Aftur einn

Æi, er þetta ekki dæmigert fyrir Ólaf greyið? Hann fær að kveðja borgarstjóraembættið með því að klippa á borða á Skólavörðustígnum - á sama tíma og Íslendingar spila æsispennandi leik við Dani og allir eru heima að horfa.

Ég var reyndar ekki að horfa. En fór heldur ekki að fylgjast með Ólafi klippa.

Hvað verður um Sølvu?

Og þýðir þetta svo að við fáum ekki að heyra í söngkonunni Sølvu Ford, sérlegum boðsgesti Ólafs fráfarandiborgarstjóra, á Menningarnótt? Var það þess vegna sem blaðamannafundinum um dagskrána, sem átti að vera í dag, var frestað?

Hanna Birna verður bara að bjóða Georg Eystaná í staðinn.

Þjónustuviðskiptafulltrúastjórar

Ég kem aldrei nokkurntíma í banka. Minn aðalbankareikningur hefur frá því fyrir meira en tuttugu árum verið í Vesturbæjarútibúi Búnaðarbankans, seinna KB-banka, nú Kaupþings, enda var það á þeim litla bletti í Vesturbænum þar sem flestir mínir vinnustaðir hafa verið allan þann tíma. Á meðan herleiðingin upp á Höfða stóð yfir flutti það svo yfir á Hótel Sögu. Síðan eru einhver ár en ég hef aldrei komið þangað. Aldrei nokkurntíma. Ekki átt nokkurt erindi, ég hef getað afgreitt allt gegnum netið. Jú, og kannski einu sinni eða tvisvar með símtali við þjónustuverið.

Ég áttaði mig á þessum bankaókunnugleika mínum núna í hádeginu þegar ég þurfti að ganga erinda húsfélagsins, reyndar í öðrum banka, leitaði um allt að þjónustufulltrúa en fann ekki og komst svo að því að einhverntíma í öllu góðærinu á síðustu árum hafa þjónustufulltrúar breyst í viðskiptastjóra. Sem segir nú sitt.

Ég hafði ekki haft hugmynd um þessa merku þróun. Sem segir líka sitt um fjármálafávisku mína. En fór að velta því fyrir mér hvort samdrátturinn í viðskiptalífinu yrði nú til þess að þeir breyttust aftur í þjónustufulltrúa.

Ég fékk reyndar fína þjónustu hjá viðskiptastjóranum. Það vantaði ekki.

Borgarstjórnargósentíð

Mikið held ég að þetta borgarstjórnartímabil með öllum sínum meirihlutum og borgarstjórum og allíönsum og bakstunguhnífasettum eigi eftir að verða vinsælt í gettubeturkeppnum og spurningaspilum framtíðarinnar.

Af ýmsum frömum

Segiði mér nú eitt - það má meira en vera að ég hafi drepið á þetta áður en það fer alltaf jafnmikið í taugarnar á mér - eru einhverjir, bara einhverjir aðrir en al-alsvæsnustu prófarkalesarar sem skrifa meðfram í tveimur orðum eins og stafsetningarorðabókin vill að maður geri? Og eru einhver minnstu rök fyrir því að skrifa með fram en svo aftur umfram?

Spyr sú sem ekki veit. (Ég gúglaði "með fram" og fékk vissulega 15.400 niðurstöður en það voru mestanpart einhverjir sem spiluðu með Fram eða héldu með Fram eða buðu sig hér með fram eða voru ekki með fram að jólum eða sýndu fíflsku með fram(ferði sínu) eða tóku sængina sína með fram í stofu eða blökuðu slæðum með fram og aftur eða samþykktu eitthvað með fram komnum athugasemdum eða fylgdust með fram að útskrift ...)

Ef einhver sér texta eftir mig þar sem eitthvað er með fram einhverju, þá er þar hryðjuverk prófarkalesara á ferðinni.

