Jón Ásgeir og listagalleríin

Ég var að skoða teikningar og lýsingar af fínu margramilljarðaíbúðinni hans Jóns Ásgeirs í New York. Voða flott ábyggilega þótt ég hafi aldrei skilið hvað fólk hefur að gera með öll þessi klósett. En ég sá nú að samt er íbúðin ekki alveg eins fín og þarna er haldið fram. Ég meina, á neðstu hæðinni er sagt að sé listagallerí, ég keypti það alveg, þetta er listhneigt fólk og svona - en svo fletti ég yfir á næstu hæð fyrir ofan og þar eru samkvæmt textanum undir myndinni hvorki meira né minna en þrjú listagallerí. Og það fannst mér fullmikið. Enda sést á teikningunni að þetta eru bara gangar. Gallery er jú fínni versjónin af corridor.

Svo að þótt þau skötuhjúin séu listelsk eru þau líklega ekki með fjögur listagallerí á 650 fermetrunum sínum. En ég gafst upp á að telja klósettin.