Gráfíkjur nógar og sætabrauð

Segið mér nú: er fólk alveg hætt að vita hvað gráfíkjur eru?

Ég hef ósjaldan á síðustu árum rekist á uppskriftir þar sem talað er um ,,ferskar gráfíkjur" sem er frekar sérkennilegt - hitt er ekki eins sérkennilegt þegar talað er um þurrkaðar fíkjur þegar átt er við gráfíkjur - sem eru jú þurrkaðar fíkjur, vissulega, en slíkt góðgæti hefur verið kallað gráfíkjur hér á landi býsna lengi. Gunna, sem gekk upp í búðarloftið í Pilti og stúlku, fékk jú gráfíkjur nógar og sætabrauð fyrir vikið, enda hljómar ekki vel að syngja um þurrkaðar fíkjur og sætabrauð.

En allavega, ég er að lesa yfir fáeinar uppskriftir og þar er talað um þurrkaðar fíkjur. Mig langar ógn að breyta þessu í gráfíkjur en er það kannski bara fordild og vitleysa í mér? Á ég að láta þurrkuðu fíkjurnar standa, skilur kannski enginn hvað átt er við með gráfíkjum eða heldur að það geti jafnvel verið ferskar fíkjur? Má maður eiga von á að sveskjur fari að heita þurrkaðar plómur og rúsínur þurrkuð vínber?

En gráfíkjukakan hennar mömmu verður þó aldrei þurrfíkjukaka, fjandinn hafi það.