Sama gildir um fyrirfram og - ég ætlaði að skrifa fleiri fröm en þau eru víst ekki mikið fleiri - en jæja, ýmis önnur orð sem ég stræka á að skrifa í tveimur orðum.

Grilldagur á Forlaginu

Ég lykta eins og - tja, eins og grillhús? Það fer allavega ekki á milli mála að ég var að grilla ofan í staffið í hádeginu. Kjúklingafillet maríneruð í sólþurrkuðum tómötum, hvítlauk og fleiru. Það voru keyptar pylsur líka; ég sagðist grilla þær samkvæmt pöntun en samt trúði ég því ekki að einhverjir vildu pylsur á eftir og þegar ég var loksins sest með minn eigin kjúkling sá ég að það voru fjórir eða fimm komnir í kringum grillið að kljást við pylsugrillunina.

Grillið (sem tilheyrir raunar húsráðendum í íbúðinni fyrir ofan en er notað með góðfúslegu leyfi þeirra) hefur verið töluvert brúkað í sumar og nú eru uppi áform um að fjárfesta í nýju grilli fyrir næsta sumar. Alveg er ég til með að standa grillvaktina nokkrum sinnum. Nema aðrir hljóta að ráða við pylsurnar. Trúi ekki öðru.

Andlit og englasöngur

Skil ekki alla þessa hneykslun á Kínverjum af því að þeir eru búnir að fatta það sem allir aðrir höfðu gert fyrir langalöngu: Fallegt fólk kemur betur út í mynd en fólk sem getur sungið. Þótt það séu börn. Sæt lítil stelpa sem ekki getur sungið er betra andlit útávið en feit lítil stelpa með skakkar tennur þótt hún syngi eins og engill.

Þetta hefur mér lengi verið ljóst, enda er ég feit með skakkar tennur. Get reyndar alls ekki sungið en ég get eldað. Og hef fengið að heyra það oftar en einu sinni að ég sé ekki nógu ung og sæt til að vera í sjónvarpi. Útvarpi kannski ... Og ég kaupi það alveg. Ég gæti í mesta lagi virkað sem önnur af Two Fat Ladies. Allavega þegar einhver fékk þá brilljant hugmynd um árið að Gestgjafinn ætti að vera með matreiðsluþátt, þá var aðalmálið að finna andlit þáttarins. Og það gat sko ekki verið ég. Sem ég var reyndar mjög sátt við því þetta átti að vera hipp og kúl þáttur. Mér fer ekkert vel að vera hipp og kúl.

En annars eru nú sjö ára kínverskar stelpur krúttlegar upp til hópa, líka þótt þær séu þybbnar og jafnvel illa tenntar, svo að þetta var nú óþarfi hjá Kínverjunum. En svosem ekki meiri ástæða til að hneykslast á því en ýmsu öðru.

Háskaför á Skagann, afmælisgestir og gæludýr

Komin aftur úr afmælinu í Himnaríki. Fékk far með Breiðholtshataranum og það gekk alveg bærilega þótt mér litist ekki alveg á þegar hann fór - í upphafi ferðar - að segja mér frá akstri sínum um þýskar hraðbrautir á 260 kílómetra hraða nýverið. Mér leist ekki á glampann sem kom í augun á honum þegar hann var að lýsa þessu og þorði ekki annað en hafa auga á hraðamælinum alla leiðina.

Afmælisgestir voru af öllum stærðum og gerðum eins og venjulega. Hitti til dæmis gamlan skólabróður sem ég hef ekki séð í meira en 30 ár (Bambínó - fyrir þá sem þekktu drenginn). Hitti líka nokkra gamla vinnufélaga og eins og vant er eitthvað af fólki sem ég sé aldrei nema í afmælum hjá Gurrí.

Í einu horni afmælisveislunnar var verið að ræða gæludýr, einkum þó hamstra. Ég ákvað að vera ekkert að segja frá naggrísamatreiðslubókinni minni - sem gæti vel verið brúkleg fyrir hamstra líka. Það hefði getað eyðilagt stemmninguna í afmælinu.

