Ég hafði eiginlega ætlað mér að elda eitthvað íranskt í dag en kem til með að enda í Norður-Afríku, ég var nefnilega að eignast áðan forláta tagine, sem mig er lengi búið að langa til að eiga, og verð að vígja hana. Tagine er aðaleldunarílát Marokkómanna og annarra Norður-Afríkubúa og er eiginlega sambland af potti og ofni. Þetta er þungt og þykkt leirílát og ég hef aldrei lagt í að drösla því með mér heim þegar ég hef verið í útlöndum þótt mig hafi oft langað til að kaupa það þar sem ég hef rekist á það. En nú er nýkomin búð á Laugaveginum (í húsinu við hliðina á Kjörgarði) sem selur marokkóskar vörur og þar á meðal fékk ég alvöru tagine. Ég er reyndar búin að vera í norður-afrískum/arabískum fasa í matargerðinni um tíma (eins og mun t.d. sjást í næsta Gestgjafa) en hann minnkar örugglega ekki við þetta.

Óleysta vandamálið er aftur á móti hvar ég á að geyma taginuna þegar hún er ekki í notkun. Hún tekur pláss. Það er töluverður skortur á því í eldhúsinu/borðstofunni nú þegar. Fjandinn sjálfur. Kannski verð ég að gera alvöru úr því að smíða hilluna sem mig langar að setja upp í borðstofunni, allan hringinn. Það er að segja finna einhvern til að smíða hana því ég held ég geri það ekki sjálf. Kannski ætti ég að reyna að finna mér einhvern lagtækan smið sem ég get dregið á tálar (nú, jæja, eða freistað með matarboðum). Þetta þarf að skoða betur.

En á meðan verður taginan bara notuð óspart ...