Bleikar tertur og kona úti á þekju

Hér eru bleikar og hjartalaga tertur í morgunmatinn - leifar úr brúðkaups- og skírnarveislu hjá systur eins starfsmannsins um helgina. Sykur og rjómi eins og vera ber - en kannski ekki ídealmorgunverður. Ég hélt mig nú við abt-mjólkina mína að mestu.

Ég keypti mér bol á laugardaginn og ætlaði að mæta í honum í morgun. Leitaði að honum dyrum og dyngjum en fann hann hvergi nokkurs staðar. Hann er eftir því sem ég best veit enn í pokanum úr búðinni og nú er ég logandi hrædd um að ég hafi tekið pokaskrattann með öllu saman og hent honum með ruslinu, því að það voru ansi margir pokar sem ég þurfti að drösla út í bakgarðinn eftir afmælisveisluundirbúninginn. Það væri þá ekki í fyrsta skipti sem eitthvað slíkt henti mig, einu sinni henti ég skástu úlpu gagnlega barnsins og stígvélunum með - þetta var í poka sem hún hafði komið með að norðan eitt haustið.

En ég ætla nú að leita betur þegar ég kem heim ef ég verð almennilega vakandi. Það skorti nefnilega töluvert á það í morgun, ég er búin að vera hálfsofandi alla helgina. Fjandans kæfisvefninn líklega óvenju slæmur, nema þetta sé svefnsýkin hans Þorbergs langafa. Sem trúlega hefur þó verið kæfisvefn þegar öllu er á botninn hvolft.