-DVD-spilurum og tölvum sem voru með í för. Þá fóru þau nefnilega í ,,hver er maðurinn?" öll þrjú. Það gat verið skondið vegna þess að þótt þau tvö eldri séu á svipuðum aldri (tólf og þrettán) liggja áhugasvið þeirra ekki beinlínis saman. Og að minnsta kosti Boltastelpan gerir sér fulla grein fyrir því.

Boltastelpan: -Ingólfur. Franskur og stjórnmálamaður? Gleymdu því. Þú verður að spyrja um eitthvað sem ég gæti vitað.

Frændinn: -En það vita allir hver Nicolas Sarkozy er ...

Sauðargæran var með í leiknum þótt hans þekkingarsvið væri að vísu fremur takmarkað og flestir sem hann hugsaði sér reyndust vera nánir ættingjar.

Boltastelpan: - ... Er þetta ... afi Raggi?

Sauðargæran: -Já!

Frændinn: -Hey, þetta er ekki réttlátt, það verður að spyrja um einhvern úr sameiginlegu fjölskyldunni, einhvern sem ég þekki líka.

Boltastelpan: -Þú spurðir áðan um bróður George Bush.

Sauðargæran hafði hugsað sér mann, aldrei þessu vant ekki úr fjölskyldunni, heldur útlending sem hann uppástóð svo að væri ekki frægur. Eftir nokkurt spurningaflóð, þar sem kom fram að hér væri um að ræða dauðan tónlistarmann, kom í ljós að þetta var Beethoven.

Frændinn: -En Beethoven er frægur, hann er eitt frægasta tónskáld í heimi!

Sauðargæran: -Ingólfur, ert þú að læra tónlistarfræði?

Frændinn: -Nei ...

Sauðargæran: -Þá veist þú ekkert um Beethoven.

Málið útrætt.

|