Kósí lítið morð
Ég þurfti að panta mér bók á Amazon áðan og ákvað þá að tékka á því í leiðinni hvaða bókum þeir mæltu með handa mér.
Ókei, ég veit ég kaupi aðallega matreiðslubækur og glæpareyfara. Og þess vegna skil ég alveg að það sé mælt með bókum sem falla undir chocoholic mysteries og cooking class mysteries og fresh baked mysteries (!?!?). Jafnvel coffeehouse mysteries og tea shop mysteries (jújú, þessir flokkar eru allir til). Ég sé alveg tenginguna þótt ég kaupi sjaldan svona bækur. Þær falla flestar undir skilgreininguna ,,murder cozies" og eru svona kellingaglæpasögur.
En þegar Amazon heldur að það sé hægt að selja mér knitting mysteries og needlecraft mysteries og flower shop mysteries, ég tala nú ekki um bear collector mysteries, þá þykja mér kósílegheitin í morðunum farin að ganga fulllangt.
Og vissuð þið að það er til glæpasagnaflokkur sem heitir sudoku mysteries?
