Sælkerasmakk og vinnuþrælkun á barnabarni

Ég var eiginlega alveg búin að vera í gær eftir törnina í eldhúsinu að undanförnu og varð því afskaplega fegin þegar mér var boðið á sælkerakvöld í Listasafninu þar sem aðalmálið var reyndar smökkun á Cup of Excellence-kaffi frá Kaffitári - og þótt þetta væri að kvöldi dags var koffíninnspýting mjög vel þegin - en svo bættist við á eftir snittur, gæðakonfekt, vín og fleira. Af því að ég hef nú einbeitt mér að hollustunni að undanförnu var þetta afbragðsgóð tilbreyting (ekki að hollustufæði geti ekki verið sælkeramatur og öfugt, neinei).

Ég dró einkasoninn með mér sem persónulegan kaffisérfræðing af því að tengdasonurinn og næstumþvíheimsmeistarinn var ekki til taks (auk þess sem hann er jú brennslumeistari hjá aðalkeppinautunum). Svo brugðum við okkur á (reyklausan!) Vínbarinn á eftir og fengum okkur glas af Beronia. Það var einkar góð afslöppun og einmitt það sem ég þurfti á að halda.

Annars hefði ég nefnilega verið heima hjá mér, dauðþreytt í döpru skapi. Uppvaskið frá í gær er nefnilega eftir.

En Boltastelpan ætlar reyndar að koma til mín eftir hádegi og hjálpa við það. Hún hefur reyndar verið í vinnu hjá mér að undanförnu og staðið sig afskaplega vel, bæði við uppþvott, sendiferðir, tiltekt og átt þátt í eldamennskunni líka. Vinnudagurinn hjá henni hefur byrjað klukkan sex á morgnana á Moggaútburði, síðan fer hún í unglingavinnuna og reytir arfa og svo kemur hún til mín um hádegi í snúninga. Og svo fer hún á æfingu eða að keppa á eftir.

En eftir daginn í dag er hún þó bara í tveimur vinnum en ekki þremur. Og reyndar er hún alla næstu viku á Laugavatni, þar sem hún var valin fulltrúi KR í knattspyrnuskóla KSÍ þetta árið.

Hörkukvenmaður.

Gamla fólkið

Dóttursonurinn kom hér áðan og rakst á auglýsingapésa um Sumarleik Byrs og fjölskyldunnar - Shrek 3.

Sauðargæran (mjög undrandi): -Fékkst þú þetta, amma?

Amman: -Ha - já.

Sauðargæran: -Ég vissi ekki að svona gamalt fólk fékk þetta.

Ég gat allavega fullvissað hann um að ég ætlaði ekki að teikna mynd af Shrek og senda inn. Þannig að hann sleppur við þá samkeppnina.

Júbílantapælingar

I'm too old for this shit.

En kjötið var allavega gott.

Ég ætla aldrei aftur að gera matreiðslubók uppþvottavélarlaus.

Eiginlega ætlaði ég að gera eitthvað af viti í kvöld þrátt fyrir allt en ég hugsa að af því verði ekki. Pósturinn var að færa mér nýútkomnar æviskrár MA-stúdenta 1974-78; ætli kvöldið fari ekki í að fletta þeim. Ég kannast jú við svo til alla þarna. Og við erum þarna þrjú systkinin.

Ég var annars að velta því fyrir mér í gær hvað væru margir þarna - eða í mínum árgangi því við erum að fara að hittast á föstudaginn - sem hefðu séð fyrir sér fyrir 30 árum hvar þeir yrðu núna í lífinu. Ekki gerði ég það allavega. Og hefði mátt segja mér þrem sinnum að ég ætti eftir að hafa matargerð og matarskrif að lifibrauði.

Með eða án uppþvottavélar.

Síðasti séns fyrir kjötætur

Þetta er bara ekki veður til að sitja inni og elda fyrir matreiðslubók. Nema kannski grillbók. Og jú, það verða vissulega einhverjir grillréttir í bókinni sem ég er að gera þannig að þetta var allt í lagi. Þannig séð. Nema núverandi svalir bjóða ekki upp á að eldhúsið sé fært þangað út í góðu veðri.

Allavega er farið að síga á seinni hlutann í myndatökunum. Fólk ætti að hafa í huga að hér á bæ eru til töluverðar birgðir af (elduðu) gæðakjöti sem húsmóðirin kemur ekki einsömul í lóg. Jafnvel ekki með aðstoð einkasonarins þótt hann sé drjúgur þegar kjöt er annars vegar.

Síðasti séns, það er bara eftir að mynda grænmetisréttina ...

Grill og gúmmulaði

Dagskráin í dag hljóðar upp á grillsteikur og sætmeti. Það viðrar líka til þess ...

Aftur á móti sýnist mér veðurspáin fyrir helgina á Akureyri ekki sérlega góð. Ojæja, ég er hvort eð er ekki að fara norður til að liggja í sólbaði.

Myndin er aftur á móti af stoltu liði Sauðargærunnar, sem var að keppa á fótboltamóti í fyrsta sinn og gekk bara nokkuð vel. (Hann er sá krullhærði með gleraugun.)

Hluti af dagsverkinu ...

... og svo sendi ég barnabarnið og aðstoðarstúlkuna út í búð. Hún keypti kexpakka svo að það væri eitthvað til með kaffinu.

Er það nú vantraustsyfirlýsing.

Vanafasta konan

Strætó var rétt ókominn á Grensás áðan þegar ég mundi skyndilega að ég hafði eiginlega ekki ætlað að fara í vinnuna í dag.

Þetta hefur svosem komið fyrir áður, ég er frekar vanaföst og oft ekki alveg í sambandi á morgnana, er á sjálfstýringu meira og minna. Nokkru eftir að Fróði flutti skyndilega upp á Höfða rölti ég af stað vestur í bæ einn morguninn og var komin á Vesturgötuna þegar ég áttaði mig. Svo flutti Iðunn á sínum tíma öðru hverju af Bræðraborgarstígnum á Seljaveginn og aftur til baka svo að ég var alltaf að ruglast. En það var svosem ekki langt þar á milli.

Stoppa líklega ekki lengi hér í Síðumúlanum - þarf víst að fara heim og undirbúa myndatökur dagsins. Samt er eitt og annað sem ég þarf að sinna fyrst ég er komin hingað á annað borð.

Til dæmis fá mér kaffi.