Heimatilbúinn mascarpone

Þegar ég var lítið fannst mér að spilin í spilastokknum væru alveg rosalega mörg. En núna eru árin víst orðin jafnmörg (jókerar ekki meðtaldir); ég á semsagt afmæli í dag. Mætti í vinnuna áðan með kökur og heimatilbúinn mascarpone-ost sem verður boðið uppá í föstudagskaffinu. Reyndar gerði ég ostinn bara í gær og hann á eiginlega að standa í sigti í sólarhring svo að hann er aðeins linari en hann ætti að vera - en það er í lagi fyrst hann er nú bara til að hafa með köku.

Ég er reyndar í ostagerðarham þessa dagana, sem ég hef ekki verið í mörg ár. Ætli það sé ekki bara kreppan ... Reyndar er lítill sparnaður í þessu, allavega mascarpone-ostinum, en þetta er frekar skemmtileg iðja og einstaklega einföld og fyrirhafnarlítil, satt að segja. Ég gerði stundum ferskost af ýmsu tagi hér áður fyrr en svo datt það einhvernveginn út. En kannski verður alls konar tilraunastarfsemi í gangi á næstunni.

Til að gera mascarpone þarf satt að segja ekki annað en rjóma, mjólk (eða kannski bara matreiðslurjóma, hef ekki prófað það), vínsýru eða sítrónusafa, pott, hitaþolna skál til að setja yfir hann (eða tvöfaldan pott, sem er best) sleif, sigti, grisju eða viskastykki og hitamæli, sem þó er ekki nauðsynlegur.