Strikamerkjavesen og útgáfumistök

ISBN-númer og strikamerki eru alvörumál í bókaútgáfu. Hér er einn vinnufélagi minn að rifja upp einhverja þá atburði í árdaga ISBN-væðingar (sem var einmitt stuttu eftir að ég hóf störf í bransanum), sem urðu til þess að hann var kallaður ISBN-níðingurinn. Annar hefur orðið uppvís að því að vera að búa til strikamerki í laumi í skjóli nætur. Það er margt sem þarf að varast.

Sjálf man ég eftir að hafa oftar en einu sinni og oftar en tvisvar staðið í jólaösinni kófsveitt á bókalagernum við að líma litla strikamerkjamiða aftan á hinar og þessar jólabækur af því að það uppgötvaðist þegar búið var að prenta að á þeim var vitlaust strikamerki. Eða hreinlega ekkert strikamerki, sem er skömminni skárra.

En ef það væru nú verstu mistökin sem hentu í bókabransanum ...

Einhverntíma var verið að tala um að koma upp safni af útgáfumistökum (hér er NB ekki átt við útgáfumistök af því tagi sem ekki hefðu átt að komast lengra en á hugmyndastigið, af þeim er vissulega nóg, heldur bækur sem komu öðruvísi út úr prentvélunum en til stóð ...). Það væri verðugt verkefni.