Síðasti kaffitíminn

Síðasti kaffitíminn hjá Fróða búinn (nei, ég er ekki að hætta fyrr en eftir þrjár vikur en á morgun heitir fyrirtækið eitthvað annað - ekki Íslendingasagnaútgáfan þó, ég er eiginlega hætt að fylgjast með hjá hverjum ég er að vinna).

Fráfarandi eigendur sáu ekki ástæðu til að bjóða starfsmönnum upp á vínirbrauð með kaffinu í kveðjuskyni. Hvað þá tertu. Sem ekki er kannski von, það eru svo fáir eftir sem voru hér þegar þeir tóku við fyrir tveimur árum.

Ég hefði nú bakað ef ég hefði verið beðin um það.

Ég tók ekki þátt í verðlaunasamkeppni um nýtt nafn á fyrirtækið. Var samt að hugsa um að stinga upp á nafninu Rústabjörgun ehf. en held að ég hefði ekki fengið að fara út að borða út á þá tillögu.