Jay Leno var að boða komu ,,The Fruitcake Lady" í þáttinn seinna í vikunni. Ég sagði við efnafræðistúdentinn að ég vildi fá að vera fruitcake lady í svona spjallþætti og skamma einhver seleb fyrir kunnáttuleysi í bakstri (reyndar fengi ég líklega ekki að skamma Mel Gibson eins og sú gamla hjá Leno, og ég man í fljótu bragði ekki eftir neinu íslensku selebi sem mig langar neitt sérstaklega til að skamma).

,,Þú ert fruitcake," sagði efnafræðistúdentinn.

Og þetta er einkasonur minn.

Annars er ég einmitt að fara að baka ávaxtakökur á morgun. Stollen og eitthvað slíkt. Og sjö laga vínartertu með krydduðu sveskjumauki.