Lauksulan

Ég sit hér og er að fletta dönsku matarblaði og allt í einu er ég með böggum hildar af því að ég uppgötvaði að ég á ekki lauksúlu og auðvitað bráðvantar mig svoleiðis.

Lauksúla er svona trékubbur, kannski ca. 8x8 cm eða svo, með fjórum löngum málmteinum upp úr, einum í hverju horni, og þarna niðurámilli teinanna getur maður svo dúmpað nokkrum laukum þannig að það myndast rosa flott súla. Það er hægt að fá tvær stærðir, 40,5 cm og 35 cm á hæð. Sjálfsagt pláss fyrir svona sex lauka í þeirri hærri. Rosalega smart og ábyggilega gífurlega handhægt. Ég sem hef ævinlega bara geymt mína lauka í ljótri körfu á eldhúsbekknum.

Þetta er frá Zone í Danmörku og ég veit að þetta fæst í Húsgagnahöllinni en ég hafði náttúrlega ekki vit á að kaupa mér svona á meðan ég var að vinna uppfrá. Hvernig átti ég að vita að hálfum mánuði seinna yrði ég gripin af (næstum) óviðráðanlegri löngun til að eignast lauksúlu?

Svona er líf mitt í hnotskurn. Alltaf að missa af tækifærinu ...

Kannski eins gott. Ef ég eignaðist svona flotta lauksúlu yrði ég örugglega ekki í rónni fyrr en ég væri búin að eignast eplasúlu og sítrónusúlu og gulrófusúlu og ... já, auðvitað þyrfti ég líka sérstaka rauðlaukssúlu, ekki hægt að fara að blanda þessu saman. Og þá gæti nú farið að þrengjast um borðplássið í nýja eldhúsinu. Líklega best að ég haldi áfram að vera ósmart og nota körfu undir laukinn.