Ég var að fá sendingu frá bóka- og fornbókaversluninni Powells, sem ég versla stundum við og læt ævinlega senda mér í sjópósti. Það skemmtilega við þessar sendingar er að þær eru svo lengi á leiðinni frá Seattle að ég er alltaf búin að steingleyma hvað ég hafði pantað þegar pakkinn kemur. Næstum eins og að fá jólapakka.

Það reyndust vera fremur áhugaverðar bækur í þessari sendingu. I'm Just Here for the Food eftir Alton Brown, ein af þessum bókum sem mér þykja svo áhugaverðar um það hvað gerist í rauninni þegar matur er eldaður, hvers vegna og hvernig mismunandi aðferðir virka. On Fasting and Feasting, safnrit með matarskrifum, m.a. eftir ýmsa af uppáhaldshöfundunum mínum. Offbeat Food, adventures in an omnivorous world. Þar er alls konar undarlegt stöff, meðal annars hægt að lesa um ráðleggingar Kellogs (já, gaursins sem fann upp kornfleksið) varðandi það hvernig á að stöðva sjálfsfróun hjá börnum: Umskera strákana - án deyfingar - og bera hreina karbólsýru á snípinn á stelpunum.

Æ, já, og svo er The Harley Biker's Cookbook. Með uppskriftum eins og Thunder Grunt Stuffed Mushrooms, Fat Sam's Stuffed Pork Chops, Bad Boy Beef Tacos, Bike Club Soda Fried Fish, Spuds Rodriguez' Hot Potato, Spread it on Hamburgers, Sweet-Funky Dunking Sauce, The Non-Dieters Delight. Og svo framvegis.