Sauðargæran er í pössun hjá mér ásamt systur sinni.

Eins og börnum er tamt er hann fljótur að koma auga á það sem ábótavant er hjá fullorðnum og við vorum varla komin úr skónum þegar hann leit á fæturna á mér og sagði, afar glaður í bragði: - Amma, þú ert með gat á sokknum!

Ég: - Æ, æ. Það er alveg rétt hjá þér.

Sauðargæran (vongóður): - Ætlarðu ekki að fara að gráta, amma?

Ég: - Búhú, það er gat á sokknum mínum ...

Sauðargæran: - Svona, svona, amma mín (klappar mér). Ég er að vera góður við þig. Hættu nú að gráta.

Hvað gerir maður ekki fyrir barnabörnin.

Annars höfum við aðallega verið að ræða muninn á stórum og litlum strákum. Stórir strákar pissa í klósettið. Litlir strákar eru með bleyju. Sauðargæran er lítill strákur og vill ekki verða stór. Ekki einu sinni þótt það séu bara stórir strákar sem geta fengið hjól. Hann langar ósköp mikið í hjól. En samt ekki nógu mikið ...