Ég er soddan snillingur. Var að takast að sjóða 12 kílóa skinku í tveimur lítrum af vatni - meira komst ekki í pottinn, hún fyllti svo rækilega út í hann. Og nú er hún búin að malla á eldavélinni í hátt í átta klukkutíma og hitamælirinn sem ég stakk í hana sýnir tæpar 70°C svo að ég get slökkt undir henni. Hinn hitamælirinn sem ég stakk í hlussuna á öðrum stað sýnir bara 50°C en það er hann búinn að gera í þrjá klukkutíma og ég er búin að uppgötva að hann fer ekki hærra. Eins gott að ég treysti ekki á hann einan, þá hefði skinkan soðið í alla nótt.

Skinkuvandamálið leyst, önnur vandamál í aðsigi. Þau leysast líka. Svona er ég nú bjartsýn manneskja. Eða bara komin í jólaskap.

Ég fæ stundum sérkennilegar fyrirspurnir utan úr heimi frá fólki sem heldur að ég sé gangandi upplýsingabanki. Einhver Tom, sem ég kannast ekkert við, skrifaði mér um daginn og spurði hvernig væri hægt að sjá hvort kíví væri þroskað. Ég svaraði eftir bestu getu en benti á að Ísland væri kannski ekki the kiwi capital of the world. Í fyrra var fólk alltaf að skrifa úr hinumogþessum löndum og spyrja mig um perúska matargerð, ég veit ekki af hverju ég átti að vera sérfræðingur í henni. Og í dag fékk ég tölvupóst frá blaðamanni á bæjarblaði einhversstaðar í New Jersey sem er að spyrja mig hvað heitið Boxing Day merki, heldur greinilega að það sé íslenska. Nú veit ég að Bandaríkjamenn þekkja ekki annan jóladag sem sérstakan tyllidag, en samt ...