Ekki vissi ég það fyrr en ég las það einhvers staðar í gær að í meirihluta ríkja í Bandaríkjunum eru hjónabönd systkinabarna bönnuð eða því aðeins leyfð að engin hætta sé á að fólkið eignist barn saman. Ég var reyndar að lesa umræður um þetta einhvers staðar um daginn og þar kom í ljós að einhverjir héldu að systkinabarnagiftingar væru óheimilar hér á landi, sem er náttúrlega ekki rétt. Langalangafi minn og langalangamma voru til dæmis systrabörn (nei, afkomendur þeirra eru ekki vanskapaðir fávitar upp til hópa, samkvæmt nýjustu rannsóknum aukast líkur á meðfæddum göllum og sjúkdómum um 2-3% hjá börnum systkinabarna versus óskyldra foreldra). Og ein langafasystir mín giftist föðurbróður sínum.

En það sem ég var að velta fyrir mér var hvenær giftingar svona náinna skyldmenna urðu heimilar? Einu sinni var jafnvel fjórmenningum bannað að giftast (það væri nú eins gott að vera duglegur að fletta upp í Íslendingabók ef það gilti enn, kannski ætti að vera beintenging inn á Íslendingabók frá einkamál.is og öðrum stefnumótavefjum til öryggis) en hvenær breyttist það? Og gerðist það í einum áfanga, þannig að t.d. kona sem ekki hafði mátt giftast manni sem var fjórmenningur við hana mátti allt í einu giftast föðurbróður sínum, eða gerðist þetta smátt og smátt?