Blaut, friðsöm og ómannglögg

Fór og mótmælti, blotnaði í lappirnar en kom ósár heim. Sá enga grímuklædda en heyrði þeim mun meira í þeim. Var nærri búin að ganga beint í flasið á einum hagfræðingi á leiðinni af fundinum en tókst að sveigja undan á síðustu stundu. Svo að þetta var nú allt heldur friðsamt.

Mætti manni á Laugaveginum á leiðinni á fundinn sem mér fannst eitthvað kunnuglegur og áttaði mig svo á því að þetta var víst maður sem ég var einu sinni gift. Þetta henti mig fyrir einmitt líka fyrir ári síðan (sami maður sko). Ekki skrítið þótt fólk sem ég þekki mun minna sé stundum að kvarta yfir að ég heilsi því ekki. Ég er ekki mjög eftirtektarsöm á götum úti.