Bókaflutningar og fólksflutningar

Þegar ég fer til útlanda - einkum og sér í lagi ef leiðin liggur til London - kem ég venjulega heim með slatta af bókum. Allt upp í tuttugu, og þótt þær séu ekki svo margar eru þær oft stórar og þungar. Matreiðslubækur eru það gjarna.

Ég held ég sleppi öllum bókakaupum í næstu ferð, eða kaupi ekki nema það sem ég er alveg viss um að geta ekki fengið gegnum Amazon eða aðrar netverslanir. Þær síga nefnilega ansi mikið í og miðað við hvernig Icelandair-menn tala finnst mér líklegt að nú eigi að fara að fylgja þungatakmörkunum strangt eftir - þeir hafa reyndar verið býsna linir hingað til. Síðast þegar ég kom frá London var taskan 22 kg og var bara merkt sem Heavy án þess að nokkuð væri rukkað og ekkert litið á níðþunga hliðartösku, troðna af bókum, sem ég var með í handfarangri. Held ég sleppi ekki svo létt næst.

Vonandi fara þeir ekki að rukka fargjaldið eftir þyngd. Persónulega sé ég ekkert að því að láta þá borga extra sem þurfa tvö sæti undir sig (eða hálft annað, sérstaklega ef ég sit við hliðina á þeim) en á meðan maður getur látið sér nægja eitt sæti ætti eitt fargjald að duga. Þótt Boltastelpan sé t.d. miklu ódýrari farmur en ég.