Ég var klukkuð aftur og fyrst ég sleit keðjuna í fyrra skiptið (og geri það aftur núna) er best að ég setji hér nokkrar fleiri staðreyndir um sjálfa mig:

1. Ég var einu sinni búin að fá skólavist í húsmæðraskólanum á Varmalandi. Ætlaði að hætta í menntaskóla og fara að læra til húsmóður. Kannski væri ég núna bóndakona í Borgarfirði ef ég hefði gert alvöru úr því. Hver veit.

2. Mig hefur alltaf langað til að vera rauðhærð. Að vísu hafa sumir haldið því fram að ég sé rauðhærð (reyndar langt síðan ég heyrði það síðast) en það er della. Þegar ég var lítil var ég aftur á móti með svartan lokk vinstra megin á höfðinu.

3. Ég drekk ekki áfenga drykki eftir miðnætti. Þá skipti ég yfir í vatn. Frábært prinsipp sem hefur bjargað fjöldamörgum helgarmorgnum fyrir mér.

4. Ég er í alvöru blóðlöt en tekst merkilega vel að fela það út á við. Þetta dylst hins vegar ekki þeim sem koma heim til mín.

5. Ég borðaði ekki kartöflur frá því ég var lítil þar til ég var 15-16 ára. Núna þykja mér þær verulega góðar (ef þær eru góðar). Einu sinni var ég um tíma í Holti hjá afa og ömmu og amma var eitthvað að býsnast yfir þessari matvendni í barninu að borða ekki kartöflur. Þá tautaði afi: ,,Mér væri svosem sama þótt ég sæi þær aldrei." Amma heyrði þetta og varð afskaplega undrandi, sagðist aldrei hafa heyrt han nefna þetta áður. Þá voru þau búin að vera gift í meira en 50 ár.