Chuck Norris mætti ekki þótt Gurrí sé í hópi stærstu aðdáenda hans. Eða hann var ekki kominn þegar ég fór en gestir voru reyndar enn að streyma að. Og slatti af bakkelsi eftir.

Að lifa hátt og taka afleiðingunum

Ég get nú eiginlega tekið heilshugar undir það sem Egill segir hér, að það hafi verið gott að alast upp á þeim tíma þegar tækifæri til dópneyslu voru takmörkuð. Eða þurfti allavega að leita þau uppi. Ekki síst norður í landi. Það hefur víst breyst eins og fleira.

Ég er ekki viss um að ég kæmist heil á húfi gegnum unglingsárin ef ég væri til dæmis fjórtán ára núna. Svo er aftur spurning hvort ég gerði það yfir höfuð - en það er önnur saga.

Reyndar tók ég aldrei undir mottóið ,,lifðu hátt, deyðu ungur og vertu fallegt lík" sem maður sem ég var frekar ástfangin um tíma af hafði gjarna á takteinum (honum tókst þetta fyrsta en ég sá um daginn að hann hefur alveg klikkað á hinu tvennu); ég hefði fremur vitnað í gamlan enskan fordrukkinn rithöfund og pedófíl (ef ég hefði þekkt þau ummæli hans þá): ,,Always do as you please, and send everybody to Hell, and take the consequences. Damned good Rule of Life."

En eins og ég sagði einhverntíma, sjálf var ég alltaf betri í að gera eins og mér sýndist en taka afleiðingunum. Held samt að það hafi aðeins skánað.

Afmælisbakkelsi og latex

Það viðrar ansi vel á afmælisbörn dagsins þótt ég efist ekkert um að Gurrí mundi helst vilja hafa almennilegt brim við Langasandinn.

Ég kom með bakkelsisframlag mitt til afmælisveislunnar í vinnuna í morgun til að sleppa við að láta Breiðholtshatarann, sem ég fæ far með beint úr vinnunni, koma við heima hjá mér að ná í þær (ég bý náttúrlega alls ekki í Breiðholtinu en þó óþægilega nálægt endimörkum 101, best að taka enga sénsa með það) og var eitthvað að laumast með það til að valda ekki vinnufélögunum vonbrigðum þegar í ljós kæmi að þeir ættu ekkert að fá. En svo var nýr grafískur hönnuður að hefja störf í morgun og mætti með aldeilis ljómandi góða köku fyrsta vinnudaginn svo að það bjargaðist allt. Svona fólk líst mér vel á.

Jæja, best að halda áfram með símavændið, sem akkúrat þessa stundina er uppfullt af einhverjum latexpælingum ...

Hundrað ára - til samans

Fyrst sá 12. er runninn upp, þá ætla ég að óska tveimur vinkonum mínum sem báðar eru fimmtugar í dag innilega til hamingju. Þær Rósa og Gurrí eru fæddar að ég held með örfárra mínútna millibili en að vísu hvor á sínu landshorni. Ég er búin að þekkja Rósu frá 1973, Gurrí frá 1974 ... eða samtals í 69 ár. 69 ár af vináttu, það er nú ekki slæmt.

Ég er boðin í afmæli til beggja, annað er á morgun (eða sko í dag), hitt á laugardaginn. Þann dag á Madonna reyndar líka fimmtugsafmæli en hún bauð mér ekki. Enda fórum við aldrei saman á ball í Bifröst eða Miðgarði eða Höfðaborg.

Til hamingju með daginn, stelpur.

Bakstur og fáklæddir piltar

Ég var að setja köku í ofninn. Hálft kíló af súkkulaði, hálft kíló af smjöri, hálft kíló af eggjum, hálft kíló af púðursykri, hálft kíló af hveiti, hálft kíló af hindberjum ... og eitthvað smávegis fleira.

