Jónsmessunætur-bananamúffur

Ég bakaði bananamúffur áðan. Samt er ekki rigning. Né er ég að fara að velta mér upp úr dögg.

En ég átti nokkra banana sem voru orðnir fallega kolsvartir. Múffurnar eru nokkuð góðar bara. Og tekur svona fimm mínútur að gera þær í matvinnsluvélinni, ekki meira.

Bananamúffur

330 g bananar (vigtaðir án hýðis), helst svartir að utan
75 g muscovado-sykur eða púðursykur
75 g sykur
75 g smjör
3 egg
275 g hveiti
2 1/2 tsk lyftiduft
1/2 tsk matarsódi
1/2 tsk kanill

Ofninn hitaður í 200°C. Bananarnir stappaðir fínt eða maukaðir í matvinnsluvél og muscovado-sykri, sykri, smjöri og eggjum hrært vel saman við. Hveiti, lyftidufti, matarsóda og kanil blandað saman og síðan hrært saman við deigið, gjarna með sleikju - eða allavega borgar sig að hræra deigið eins lítið og mögulegt er eftir að hveitið kemur út í, ég notaði reyndar púlshnappinn á matvinnsluvélinni. Sett í múffuform (þetta eru 16-18 venjulegar múffur eða 20-25 litlar og bakað í miðjum ofni; um 15 mínútur fyrir venjulegar múffur, 10-12 fyrir litlar.