Kryddjurtalaxinn

Ég var beðin um þessa uppskrift úr veislunni á föstudaginn. Ég hef oft gert eitthvað svipað en svosem aldrei nákvæmlega eins í tvö skipti - hef prófað hitastig frá 110°C upp í 140°C og þá lengri tíma ef hitinn er lægri, það fer auðvitað líka eftir þykktinni á flakinu.

Hitinn er það vægur að kryddjurtirnar haldast grænar og laxinn verður safaríkur. Tilvalinn réttur á hlaðborð en getur auðvitað líka verið aðalréttur og þá e.t.v. heitur; mér finnst hann samt bestur við stofuhita. Með þessu mætti t.d. hafa einhverja létta, kalda sósu úr sýrðum rjóma, lauk og kryddjurtum.

Ég hef prófað ýmsar samsetningar á kryddjurtum og það er alveg óhætt að breyta til eftir smekk og behag hvers og eins.

Hægbakaður kryddjurtalax

1 laxaflak,800 g til 1 kg
svolítil olía
pipar
salt
1/2 knippi steinselja
nokkur basilíkublöð
1-2 vorlaukar
1/2 tsk ítölsk kryddjurtablanda (eða aðrar kryddjurtir eftir smekk)
rifinn börkur af 1 sítrónu
1 hvítlauksgeiri, saxaður (má sleppa)

Ofninn hitaður í 125°C. Bökunarpappír settur á bökunarplötu, svolítilli olíu dreift á hann þar sem flakið á að koma og svo er laxaflakið kryddað með pipar og salti og lagt á plötuna. Allt hitt sett í matvinnsluvél og saxað smátt (það er auðvitað líka hægt að saxa það með hníf). Dreift jafnt yfir laxinn og þrýst létt niður. Laxinn er svo bakaður í miðjum ofni í 25-30 mínútur.

Það ætti ekki að vera neitt mál að losa flakið gætilega af pappírnum og renna því yfir á fat og ég geri það oft en það er enn minna mál að klippa pappírinn til þannig að hann standi bara svolítið út fyrir flakið á öllum hliðum og renna laxinum með pappír og öllu saman yfir á fatið.