Nei, það er ekki sexy goddess ...

Það rifjaðist upp fyrir mér í gær þegar ég var að lesa eitthvað um nígeríusvind og g-mail-póstföng að það væri líklega orðið of langt síðan ég skipti síðast um password á mínu. Svo að ég gerði það og setti inn lykilorð sem fékk einkunnina strong security.

Skildi svo ekkert í því áðan af hverju ég komst ekki inn á blogger. Var búin að gleyma að það er sama passwordið. Og svo ætlaði ég aldrei að muna hvað það nýja var. Sem er líklega ágætt, það ætti þá að vera sæmilega öruggt.

Annars var ég að lesa niðurstöður úr einhverri útlendri könnun þar sem kom fram að lykilorð sem fólk notar á netinu skiptust þannig að 47,5% notuðu einstaklings- eða fjölskyldutengd orð, 32% orð sem tengdust íþróttum, kvikmyndum, teiknimyndasögum, kvikmyndum eða öðru slíku, 11% orð eins og sexy, stud, goddess, slapper og bitch og aðeins 9,5% notuðu flókin lykilorð með blöndu af hástöfum og lágstöfum, bókstöfum og tölustöfum o.s.frv. - og það sem mörgum fannst merkilegt var að það voru helst elstu netnotendurnir sem voru með slík lykilorð.

Af þeim sem voru með fjölskyldutengd lykilorð var meira en helmingur einfaldlega með nafnið sitt eða gælunafn (sem sagt, samtals um fjórðungur allra í könnuninni var með eigið nafn sem lykilorð. Ekki mjög öruggt ...) og 35% í viðbót voru með nöfn barna sinna eða maka og 6% með nafn gæludýrsins.

Ekki alls fyrir löngu þurfti ég að komast inn á ákveðið íslenskt vefsvæði þar sem þarf lykilorð. Vefstjórinn bjó til aðgang handa mér og ætlaði að segja mér passwordið.

-Ekki segja mér að það sé xxx, sagði ég.

-Ha ... jú, sagði hann, -hvernig gastu vitað það?

-Þið tölvugaurarnir hafið ekki alveg nógu mikið hugmyndaflug, sagði ég. -Mér hefur verið úthlutað þessu passwordi áður.

Svo fékk ég að ráða passwordinu sjálf.