Þorláksmessuundirbúningur

Jæja, mér tókst að baka nokkrar sortir um helgina þótt aðstoðarkonan sem hafði boðað komu sína gleymdi sér við samsetningu eigin matreiðslubókar og sæist ekki. Og ég mundi eftir að kippa jólatrénu inn af svölunum og leggja það í baðkerið í morgun og taka kjúklingalifrina úr frysti. Skinkan verður aftur á móti ekki soðin fyrr en í kvöld. Ásamt fleiru sem fer á Þorláksmessuborðið.

Þorláksmessuboðið mitt er semsagt á morgun (nema hvenær?) og þangað eru allir velkomnir eins og venjulega, svona frá því um kaffileytið og fram undir miðnætti. Matur og bakkelsi og kaffi og svoleiðis. Ekkert brennivín og engin skata, en því miður verður að líkindum skötulykt í stigaganginum sem þarf að brjótast í gegnum. En engar áhyggjur, heimili mitt er griðastaður fyrir flóttafólk úr skötuveislum.

Endilega lítið inn á Grettisgötunni ef þið eruð á ferðinni og langar í kaffisopa eða matarbita eða þurfið að hvíla ykkur á jólastressinu eða hlýja ykkur á tánum eða pissa eða langar bara að kasta á mig jólakveðju. Það er ekkert skilyrði að þekkja mig ...