Ég fékk í hendur um helgina jólagjafaóskalistann minn frá 1966, sem hafði legið með einhverjum öðrum pappírum í fórum móður minnar allar götur síðan. Hann er á þremur blöðum og aftan á einu er teikning, væntanlega eftir mig, af úlfalda og manni - vitringi geri ég ráð fyrir - sem báðir bera eitthvað af pökkum. Uppi á hæð er svo hús með þrjár burstir og stafar frá því geislum í allar áttir; þetta á sennilega að vera fæðingarstaður frelsarans, enda ekkert svo ólíkt fjárhúsunum í Djúpadal.

Og hvað langaði mig svo í þegar ég var níu ára? Listinn er tvískiptur, annar hlutinn er merktur Dót og er mun styttri. Þar er brúðumatur, brúður (Barbie), fótboltaspil, sparibaukur, bílar og spil. Bókalistinn er aftur á móti fjórtán númeraðir liðir og er svohljóðandi:

1. Grímur og sálfræðingurinn
2. Anna Heiða (og leyndardómur klettanna, geri ég ráð fyrir)
3. Guli skugginn (Bob Moran)
4. Eyðimerkurrotturnar (Bob Moran)
5. Fjársjóðurinn í Silfurvatni 2
6. Fimm í Álfakastala
7. Dularfulla leikhúsránið
8. Todda kveður Ísland
9. Sabína
10. Eins og allar hinar
11. Óli og Maggi með gullleitarmönnum
12. Óli og Maggi á ísjaka
13. Adda í menntaskóla
14. Matreiðslubók

Ekkert kemur þarna á óvart nema neðsta bókin. Grímur grallari, Bob Moran, Karl May, Enid Blyton, Ármann Kr., Jenna og Hreiðar ... og matreiðslubók. Líklega hef ég ekki verið með neina sérstaka bók í huga, sennilega ekki vitað nafn á neinni matreiðslubók, en svo mikið er víst að mig hefur langað mikið í slíkan grip því að annar styttri listi fannst líka, þó örugglega frá svipuðum tíma - það gæti hugsanlega verið afmælisóskalistinn minn frá því í mars 1967. Efst á þeim lista stendur ,,3 á ég að fá". Ég veit ekki hvað það táknar því að ég veit að ég eignaðist aldrei nema eitt af því sem á listanum er (ja, tvennt, ég eignaðist vissulega slatta af matreiðslubókum með tíð og tíma):

Óli og Maggi með gullleitarmönnum
Matreiðslubók
Föndurbók I og II
Leikrit eftir Davíð Stefánsson
Sirkus
Anna Heiða

Þessi listi er nú ívið fjölbreyttari en sá fyrri þótt styttri sé. Ég hef reyndar ekki hugmynd um hvað Sirkus er - ekki bókin eftir Alistair McLean, hún kom ekki út fyrr en seinna - mér dettur helst í hug pappasirkusinn sem Tóti frændi minn á Frostastöðum átti og ég var alltaf óskaplega hrifin af, kannski var ég að biðja um eitthvað ámóta.

En matreiðslubókadellan er semsagt eldri en ég gerði mér grein fyrir.