Af því að ég minntist á Powells í gær, þá verð ég eiginlega að nefna abebooks í dag. Fyrir þá sem ekki þekkja abebooks.com, þá er þetta gagnagrunnur og sameiginleg netverslun fornbókasala víða um heim. Það er frábært (og óhugnanleg freisting fyrir bókafíkil) að geta flett samtímis gegnum lagerinn hjá tíu þúsund fornbókasölum, frá Ástralíu til Svíþjóðar, sett þær í körfuna og borgað. Svo ef maður er að leita að ákveðinni bók og hún er hvergi finnanleg getur maður skráð sig á biðlista og er látinn vita þegar einhver bóksali setur hana á skrá hjá sér.

Áðan fékk ég til dæmis tilkynningu um að bókin Saudi Cooking of Today eftir Skipwith Ashkhain hefði komið inn hjá bóksala í Ontario í Kanada. Ég skráði hana á ,,wants"-listann minn fyrir líklega hálfu öðru ári en þetta er fyrsta eintakið sem kemur inn allan þann tíma, enda hafði mér áður skilist að það væri mjög erfitt að hafa uppi á þessari bók, sem er eitthvað tæplega tuttugu ára gömul. En þarna hefur fornbókasalinn skráð hana inn í morgun eða dag, ég fæ tilkynninguna um áttaleytið og var búin að panta bókina fimm mínútum seinna. Reyndar er ég ekki 100% örugg með að fá hana, það er auðvitað hugsanlegt að einhver annar hafi líka verið að bíða eftir henni og hafi orðið fljótari til en ég. En það kemur í ljós á morgun.

Þegar ég var að panta bókina sá ég að í körfunni minni hjá abebooks beið önnur bók sem ég hafði sett þar fyrir einhverjum vikum eða mánuðum en ekkert legið á að panta af því að hún er ekkert sérlega sjaldgæf. Ég athugaði því hvort einhver betri díll hefði komið inn í millitíðinni en svo var ekki, þetta var ódýrasta eintakið af þeim sex eða sjö sem sem voru á skrá og var auk þess í Ástralíu. Yfirleitt er hagstæðara að láta senda sér bækur frá Ástralíu en Bandaríkjunum, nema þær séu þeim mun stærri. Svo að ég pantaði þessa bók líka.

Abebooks er stórháskalegt apparat. Maður er alltaf að falla í freistni.