Og þótt ég sé kki mikið að horfa á Ólympíuleikana ákvað ég að kíkja meðan ég bíð eftir kökunni og stillti á Eurosport. Nema þetta var óvart Eurosport 2 og þar er heimsmeistaramótið í backgammon.

Ég flýtti mér að stilla á Eurosport 1. Þar voru allavega fáklæddir karlmenn. Mjög fáklæddir, það er dýfingakeppni.

Það líkar mér betur.

Þegar þýðingarvél og vond enskukunnátta leggja saman ...

Ég minntist eitthvað í gær á þýðingarnar í perúsku matreiðslubókinni sem Gunna gaf mér (ekki naggrísamatreiðslubókinni alltsvo). Flestar eru allt í lagi en svo er ein og ein sem greinilega hefur farið í gegnum þýðingarvél. Þar á meðal eru þessar leiðbeiningar um holugrillun af einhverju tagi:

Prepare an well in the earth see botton from well, arrange yute o alfalfa over she the stone, to make some in the part super formation on small over stone to fix fire until that the stone tobe red. After words lining the well with arrange yute or leaf banana, to arrange ingretion the of following. Formation on cope stwing ower the stone another of stone to follow until exhaust the ingretion to final the potatos, sweet potato, habas on filling green corn to cover with the yute o leaf banana stone earth on espert 45 minutes of kitchen. To the post arreself in portions small, to attaen on stone wash arrangel of in to post and ingretion to cover with stone on to cover of hart.

Ég tek þetta annars aftur. Sumt í þessu er ekki hægt að skrifa á reikning þýðingarvélar, mannshöndin hlýtur að hafa komið nálægt.

Ástarvikur og ástarár

Ekkert veit ég hvernig ástarvikan virkar í Bolungarvík - eða sko, ég veit ekki hvort hún nær yfirlýstum tilgangi. Vika er nú kannski fullstuttur tími líka. Þegar farið var út í samskonar aðgerðir í Skagafirði upp úr miðri síðustu öld og ég hef áður sagt frá, þá stóð það í heilt ár.

En svínvirkaði.

Story of my life

Ég missti fjarstýringuna af sjónvarpsafruglaranum í gólfið áðan og annað batteríið hrökk eitthvað út í veður og vind - sennilega undir sófa - og þar sem ég nenni ekki að leita það uppi og er ekki viss um að ég eigi annað batterí verð ég líklega að horfa á norska sjónvarpið (NR1, plúsrásina) það sem eftir lifir kvölds, ef ég ætla að horfa á sjónvarp á annað borð.

Trúlega er hægt að skipta um rás handvirkt á afruglaranum sjálfum en ég hef aldrei fundið út úr því og nenni ekki að byrja á því núna. Reyndar er Kavannagh lögmaður að byrja, það er nú alveg hægt að horfa á hann í neyð.

Story of my life, sko. Föst á norska ríkissjónvarpinu vegna eigin klaufsku og leti.

Perúskir þjóðarréttir

Hitti Gunnu systur áðan í sjö ára afmælisveislu Sauðargærunnar (hann átti afmæli fyrir meira en hálfum mánuði en það gafst ekki færi á að halda upp á það fyrr) og hún færði mér bækur sem hún keypti handa mér í Lima: önnur um hefðbundna perúska rétti af ýmsu tagi, á spænsku og ensku, með skemmtilega vondum myndum (og enska þýðingin er skemmtilega vond líka). Þar er til dæmis réttur sem heitir No es nada (Alls ekki neitt).

Hin bókin, El cuy - encuentro de culturas y de sabores, er samt áhugaverðari því að hún er eingöngu helguð þjóðarrétti Perúbúa. Og nú get ég, ef ég lendi einhverntíma í því að vera beðin um uppskrift að naggrís, bara sagt: ,,bíddu við, ég skal fletta upp í naggrísamatreiðslubókinni minni".