Af betlurum og íslensku umhverfi

Mér datt í hug áðan, þegar ég var að gefa manni sem ég mætti í Austurstrætinu klinkið sem ég var með í vösunum eins og hann hafði beðið ósköp kurteislega um - ég hafði nefnilega ekki mætt neinum á Laugaveginum eða í Bankastrætinu í þetta skipti svo að ég átti enn klinkið sem ég var með tilbúið til þessara nota - að það hefði líklega alveg gleymst að segja honum frá því að betlarar falli ekki inn í íslenskt umhverfi.

Eða það minnir mig allavega að ég hafi lesið í einhverjum kommentum við frétt um sígauna á Selfossi í gær.

Mér fannst náunginn ekkert falla illa inn í umhverfið í Austurstrætinu svosem. Og ég veit ekki betur en reykvískir rónar hafi betlað - eða ,,slegið" peninga í miðbænum áratugum saman og sennilega frá því að Austurstræti var moldartroðningur. Betlið er svosem hvimleitt en það er ekkert nýtt og það er ekki flutt inn frá útlöndum. Ekki þessi sort allavega.