Ég var að taka eftir því að kannan sem ég er að drekka kaffi úr er með mynd af svíni í baði og textanum ,,Hogwash". Það á ágætlega við þar sem ég er umkringd svínum - nei, nú á ég ekki við efnafræðistúdentinn, hann er kattþrifinn - eldhúsið er fullt af svínakjöti: Eitt læri komið í ofninn, annað á eldhúsbekknum og fer í hinn ofninn á eftir, og svo var að koma hingað ungur maður með ein sex kíló af bratwurst sem ég ætla að steikja á grillpönnunni.

Annars er ég að fletta í bæverska (segir maður bæverska???) kaflanum í stórri þýskri matreiðslubók sem ég á til að gá hvort ég finn eitthvað sniðugt til að elda handa efnafræðistúdentunum. Mér líst vel á uppskriftir eins og Blut- und Leberwürste mit Sauerkraut, Milzwurst in aufgeschlmalzter Brotsuppe, Saure Kutteln, Saures Lüngerl, Paniertes Euter og Gespicktes Kalbsherz, en ég er hrædd um að ekkert af þessu yrði sérlega vinsælt. Auk þess sem ég á ekki hráefni í það. Hvorki þýska blóð- og lifrarpylsu, miltispylsu, nautavömb, svínalungu, kýrjúgur eða kálfshjarta. Þannig að þau sleppa við þetta góðgæti. Ég held að ég verði að leita í einhverja aðra af þýsku bókunum mínum.