Skyldi ný spænska veiki vera á leiðinni? Efnafræðistúdentinn er búinn að vekja athygli á því að hann muni örugglega sálast manna fyrstur þar sem hann sé asmasjúklingur og þeir hrynji niður eins og flugur í svona faröldrum. Hann er alltaf svo jákvæður og uppörvandi.

Annars man ég að þegar ég var nýkomin heim með hann af fæðingardeildinni á sínum tíma komu nokkrar vinkonur stóru systur hans í heimsókn og fengu að kíkja á krílið. Mér fannst þær einum of mikið ofan í vöggunni og sagði: ,,Passið ykkur að vera ekki of nálægt honum ef þið eruð með kvef eða eitthvað svoleiðis." Þá sagði ein stúlkan: ,,Já, ég fór ekki í skólann af því að ég er lasin og mamma heldur að það sé veiki sem ein stelpa dó úr ..."

Eins gott að þetta var ekki fyrsta barnið mitt. Þá hefði ég fengið kast. En þetta er eins og með snuðin, þið vitið:

Snuðið dettur í gólfið.
Ef þetta er fyrsta barn rýkur maður til, setur snuðið í pott og sýður það í tíu mínútur.
Annað barn: Maður skolar af snuðinu undir heita krananum.
Þriðja barn: Maður gáir hvort eru nokkur hár á túttunni, tínir þau af og treður snuðinu svo upp í krakkann.