Hvernig gerir maður erfðaskrá?

Segiði mér nú eitt, þið sem vit hafið á: Hvað þarf til að erfðaskrá sé lögleg? Er nóg að skrifa hana á rúðustrikað blað, undirrita hana og fá tvo votta (þurfa þeir að uppfylla önnur skilyrði en að vera sjálfráða og ekki sjálfir á meðal erfingja?), eða er betra að nota löggiltan skjalapappír og hvaðeina? Eða verður að fá lögfræðing í málið?

Nei, ég er ekki dauðvona og ég er ekki að fara að gera erfðaskrá. Ég er heldur ekki búin að kynnast einhverju forríku gamalmenni sem ég ætla að plata til að arfleiða mig að einbýlishúsi, hlutabréfum, frímerkjasafni og Kjarvalsmálverkum (I wish). Og ég er ekki að skrifa sakamálasögu þar sem plottið snýst allt um vafasama erfðaskrá.

Mig langar bara að vita þetta.

Reyndar fór ég að velta því fyrir mér á dögunum hvort ég ætti kannski að gera erfðaskrá, svona til að vera við öllu búin, en svo áttaði ég mig á því að ég á þessa tvo lögerfingja sem hljóta að geta komið sér saman um að skipta reytunum eftir mig jafnt. Ég held að ég eigi ekki margt sem þau mundu bæði hafa ágirnd á - ekki eftir að kökudósin með myndinni af danska fótboltalandsliðinu 1986 hvarf út úr dæminu, en það var reyndar uppáhaldstengdasonurinn sem ásældist hana og fékk, ekki gagnlega barnið.

Ég var einmitt að spyrja þau um daginn hvað ég ætti að gera við matreiðslubókasafnið þegar ég færi á elliheimili, gefa það á safn eða hvað; gagnlega barninu var hundsama og vildi ekki sjá neitt af því en einkasonurinn áskildi sér allan rétt til að kemba í gegnum það áður en því yrði fargað.