Blessunin hann Billy

Ég er búin að vera að horfa á bókastafla sem liggja hér í stólum og sófum og á borðum og á gólfum og - já, á ýmsum stöðum - og það er náttúrlega bara ein lausn.

Billy.

Einn Billy. Helst tveir en ég hef ekki pláss fyrir tvo í viðbót.

Auðvitað hef ég ekki pláss fyrir einn heldur en ég veit nú samt hvar ég get komið honum. Svo að það reddast. Losa mig kannski við eitthvað af bókum ef einn dugir ekki.

Ég ætlaði að panta hann gegnum netið. Langeinfaldast, mig langar ekkert í ferðalag útá land til að kaupa skápinn. En það er náttúrlega ekki vinnandi vegur að fá upplýsingar um það á síðunni hjá Ikea hvort það kostar fimmtán hundruð eða fimm þúsund krónur að fá hann sendan. Eða allavega koma þær upplýsingar ekki fram fyrr en búið er að panta. Þannig að ég verð að hringja á morgun og tékka á því.

Eða ef einhver góður maður/kona á leið suðrí Ikea á næstu dögum/vikum á bíl sem er nógu stór til að rúma einn Billy, þá væri nú gott að vita af því ...