Þetta er veður fyrir grillaðan fisk. Steinbít með svolitlum hvítlauk og chili eða skötusel með nýmöluðum regnbogapipar og svolitlu rósmaríni. Eða nei - nú man ég að ég á humar í frysti. Ekki sérlega stóran að vísu en mig minnir að hann sé góður.

Grillaður humar með hvítlauk, steinselju, smásítrónuberki og salvíu. Eða kannski örlitlu rósmaríni (alls ekki of miklu). Lambasalat, rauðustu tómatarnir í bænum (fræhreinsaðir og skornir í litla teninga), góð ólífuolía, nokkrir dropar af úrvalsgóðu balsamediki. Nýbakað baguettebrauð með, eða foccaciasneiðar ristaðar á grillinu. Vel kælt hvítvín. Köflóttur dúkur á svalaborðið.

Þetta fer nú að verða nokkuð freistandi þriðjudagsmáltíð.