Við efnafræðistúdentinn röltum niður á torg til að mótmæla stríði um kvöldmatarleytið. Þetta áttu að vera þögul mótmæli en einhverjar þrjár fjórar manneskjur vildu endilega syngja. Þær um það. Okkur fannst samt dálítið sérkennilegt að þær sungu ameríska og hebreska söngva. Sem virkaði eins og á stóð einhvernveginn á skjön við friðarboðskap fundarins, ekki síður en írakski fáninn sem einhver var með. Kannski voru fleiri á sömu skoðun og við efnafræðistúdentinn, allavega myndaðist fljótt eyða í kringum þessar syngjandi konur á miðju torginu og auði hringurinn fór smátt og smátt stækkandi. Eins og allir væru að mjaka sér í burtu frá þeim: ,,nei, ég er sko ekki að syngja ..."

Efnafræðistúdentinn fékk að sjá um matinn og hann eldaði huevos rancheros, mexíkósk egg á brauði með kryddaðri tómatsósu. Reyndar bakaði ég brauðið sem hann setti þetta á, það hefðu eiginlega átt að vera tortillur en þegar á hólminn var komið ákvað ég að baka frekar ítalskar piadinur, þær eiga alveg við. Auðvitað má líka nota hveititortillur úr búð og uppskriftin er miðuð við það en heimabakaðar eru nú miklu betri. Bara hveiti, olía, ylvolgt vatn, salt og svolítill matarsódi, flattar þunnt út og steiktar á þurri pönnu.

Trikkið við sósuna er að sjóða hana nógu vel niður svo að hún verði meira eins og þykkt mauk en þunn sósa. Það þarf samt að passa að hún fari ekki að brenna. Og nota hæfilega mikið af chili, hún þarf að vera snörp en ekki logandi sterk.

Huevos rancheros

1 laukur, saxaður
2 hvítlauksgeirar, saxaðir
2 rauð eða græn chilialdin, fræhreinsuð og söxuð
2 dósir tómatar, saxaðir
3 msk olía
nýmalaður pipar
salt
4 egg
50 g bragðmikill rifinn ostur (sterkur gouda er fínn)
1-2 msk söxuð kóríanderlauf
4 tortillur eða annað svipað flatbrauð (það má líka nota ristaðar brauðsneiðar ef út í það fer)

Laukur, hvítlaukur og chili sett í matvinnsluvél og maukað. Tómatarnir eru svo settir út í og maukaðir líka. 1 msk af olíu hituð á pönnu og tómatmaukinu hellt á pönnuna. Kryddað með pipar og salti og látið krauma við meðalhita þar til sósan hefur þykknað - það gæti tekið 10-12 mínútur. Á meðan er þurr panna hituð og tortillurnar hitaðar á báðum hliðum þar til það fer að taka lit. Sett á hitaða diska. 2 msk af olíu hitaðar á pönnu og eggin steikt; best er að ausa olíunni yfir þau á meðan þau steikjast svo að rauðan hlaupi almennilega. Vænum skammti af tómatsósu er svo dreift á hverja tortillu, egg sett ofan á og rifnum osti og söxuðum kóríander stráð yfir. Borið fram strax.